Tamurt-iw treqq.
Akka yal aseggas, tikkelt-a tugar-itent akk. Tamurt n Lqbayel terɣa, treqq ar tura. Ixaq yilwi (yilef) yerna-d gma-s. Ur yekkis uɣbel n waṭṭan kuṛuna almi d-terna tmes. Times-a mačči deg yiwen umkan kan i teṭṭef, ladɣa deg ugezdu n Tizi Uzzu. Tenteɛ deg tẓegwa, deg yiɛerqab n uzemmur. Tikkelt-a tewweḍ almi d tudrin, tekker deg yixxamen, tewwi ula d tiṛwiḥin. Kra n twaculin d arwal i rewlent ɣef ǧǧhennama akken ad smenɛen iqerray-nsent, wanag ixxamen-nsent, lmal-nsent d wayen melkent ṛuḥen akk d iɣed.
D acu-t tura wagi ? Yal aseggaa akka. Times ma tekker deg waṭas n yimukan deg yiwen n lweqt akken d-nnan yimḍebbṛen n tẓegwa, dinna d afus kan n umdan neɣ n yimdanen ara tt-ixedmen. Yeggra-d kan ad neḥṣu ma yella metɛemda neɣ mačči metɛemda i d-ttilin yinaɣuren i itetten kra yella mebla tawant.
Tella yiwet diɣen, ula d nekkni nefka afus, nekki deg ubaxix-a i d-iḍerrun imi ur d-necbi ara deg lejdud-nneɣ yetteḥbibiren ɣef twennaḍt. Ur ttaǧǧan ara times ad ten-id-taweḍ ɣer yimnaṛen n yixxamen-nsen neɣ ad tekcem ɣer iɣewdan-nsen imi anda yella uhicuṛ iɣef tezmer ad tekker deg-s tmes ttḥuccun-t neɣ sraɣayen-t maḍi s tɛessast tameqqrant. Diɣen aṭas n wazalen i d aɣ-inesren, ttṛuḥun yiwen yiwen. Zik d lɛib ameqqran ad tesweḍ ccṛab neɣ lbira yeg Ṛebbi beṛṛa i tudrin. Tura ddunnit akk truḥ d tiqreɛtin, nnig yiberdan, ddaw yiberdan, deg yiɣewdan, anda teddiḍ ad k-id-immager ddjaj. Nwala dakken tazɣelt tikwal tettɛedday nnig n 45 n tfesniwin, iṭij am wa, ma yufa-d sdat iqcer n ddjaj d lxelṭa tafexsayt, ala times ara yaɣen. Times-nni nwala d acu i d ccɣel-is.
Amdan aqbayli ḥnin, ul-is d ameqqran, ur yettaǧǧa ara gma-s iwimi yerɣa uxxam d twacult-is ad igen beṛṛa. Win izemren kra ixdem-it, akken i d-teḍra d wayeḍ i tezmer ad d-teḍru yid-k.
Ad neddukel, ad nesber ad tɛeddi lmeḥna-a, ad nuɣal ad nwali amek ara ddunt temsal akken ur d-ttuɣalent ara txettaṛin am ti.
Akka d tasawent, tewwi-d fell-aneɣ ad necqirrew yir zzman-a i d-yeɣlin akka fell-aneɣ, ad as-neddu deg lher, ad d-neɣrem kra n wayen akk i aɣ-iṛuḥen.
Ad fakkeɣ awal s yiwen wawal yeččuṛen d asirem i d-yenna yiwen umeddakel amedyaz, amaru, Mass Rachid Oulebsir : « Urǧin ad nreɣ ! Ad nɛiwed uẓu i yidurar-nneɣ d yizuɣar-nneɣ ! Yal aseklu ara neẓẓu ad yutlay s teqbaylit i warraw-nneɣ, tiẓegwa ad uɣalent d idlisen n yisefra. »
Treqq tmurt-iw