Amenzu n yennayer
Yennayer deg Tmazɣa akk…
Tamurt-nneɣ wissen d acu i tt-yuɣen akka? Ɣas ma teẓra ala tidet ara d-yeqqimen, ayen icuban akk ɣer tikerkas ad yefsi am udfel mi ara d-yeffeɣ yiṭij; maɛna ar tura amzun tedderɣel ur tettwali imi abrid yessuffuɣen iɛreq-as, tettezzi tettenneḍ deg wadeg-nni kan anda i bɣan yimdebbren fell-aneɣ ad teqqim… Ur teḥsi ar tura acḥal i tettdeggir n wakud ur d-nettuɣal, d wacḥal n terwiḥin yettruḥun am tadla yečča yilef deg ma d kra n tegnatin. Tuɣal d tamcict-nni i itetten arraw-is.
Agdud Amaziɣ akken ma yella deg Tferka n ugafa neɣ anda yebɣu yili, deg Taruft neɣ deg Marikan, seg wasmi i tebda ddunit, yesfuggul amenzu n yennayer, ixef n useggas amaziɣ. Ma d tamurt n Lezzayer meskint, truja nnig n uzgen n lqern deffir n timunnent-is, terra amenzu n yennayer d ass unsib war ixeddim yerna yettuxelles am umenzu n janvier d umenzu n muḥerrem iwimi terra azal seg tazwara, mačči am umenzu n yennayer i terra deg rrif ɣas ma Imaziɣen urǧin ḥebsen tikkelt deg usuter deg uwanek n Lezzayer, akken ad t-yerr d unsib yerna ala azref-nsen i d-ssutren.
Aseggas ameggaz
Imaziɣen bdan ḥessben ussan a-t-a 2968 n yiseggasen aya, segmi yeṭṭef ugellid amaziɣ Cacnaq leḥkem, yuɣal d aferɛun deg Maser. Lezzayer-nneɣ truja aseggas agriguri 2017 neɣ win n Yimaziɣen 2968 akken ad terr amenzu n yennayer d unsib.
A-t-a wayen uriɣ ilindi ɣef yennayer, ala cwiṭ i ibeddlen deg tmuɣli n yimḍebbren-nneɣ ɣef tmaziɣt d yidles-is d insayen-is: Ad as-nini i yinebgi Yennayer ansuf yis-k, axxam-nneɣ ara d-tafeḍ d azeddgan d axxam-ik. Imaziɣen anda ma llan ama deg Tmazɣa, ama berra i Tmazɣa, ttrajun deg-k ad asen-d-teččareḍ tawwurt s waṭas n usirem. Asirem ara izedɣen ulawen-nsen kra ara yekk useggas amaynut 2967 acku aṭas deg wayen ssaramen ur uwiḍen ɣur-s ar ass-a ɣas ma lebɣi-nsen dima yettimɣur. Kečč s timmad-ik, teqqimeḍ-asen d aɣbel imi ar tura ur tuɣaleḍ d ass aɣelnaw war amlahil yerna ad ttuxellseḍ, Tutlayt tamaziɣt tuɣal d takna i taɛrabt imi tt-rran yimḍebbren-nneɣ d tunsibt s wudem n uskeɛrer imi isuḍaf-nni iɣef ara deɣren (voter) akken ad tili d tunsibt s tidet, akken ad tili teǧhed, akken ad taɣ taqaɛet am tutlayt taɛrabt yuɣalen d buredman, akken ad tt-id-yaf uzekka, akken akken… Ayagi akk ur yelli.
Akken yebɣu yili lḥal nekkni ad nesɣer aqerruy, ad nexdem am tteryel yettɛassan win akken i as-yulin ɣef useklu akken ur t-tett ara. Tenna-as: “ Ma ur k-id-iṣseɣli ara ubeḥri n tefsut ad k-id-isseɣli win n unebdu, ma ur k-id-isseɣli ara win n unebdu ad k-id-isseɣli win n umwan, ma ur k-id-isseɣli ara win n umwan, ad k-id-isseɣli win n tegrest…” Daɣ netta nekkni, ad nraju, ad nraju alma kra i ilaqen ad yili ad d-yili…
Wigi d kra n yisefra ɣef yennayer.
Tagi d tukkist seg yiwet n taɣect cennunt tlawin tiqbayliyin, d tajmilt i ugellid n wayyuren:
A yennayer ! A yennayer ! Keččini d bab n yiger,
A yennayer ! A yennayer ! Fell-ak i nerwa amdegger,
A yennayer ! A yennayer ! Eğğ amkan a gma i Furar,
A yennayer ! A yennayer ! Tettaggadeḍ Rebbi deg umɣar.
A yennayer bu-ṣṣaba,
Aman-ik d isemmaḍen,
Tamurt n jeddi d baba,
I tt-ireffden d irgazen,
A yennayer bu-tecrurin,
A win mi yezdi yisem,
Ḥemmlen-k warrac d tlawin,
Mi i k-yesla udrar d rrsem.
A yennayer ! A yennayer ! A lexyar deg wugguren,
A yennayer ! A yennayer ! Ḥader widak yunagen,
A yennayer lehna tafat,
Tamurt tedda s tisula,
Win i inudan ɣef kra yufa-t,
Anda yedda Rebbi yella !
Ansuf s yinnayer: