Mouloud Feraoun (Lmulud At Caεban)
Awal ɣef Lmulud At Caɛban
Mouloud Feraoun d amaru Azzayri s tenfalit tafransist, ilul deg 8 meɣres 1913 deg Tizi Hibel (At Dwala), yettwanɣa deg Lezzayer deg 15 meɣres 1962.
D anelmad n uɣerbaz amagnu n yisalmaden n Buzerriɛa (Lezzayer) yesselmed aṭas n yiseggasen s wudem n usalmad, yuɣal d anemhal n uɣerbaz, diɣ n temsirin tisemmadin send ad t-rren d amaswaḍ n yigensen n tmetti. Lmulud At Caɛban yebda yettaru deg useggas 1934. Ungal-is amenzu, Mmi-s n yigellil, amahil i izul uzɣan, yuwi arraz ameqqran n uɣrem n Lezzayer.
Amaru yettwanɣa ass n 15 meɣres 1962 deg lezzayer, ukkuẓ n wussan send aḥbas n lbarud n ttrad n Lezzayer, s tama n yiwet n terbaɛt n OAS (Tuddsa n Tredsa tuffirt) n Fransa (Timenɣiwt n Château-Royal).
Yura taqbaylit s tefransist
Mulud At Caɛban
Xelṭen yidamen d wakal
(ɣe)F nneɛc sulin-k d asawen
Amaɣbun n Tizi Hibel
Yeǧǧa-d kwan wulawen
Tiɣri-s dima tessawal
Teskefkuf am yisaffen
Iberdan mačči yiwen
Lǧerra-k tḍfer abrid
Tewwḍeḍ almi d asawen
(ɣe)F wudem-ik leḥya teɣli-d
Robles, Camus ttwaɣurren
Asmi i slan s lexbar ajdid
Alaḥal ad yali wass
Iḍ ɣezzif mačči d kra
Tasa mi tcerreg tuɣwas
Lezzayer tuɣ tiyita
D targit ay urgan l’OAS
Mi nwan ad qqimen da
Tennuɣeḍ almi d lmut
Laɛmer trefdeḍ ifassen
Tira-k tessaram tafsut
D rrṣaṣ n ureɣ ur ineqqen
Aṭas i tḥemmleḍ tamurt
Idammen-ik tefkiḍ-as-ten
Am lmernuna n unnar
Tbeddeḍ i ubaḥri n zzman
Yesguccel-ik merra uzger
Takka terna-d (ɣe)f yiɣeblan
Tgezzmeḍ awal am umger
Ulawen n lbaṭel kwan
Ulamma tiṭ ur k-tẓẓer
(de)G wulawen mazal teddreḍ
Awal-ik ur t-nḍegger
D azedgan ur t-nseffeḍ
Tirrugza fell-aɣ tugar
Ayen nettnadi ad t-naweḍ
Mulud mmi-s n umeɣbun
(de)G tmussni d amerkanti
Yeḥṣa s wayen i d-iteddun
Amek i ɛeffsen tilelli
Amek i kkaten ad ssettun
I lɣaci ayen n yiḍelli.
Yenǧer ubrid i tafat
Tafat yeffren ɣef wallen
Yenna-d d acu i d tazmart
Atmaten-is m(i) ara dduklen
Ad yeffeɣ lḥif tiɣerqert
Nekkni ad nerzu ɣef yiɣsan
Iɣsan daxel n uẓekka
N Lmumud yerjan ṣṣbaḥ
Iɛeyyu yeqqar mačči akka
Aṭas i ibeɛden ɣef ṣṣaḥ
Yeẓra kulci yettfakka
Ma yeqreḥ mmi-s ad yefreḥ.
Nɣan-t yicenga n tudert (l’OAS)