Tajmilt i ukkuẓet n tgejda n tmaziɣt
Tigejda n tmaziɣt
Ass n 20 ɣuct, amulli wis 60 n usebded n Uswir n Ssumam i d-yeḍran deg taddart n Yifri, lɛerc Awzellagen deg useggas 1956, ɣef uqerruy-is agrawliw ameqqran Ɛebban Remḍan, tella-d tẓuṇẓut (inauguration) n ukkuẓet n tmenziwin (steles) n ukkuẓet n tgejda n tmaziɣt: Dda lmulud At Mɛemmar, Masin Uharun, Saɛid Muqbel, Maɛṭub lwennas (Imeɣrasen n tmaziɣt). D kradet n teddukliwin tidelsanin n At Mlikec i ixedmen ccɣel-a yuklalen asnemmer. D gma-tneɣ Kamal Benḥemmuc anẓur ara yeǧǧuǧǧgen ugar i igan timenziwin-a ɣef yiwen uɣrab tama n yiɣzer n taddart n ugentur deg At Mlikec. Aṭas i d-irezfen ad kkin deg tẓunẓut-a ladɣa tiwaculin n yirgazen n yidles iwimi tuɣal tejmilt. I yal yiwen deg-sen ssawleɣ-d asefru i uriɣ deg ddemma-s assen akken yuweḍ leɛfun Rebbi. Zwareɣ-d seg Dda lmulud, nniɣ-d deg yiwet n tseddart:
Dda Lmulud
Aṭas i yugin i yiṭij
Ad d-yenqer tagut n ṣṣdad
Dda Lmulud yezga am yirrij
D yid-sen ur iḥbis ttrad
Ikki (de)g uhuddu n lweqt uɛwij
S wawal ittnaɣ ur yugad
Uɣaleɣ ɣer masin Uharun, nniɣ :
Masin Uharun
Nhedder ass-a s tfenṭazit
Neqqar-d ayen ur d-nenni
Awal nerfed-it s teqbaylit
Nessaweḍ-it nnig n yigenni
A Masin nuzen-ak-n talwit
Ad ak nini: “tanemmirt!!”
Imi tekkiḍ deg lebni.
Uɣaleɣ ɣer uneɣmas Saɛid muqbel, nniɣ :
Saɛid Muqbel
Akka i iga Saɛid Muqbel
Yugi ad yeqbel
Ayen ur iqebbel leɛqel-is
Taggara uwin-t d asfel
Idim-is yenɣel
Ɣef wakal n yiẓuran-is.
Aɣewwaɣ (le rebelle)
D tafekka n Lwennas i nɣan
Tiktiwin-is ttcalint
Lemmwal-is yiwen i d-sɛan
S tmettant tura seftin-t
Yuɣal deg-neɣ d win yellan
Deg wul dima nettawi-t
Tameddit n wass nnan-d yimḍebren n teddukliwin tidelsanin ad fakken tameɣra s ucennay Ul Leḥlu.