Tajmilt i Muhend Uyahya
Tajmilt i Muhend Uyahya
Muḥend u Yaḥya
Tutlayt taqbaylit teḥzen
Yewweḍ-d yir izen
Muḥend U Yaḥya yemmut
Seg zik d netta i tt-iɛuzzen
Yekkat ad tewzen
Ad taɣ amḍiq-is di tmurt
Tetturar ɣef yinzizen
Tmedyazt ifazen
Yekki deg (u)sebded n tefsut
Ur yecliɛ deg warrazen
Izgaren-is kerrzen
D afellaḥ icergen tagut
Tamaziγt deg (yi)ɣerbazen
Mačči d win yelzen
Ibennu, ittheggi takurt
« Lecɣal n taddart meqqrit
Nekkni meẓẓiyit »
Akkagi i yennum yeqqar
D argaz iḥemmlen talwit
Yettgalla ur yeḥnit
D amdan iqudren aẓar
Abrid n tmussni yuɣ-it
I yelhan yeddem-it
I tmaziɣt iga leqrar
Acḥal tura i isaɣ taftilt
Teḍwa ɣef teqbaylit
Amḍal akken ad tt-id-iẓer
Ur inuda ɣef testussint
Ɣas ma yuklal-itt
D argaz yessagren tinzar
Yergel abrid i twaɣit
Imi nnger yugi-t
I tmeslayt n wacḥal leqrun
Yessuffeɣ akkin taqbaylit
Tekki di ddunit
Di tsekla akk d umezgun
Tura yeẓẓel tinegnit
Tamettan tewwi-t
Yeǧǧa-d wid ara tt-yarun
Nekkni ad as-nini:
“Agerruj d-teǧǧiḍ nḥerz-it
Win yegnen nezzem-it
Ixef, iffeɣ-d i uqelmun
Ɣas teɣli-aɣ tgejdit
Tebded tmaziɣt
Yerna d tin ara yeddun”
Malek HOUD