Tamurt-nneɣ
!Abbuh
Tamurt-agi d tamurt-nneɣ
Tebɣam ad as-tbeddlem udem
S lekdubat teɣlim-d fell-aneɣ
Ayen yeččuren terram-t d ilem
Amezruy yebna yis-neɣ
Tessneṣlem-aɣ, akken issenṣel uzrem
Aẓru-nneɣ yenqec s tifinaɣ
Ur yeqbil taɛerbubt ad t-tekcem
Seg wakken tɣuccem iles-nneɣ
Yal ass tekkatem ad t-tgezmem
Tugim ad teddum d ṣṣwab
D tizelgi i tetteddum
Tqebḥem tugarem leqlab
Tseglafem, terwam aksum
Wa tenɣam-t, wayeḍ iɣab
Tbeddlem adrum s uɣrum
Tselsem-aɣ yiwen n ujellab
Tennam-d abernus ad t-tettum
Aglim-nneɣ ad yerwu azɣab
Ma yella fell-awen ad tdum.
La wen-neqqar deg-wen neɛya
Urǧin tgam-aɣ ccan
Tsuɣel fell-awen nneyya
S tḥerci themjem ussan
Tekkam-d sya u sya
Tetteqqsem, tugarem izerman
Mačči s ɛecra neɣ s meyya
I ɣ-teggarem s iẓekwan
Ad iyi-zzment yemma d yaya
Ma yella beddleɣ imawlan.
!Annaɣ a Rebbi
Malek HOUD