Tajmilt i ukkuẓet n tgejda n tmaziɣt
Ass n 20 ɣuct, amulli wis 60 n usebded n Uswir n Ssumam i d-yeḍran deg taddart n Yifri, lɛerc Awzellagen deg useggas 1956, ɣef uqerruy-is agrawliw ameqqran Ɛebban Remḍan, tella-d tẓuṇẓut (inauguration) n ukkuẓet n tmenziwin (steles) n ukkuẓet n tgejda n tmaziɣt: Dda lmulud At Mɛemmar, Masin Uharun, Saɛid Muqbel, Maɛṭub lwennas (Imeɣrasen n tmaziɣt). D kradet n teddukliwin tidelsanin n At Mlikec i ixedmen ccɣel-a yuklalen asnemmer. D gma-tneɣ Kamal Benḥemmuc anẓur ara yeǧǧuǧǧgen ugar i igan timenziwin-a ɣef yiwen uɣrab tama n yiɣzer n taddart n ugentur deg At Mlikec. Aṭas i d-irezfen ad kkin deg tẓunẓut-a ladɣa tiwaculin n yirgazen n yidles iwimi tuɣal tejmilt. I yal yiwen deg-sen ssawleɣ-d asefru i uriɣ deg ddemma-s assen akken yuweḍ leɛfun Rebbi. Zwareɣ-d seg Dda lmulud, nniɣ-d deg yiwet n tseddart:
Aṭas i yugin i yiṭij
Ad d-yenqer tagut n ṣṣdad
Dda Lmulud yezga am yirrij
D yid-sen ur iḥbis ttrad
Ikki (de)g uhuddu n lweqt uɛwij
S wawal ittnaɣ ur yugad
https://aghucaf.wordpress.com/2013/02/13/dda-lmulud-lmulud-at-m%CE%B5emmar/
Uɣaleɣ ɣer masin Uharun, nniɣ :
Nhedder ass-a s tfenṭazit
Neqqar-d ayen ur d-nenni
Awal nerfed-it s teqbaylit
Nessaweḍ-it nnig n yigenni
A Masin nuzen-ak-n talwit
Ad ak nini: “tanemmirt!!”
Imi tekkiḍ deg lebni.
https://aghucaf.wordpress.com/2010/11/02/tajmilt-i-masin-uharun/
Uɣaleɣ ɣer uneɣmas Saɛid muqbel, nniɣ :
Akka i iga Saɛid Muqbel
Yugi ad yeqbel
Ayen ur iqebbel leɛqel-is
Ɣef wakal n yiẓuran-is.
Taggara uwin-t d asfel
Idim-is yenɣel
D tafekka n Lwennas i nɣan
Tiktiwin-is ttcalint
Lemmwal-is yiwen i d-sɛan
S tmettant tura seftin-t
Yuɣal deg-neɣ d win yellan
Deg wul dima nettawi-t
https://aghucaf.wordpress.com/2012/06/20/a%C9%A3ewwa%C9%A3-le-rebelle
Tameddit n wass nnan-d yimḍebren n teddukliwin tidelsanin ad fakken tameɣra s ucennay Ul Leḥlu.