Yir tudert (Mal vie)
… Ilemẓiyen n tmurt-nneɣ ttheggin akk iman-nsen ad ḥergen
Leǧyub-iw ttseffiren
Akka kra yekka useggas
Mačči d rray i ixuṣṣen
D zher-iw i d amessas
Zhan wiyiḍ ttserrifen
Duru, nekk ttɣemmizeɣ-as
Mi uɣaleɣ d ttɛebga
Wwiɣ abrid n ḥerraga
Seg wass-nni akken i tgureb
Tilelli ur d-tezzi s axxam
Tidet, ssegren-tt tegrareb
Yeṭṭef lekteb algam
Agdud yelmed asqizzeb
Yettaɣ awal s “Wanɛam!”
Xerbent-iyi akk tirga
Ṭṭfeɣ abrid n ḥerraga
Ddunit tuɣal d asbelɛeṭ
I yelhan yuɣal diri-t
Azal, tewwi-t tibuhelt
Ɣef wayen temmeɣ teddem-it
Deg tqacuct yezga usxerweḍ
Yeɣli ugdud tinegnit
Ddunit am ta d lfinga
Nekk, ferneɣ lḥerraga
Tudert ur tesɛi azal
Seglalzen-tt tuɣal d ulac
S yidammen i nesway akal
Nmegger lerwaḥ s ulewwac
Tudert, qerḍen-tt am urgal
Tenger tenqelt tessewḥac
Imi lmut tezga tezga
Menyif tin n ḥerraga
Tamurt n yiwen n ddin
Heggzen Rebbi i nutni
D tinna kan i yettɛeddin
Tin-nniḍen ur telhi
Deg tqerracin la ttandin
I Ḥabibat irkelli
Lǧamaɛ neɣ tamesgida
Ddmeɣ tudert n ḤERRAGA.
… S yidammen i nesway akal Nmegger lerwaḥ s ulewwac