ⴰⵙⵜⴰⵢ ⴰⵎⵣⵔⴰⵢ ⵏ ⵍⵎⵖⵔⵉⴱ ⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ ⴰⵙⴳⴳⵯⴰⵙ ⵏ 2024
ⵜⴻⵜⵜⵢⴰⵡⵙⵜⴰⵢ ⵜⴳⵍⴷⵉⵜ ⵏ ⵍⵎⵖⵔⵉⴱ ⴰⴷ ⵜⵙⵙⵉⵅⴼ ⴰⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ ⵉ ⵓⵙⴳⴳⵯⴰⵙ 2024, ⴳ ⵓⵙⵜⴰⵢ ⵏⵏⴰ ⵉⵜⵜⵓⵙⴽⴰⵔⵏ ⴰⵙⵙ ⴰⴷ ⵏ ⵓⴽⵕⴰⵙ 10 ⵉⵏⵏⴰⵢⵔ 2024 ⴳ ⵊⵓⵏⵉⴼ.
ⵙⴳ 47 ⵏ ⵓⴳⵎⴰⵎ ⴳ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ, 30 ⵏ ⵓⴳⵎⴰⵎ ⵉⵙⵜⵉ ⵍⵎⵖⵔⵉⴱ, ⵎⵏⵉⴷ ⵏ 17 ⵏ ⵓⵙⵜⴰⵢ ⵉ ⵢⵉⴼⵔⵉⵇⵢⴰ ⵏ ⵢⵉⴼⴼⵓⵙ.
ⴷⴰ ⵉⵎⵎⴰⵍ ⵓⵙⵜⴰⵢ ⵏ ⵍⵎⵖⵔⵉⴱ ⴳ ⵜⵉⴽⴽⵍⵉⵜ ⵉⵣⵡⴰⵔⵏ ⴳ ⵓⵎⵣⵔⵓⵢ ⵏⵏⵙ, ⵉ ⵜⵏⵙⵙⵉⵅⴼⵜ ⵏ ⵓⵏⴳⵔⴰⵡ ⴰⴷ ⴰⵏⵎⵜⵜⴰⵏ ⵖⵓⵔ ⴰⵙⵡⵉⵔ ⵢⴰⵜⵜⵓⵢⵏ, ⴰⵙⵉⵙⵏ ⵙⴳ ⴷⴰⵔ ⵡⴰⵎⵓⵏ ⴰⴳⵔⴰⵖⵍⴰⵏ ⵙ ⵡⴰⴼⴰⵡ ⵏ ⵜⴰⵏⵏⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ – ⴰⴷ ⵜ ⵉⴼⵔⴳ ⵕⴱⴱⵉ – ⴳ ⵢⵉⴳⵔ ⵏ ⵓⴼⵔⴰⴳ ⴷ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⴳ ⵜⵉⵍⴰⵡⵜ, ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ – ⴰⴷ ⵜ ⵉⴼⵔⴳ ⵕⴱⴱⵉ- ⵉⵙⵜⵉ ⵍⵎⵖⵔⵉⴱ ⵙ ⵜⵡⵉⵍⴰ ⵓⵔ ⴳⵉⵙ ⵓⵖⵓⵍ ⴰⵙⵎⵀⵍ ⵏ ⵜⵏⵏⵓⴱⴹⴰ ⵏ ⵓⵙⵍⴳⵏ ⴷ ⵓⵣⵔⴰⴽ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵉⴼⴰⵡ ⵓⵙⵜⴰⵢ ⴰⴷ, ⵏⵏⴰ ⵉⴽⵛⵎⵏ ⴳ ⵓⴷⵓⵙⵜⵓⵔ ⵏ ⵓⵙⴳⴳⵯⴰⵙ 2011, ⵙⴳ ⵓⵙⵎⵉⵍⵍⵉ ⴰⵙⵓⵍⴰⵏ ⵖⵔ ⵉⵎⵓⴽⵏ ⵏⵏⴰ ⵉⵡⴰⵜⵜⵙⵏ ⴰⵙⴷⵓⵙ ⵏ ⵜⴷⵉⵎⵓⵇⵕⴰⵟⵉⵜ, ⴷ ⵉⵙⴽⵉⵍ ⴳⵔ ⵜⴰⴳⴳⴰⵢⵉⵏ, ⴷ ⵜⵣⵔⴼⵜ ⵜⴰⵏⴰⵎⵓⵏⵜ ⴷ ⵜⵙⴳⴰⵡⴰⵏⵜ, ⴷ ⵜⵉⵕⵡⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⵡⵉⵍⴰ ⵉⵙⵎⴷⵏ, ⴷ ⵜⴷⵔⴰⵡⵜ ⵜⴰⵖⵣⵓⵔⴰⵏⵜ, ⴷ ⵓⵙⵣⵎⵔ ⵏ ⵉⵄⵔⵔⵉⵎⵏ.
ⴰⵙⵜⴰⵢ ⵏ ⵜⴳⵍⴷⵉⵜ, ⵙ ⵜⵡⵉⵙⵉ ⵏ ⵓⵎⵢⴰⵣⴰⵔ ⵏ ⵜⵓⴳⵜ ⵏ ⵉⵡⴰⵏⴽⵏ ⵙⴳ ⵜⵙⴳⵉⵡⵉⵏ ⴰⴽⴽⵯ ⵏ ⵓⵎⴰⴹⴰⵍ, ⴷ ⵎⵇⵇⴰⵔ ⴰⵎⵓⵙⵙⵓ ⵏ ⴷⴷⵣⴰⵢⵔ ⴷ ⵢⵉⴼⴼⵓⴷ ⵏ ⵢⵉⴼⵔⵉⵇⵢⴰ ⴰⴷ ⴳⵉⵏ ⵎⴳⴰⵍ ⵏⵏⵙ, ⴷⴰ ⵉⵎⵎⴰⵍ ⵓⵍⴰ ⵜⴰⵎⵢⵉⵎⴰⵏⵜ ⴷ ⵜⴼⵍⵙⴰⵏⵜ ⵏⵏⴰ ⵉⵍⵍⴰⵏ ⴷⴰⵔ ⵜⵡⵓⵜⵉ ⵜⴰⴱⵕⵕⴰⵏⵜ ⵏ ⵍⵎⵖⵜⵉⴱ ⴷⴷⵓ ⵜⵉⵔⵉⵜ ⵜⴰⴳⵍⴷⴰⵏⵜ, ⴳ ⵢⵉⴼⵔⵉⵇⵢⴰ ⴷ ⴳ ⵓⴱⴰⵔⴰⵣ ⴰⴳⵔⴰⵖⵍⴰⵏ ⴷ ⴳ ⵓⴱⴳⵔⴰⵡ ⴰⴳⵜⵉⵔⴰⵏ.
ⵜⴱⵓⵔⵣ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙ ⵜⵡⵉⵙⵉ ⵜⵓⵖⵣⵉⵏⵜ ⴳ ⵓⴳⵯⵏⵙ ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⵍⴰⵡⴰⵏ ⴰⴽⴽⵯ ⴳ ⵜⵎⴳⴳⵉⵢⵉⵏ ⵜⵉⵏⴱⴷⴰⴷⵉⵏ ⵏ ⵓⵙⴱⵓⵖⵍⵓ ⵏ ⵓⵏⴳⵔⴰⵡ ⴰⴷ, ⵙ ⵜⵎⵢⵉⵎⴰⵏⵜ ⵏⵏⴰ ⴳⵉⵙ ⴳⴰⵏ, ⴷⴰ ⵜⵥⵕⵕⴰ ⴳ ⵓⵢⴰ ⵏⵏ ⵢⴰⵜ ⵜⵎⴰⵜⴰⵔⵜ ⵉⴷⵓⵙⵏ ⴷ ⵉⴽⴽⴰⵏ ⴷⴰⵔ ⵡⴰⵎⵓⵏ ⴰⴳⵔⴰⵖⵍⴰⵏ ⵙ ⵜⵖⴰⵔⴰⵙⵜ ⵏⵏⵙ ⵜⴰⵎⵚⴽⴰⵡⵜ ⴷ ⵜⵏⴰⵔⴰ ⵏⵏⵙ ⵜⴰⵎⵢⵉⵡⵏⵜ ⴳ ⵜⵎⵏⵜⴰⵍ ⵜⵉⴷⵙⵍⴰⵏⵉⵏ ⵣⵓⵏ ⴷ ⴰⵎⵙⴰⵡⴰⵍ ⵏ ⵉⵙⴳⴷⴰⵏ ⴷ ⵓⵎⵙⵓⵔⵓⴼ ⴷ ⵓⵙⴱⴷⴷⵉ ⵏ ⵓⴽⵙⴰⵏ ⵜⴰⵎⵙⵙⴰⵥⵓⵕⵜ ⴷ ⵓⵣⵔⴼ ⵏ ⵓⴼⴳⴰⵏ ⴳ ⵜⵡⵏⵏⴰⴹⵜ ⵉⴷⵓⵙⵏ ⴷ ⵉⵙⵓⵍⵏ ⴷ ⵉⵣⵔⴼⴰⵏ ⵏ ⵉⵎⵣⵡⴰⴳⵏ ⴷ ⵢⵉⴹⵉⵚ ⵏ ⵜⴰⵜⵉⴽⵏⵓⵍⵓⵊⵉⵜ ⵜⴰⵎⴰⵢⵏⵓⵜ.
ⴳ ⵜⵉⵣⵉ ⵏ ⵜⵏⵙⵙⵉⵅⴼⵜ ⵏⵏⵙ, ⵔⴰⴷ ⴱⴷⴷⴰ ⵜⵖⴰⵎⴰ ⵜⴳⵍⴷⵉⵜ ⴷ ⵜⴰⵎⵙⵓⴼⵓⵜ ⵉ ⵜⵖⴰⵔⴰⵙⵜ ⵏⵏⴰ ⵜⴹⴼⵕ ⴳ ⴽⵕⴰⴹ ⵉⵣⵎⴰⵣ ⵏⵏⵙ ⴳ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⴱⵔⵔⴽ ⴱⴷⴷⴰ ⵙ ⵓⵎⵙⴰⵡⴰⵍ ⴷ ⵓⵎⵙⵢⵉⵡⵏ ⴷ ⵓⵎⵙⴰⵙⴰ, ⵜⵖⵜⵙ ⴰⴹⴼⵓⵕ ⵏ ⵓⵙⴷⵓⵙ ⴰⵎⵙⵎⵓⵙⵙⵓ, ⵙ ⵓⵎⵢⴰⵡⴰⵙ ⴰⴽⴷ ⵉⴳⵎⴰⵎⵏ ⵏ ⵓⵙⵇⵇⵉⵎ, ⴷ ⵜⵔⵓⴱⴱⴰ ⴰⴽⴽⵯ ⵜⵉⵙⴳⴰⵡⴰⵏⵉⵏ, ⵉ ⵓⵙⴷⵓⵙ ⴷ ⵓⵙⵙⵏⵖⵔ ⵏ ⵓⵏⴳⵔⴰⵡ ⴰⴷ ⴰⵅⴰⵜⴰⵔ ⵙⴳ ⵓⵏⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ ⵉ ⵉⵣⵔⴼⴰⵏ ⵏ ⵓⴼⴳⴰⵏ.
ⴰⵙⵓⵖⵍ: ⵄⴱⴷⵍⵡⴰⵃⴷ ⴱⵓⵜⴱⴰⵖⴰ