ⵜⴰⴱⵔⴰⵜ ⵏ ⵓⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⵉ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵉⵕ
ⵢⵓⵣⵏ ⵎⴰⵙⵙ ⵕⴰⵛⵉⴷ ⵕⴰⵅⴰ, ⴰⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ, ⵜⴰⴱⵔⴰⵜ ⵉ ⵎⴰⵙⵙⴰ ⵍⴰⵟⵉⴼⴰ ⴰⵅⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵉⵕ ⴼ ⵓⵙⵏⵓⵃⵢⴰ ⵍⵍⵉ ⵙⴽⴰⵔⵏⵜ ⵜⴱⴰⴷⵓⵜⵉⵏ ⵜⵉⵏⴰⵎⵓⵔⵉⵏ ⵜⵉⴳⴷⵓⴷⴰⵏⵉⵏ ⵎⴳⴰⵍ ⵏ ⵜⵎⴰⵣⵉⵖⵜ ⴷ ⵜⴱⴰⴷⵓⵜ ⵏ ⵜⵎⴰⵣⵉⵖⵜ ⴷ ⵜⵔⴰⴱⴱⵓⵜ ⵜⴰⵏⵎⵓⵔⵜ ⵏ ⵜⴽⵓⵔⵜ.
ⵢⵉⵏⵉ ⵎⴰⵙⵙ ⵕⴰⵛⵉⴷ ⵔⴰⵅⴰ, ⵎⴰⵙ ⵢⵓⵣⵏ ⵓⵍⴰ ⵜⴰⴱⵔⴰⵜ ⵉ ⵜⴱⴰⴷⵓⵜ ⵏ ⴼⵕⴰⵏⵚⴰ 24, ⵢⵉⵏⵉ ⵎⴰⵙⴰ ⵙⴽⴰⵔⵏⵜ ⵜⴱⴰⴷⵓⵜⵉⵏ ⵜⵉⵏⴰⵎⵓⵔⵉⵏ ( ⵜⵉⵏ ⵜⵓⵏⵏⵓⵏⵜ, ⵜⴰⵎⵣⵡⴰⵔⵓⵜ, ⵜⵉⵙ ⵙⵏⴰⵜ, ⵎⵉⴷⵉ 1…) ⴰⵙⵏⵓⵃⵢⵓ ⵎⴳⴰⵍ ⵏ ⵉⵏⵎⵓⵔⴰⵏ ⴳ ⵍⵎⵖⵔⵉⴱ ⴷ ⵉⴼⵔⵉⵇⵢⴰ, ⵙ ⵓⵙⵏⵓⵎⵍ ⵍⵍⵉ ⵙⴽⴰⵔⵏ ⵉⵏⵖⵎⴰⵙⵏ ⵏ ⵜⵓⵏⵏⵓⵏⵜ ⴷ ⵉⴷ ⴱⴰⴱ ⵏ ⵓⵙⴼⵙⵉ ⵏ ⵜⵓⵏⵏⵓⵏⵜ ⴳ ⵜⴱⴰⴷⵓⵜⵉⵏ ⵏ ⵓⵛⴰⵎⵓⵛ ⴰⴳⴷⵓⴷⴰⵏ, ⵉ ⵜⵔⴰⴱⴱⵓⵜ ⵜⴰⵏⴰⵎⵓⵔⵜ ⵜⴰⵎⵖⵔⵉⴱⵉⵜ ⵉ ⵜⴽⵓⵔⵜ ⵏ ⵓⴹⴰⵕ ⵍⵍⵉ ⵎⵓ ⵜⵜⵉⵏⵉⵏ: “ⵜⴰⵔⴰⴱⴱⵓⵜ ⵜⴰⵄⵕⴰⴱⵜ”, ⵎⵇⵇⴰⵔ ⵓⵔ ⵜⴳⵉ ⵜⴳⵍⴷⵉⵜ ⵏ ⵍⵎⵖⵔⵉⴱ ⵜⴰⵎⴰⵣⵉⵔⵜ ⵜⴰⵄⵕⴰⴱⵜ ⵣⵓⵏ ⴷ ⵏⵉⵜ ⵜⵉⵎⵉⵣⴰⵔ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ, ⴷ ⵓⵔ ⵔⴰⴷ ⵜⴳ ⵖⵎⴽ ⴰⵏⵏ, ⴰⵔ ⵉⵜⵜⵉⵏⵉ ⵓⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ.
ⵢⵉⵏⵉ ⵓⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ, ⵎⴰⵙ ⵣⵣⵉⴳⵣⵏ ⵉⵏⵖⵎⴰⵙⵏ ⵉⵎⴰⵏⵏⵓⵏⵏ ⴳ ⵜⴱⴰⴷⵓⵜⵉⵏ ⵜⵉⵏⴰⵎⵓⵔⵉⵏ ⴳ ⵓⵙⵏⵓⵎⵍ ⵏ ⵜⵔⴰⴱⴱⵓⵜ ⵜⴰⵏⴰⵎⵓⵔⵜ ⵏ ⵜⵓⵡⵊⵊⴰ ⵏ ⵓⴹⴰⵕ ⴷ ⵜⵔⴰⴱⴱⵓⵜ ⵜⴰⵄⵕⴰⴱⵜ, ⵎⵇⵇⴰⵔ ⵉⵙⵙⵏ ⴽⵓⵢⴰⵏ ⵎⴰⵙ ⴷ ⵜⵉⵕⵓⴱⴱⴰ ⵜⴰⵄⵕⴰⴱⵉⵏ ⵏ ⵜⵉⴷⵜ ⵙⴳ ⵓⵎⵏⵥⴰⵡ ⵏ ⴰⵙⵢⴰ ⴳⴰⵏⵜⵜⵏ ⵇⴰⵟⴰⵕ ⴷ ⵙⵙⴰⵄⵓⴷⵉⵢⵢⴰ ⵍⵍⵉ ⴹⵕⵏⵉⵏ ⴳ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ, ⴰⵎⵎⴰ ⵍⵎⵖⵔⵉⴱ ⴷ ⵙⵙⵉⵏⵉⴳⴰⵍ ⴷ ⵍⴽⴰⵎⵉⵕⵓⵏ ⴷ ⵖⴰⵏⴰ ⴷ ⵜⵓⵏⵙ ⵀⴰⵜⵉ ⴳⴰⵏ ⵜⵉⵔⵓⴱⴱⴰ ⵜⵉⴼⵔⵉⵇⵉⵢⵉⵏ ⵙⴳ ⵓⵎⵏⵥⴰⵡ ⵏ ⵉⴼⵔⵉⵇⵢⴰ, ⵜⵉⵥⴹⵉⵕ ⵜⵔⴰⴱⴱⵓⵜ ⵜⴰⵎⵖⵔⵉⴱⵉⵜ ⵜⴰⵏⴰⵎⵓⵔⵜ ⴰⴷ ⵜⵍⴽⵎ ⴰⵎⴽⴽⵓⵥ ⵏ ⵡⵓⵔⵖ ⵏ ⵓⵖⵔⵔⴰⴼ ⵏ ⵓⵎⴰⴹⴰⵍ ⵏ 2022 ⴳ ⵇⴰⵟⵕ ( ⴷ ⵓⵏⴰⵔⵓⵣ ⴰⴷ ⵢⴰⵡⵉ ⴰⵖⵔⵔⴰⴼ ⵏ ⵓⵎⴰⴹⴰⵍ), ⵉⴳ ⴰⴳⵏⵙⴰⵙ ⵏ ⵎⴰⵕⵕⴰ ⵏ ⵉⵎⵖⵔⵉⴱⵉⵢⵏ ⴳ ⵓⴳⵯⵏⵙ ⵓⵍⴰ ⴳ ⴱⵕⵕⴰ ⵏ ⵜⵎⴰⵣⵉⵔⵜ, ⴷ ⵎⴰⵕⵕⴰ ⵏ ⵉⵎⴰⵣⵉⵖⵏ, ⴷ ⵉⵥⵥⵍⵎⴹ ⵏ ⵉⴼⵔⵉⵇⵢⴰ, ⴷ ⵎⴰⵔⵔⴰ ⵏ ⵉⴼⵔⵉⵇⵉⵢⵏ ⵍⵉⵖ ⵉⴳⴰ ⴰⴳⵯⵏⵙⴰⵙ ⵏ ⵓⵎⵏⵥⴰⵡ ⵏ ⵉⴼⵔⵉⵇⵢⴰ.
ⵢⵉⵏⵉ ⵓⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⵎⴰⵙ ⴷ ⵉⵇⵇⴰⵏ ⴼ ⵉⵏⵖⵎⴰⵙⵏ ⴰⴷ ⴰⴷ ⵙⴰⵡⵍⵏ ⴼ ⵓⵙⵏⴰⵍ ⵏ ⵜⴰⵢⵔⵉ ⵉⵚⴰⵃⴰⵏ ⵉ ⵜⵔⴰⴱⴱⵓⵜ ⵏⵏⵖ ⵜⴰⵏⴰⵎⵓⵔⵜ ⵙⴳ ⵉⵡⴰⵏⴽⵏ ⴰⵄⵕⴰⴱⵏ ⵉⵎⴷⴷⵓⴽⴽⵯⴰⵍ ⴳ ⴰⵙⵢⴰ, ⵖ ⵏⵉⵜ ⵍⵍⴰⵏ ⵉⵎⴰⴷⴰⵏⵏ ⵏ ⴼⴰⵍⵉⵙⵟⵉⵏ ⴷ ⵉⵙⵕⴰⵉⵍ, ⴰⵢⵍⵍⵉ ⵙ ⵏⵉⵜ ⵏⵙⴱⵔⵔⴽ ⵢⵉⵏⵉ ⵓⵎⵖⴰⵔ ⵏ ⵓⵎⴰⴹⵍⴰⵏ ⴰⵎⴰⵣⵉⵖ ⵉⵍⵍⴰⵏ ⴷ ⵓⵙⵏⴰⵍ ⵏ ⵜⵔⴰⴱⴱⵓⵜ ⵜⴰⵏⴰⵎⵓⵔⵜ ⵜⴰⵎⵖⵔⵉⴱⵉⵜ. ⴳ ⵓⵎⵃⵉⵣⵡⴰⵔ ⴷ ⴼⵕⴰⵏⵚⴰ, ⵢⵉⵡⵉ ⵍⵎⵖⵔⵉⴱ ⵓⵍⴰ ⴰⵙⵙⵔⵇⴱ ⴷ ⵓⵙⵏⴰⵍ ⵏ ⵉⵎⴰⴷⴰⵏⵏ ⵉⵎⴰⵙⵉⵃⵉⵢⵏ ⴳ ⴱⵕⵉⵟⴰⵏⵢⴰ ⴷ ⴱⵉⵍⵊⵉⴽⴰ ⴷ ⵀⵓⵍⴰⵏⴷⴰ ⴷ ⵚⴱⴰⵏⵢⴰ ⴷ ⴱⵔⵜⵇⵇⵉⵣ ⴷ ⵉⵟⴰⵍⴰⵢ ⴷ ⵎⴰⵔⵉⴽⴰⵏ ⴷ ⵡⵉⵢⵢⴰⴹ…ⴰⵛⴽⴰ ⵜⴰⵔⴰⴱⴱⵓⵜ ⵏⵏⵖ ⵜⴳⴰ ⵜⴰⴼⵔⵉⵇⵉⵜ.
ⵢⵉⵏⵉ ⵎⴰⵙⵙ ⵕⴰⵛⵉⴷ ⵕⴰⵅⴰ ⵎⴰⵙ ⵜⵜⵓⵙⵙⴰⵏ ⵜⵔⴰⴱⴱⵓⵜ ⵜⴰⵏⴰⵎⵓⵔⵜ ⵜⴰⵎⵖⵔⵉⴱⵉⵜ ⵏ ⵜⵓⵡⵊⵊⴰ ⵏ ⵓⴹⴰⵕ ⵜⵉⴽⴽⵍⵉ ⴰⴷ ⵙ ⵜⵡⵡⵓⵔⵉ ⵏⵏⵙ ⵉⵥⵉⵍⵏ ⵍⵍⵉ ⴳⴰⵏⵉⵏ ⵉⵎⴰⵣⵉⵖⵏ ⵏⵖ ⴰⵔ ⵙⴰⵡⴰⵍⵏ ⵜⴰⵎⴰⵣⵉⵖⵜ ⵏⵖ ⴰⵔ ⵙⴰⵡⴰⵍⵏ ⴷⴷⴰⵔⵉⵊⴰ, ⵙⵍⵡⴰⵏ ⴰⴽⴽⵯ ⵡⵉⵍⵍⵉ ⴳⴰⵏⵉⵏ ⵙⴳ ⵜⵙⴳ ⵜⵙⴳⴰ ⵏ ⵔⵔⵉⴼ ⴰⵅⴰⵜⴰⵔ ⴰⵎ ⵢⴰⵙⵉⵏ ⴱⵓⵏⵓ (ⵜⴰⵡⵏⴰⵜ), ⵎⵓⵏⵉⵔ ⵎⵃⴰⵎⴷⵉ (ⵎⵍⵉⵍⵉⵢⵢⴰ), ⵏⴰⵚⵕ ⵎⵣⵔⴰⵡⵉ (ⵜⵉⵟⵟⴰⵡⵉⵏ), ⵕⵓⵎⴰⵏ ⵙⴰⵢⵙ (ⵏⵏⴰⴹⵓⵕ), ⵃⴰⴽⵉⵎ ⵣⵉⵢⵢⴰⵛ (ⴱⵔⴽⴰⵏ), ⵉⵍⵢⴰⵙ ⵛⵛⵄⵉⵔ (ⵟⴰⵏⵊⴰ), ⵣⵣⵔⵣⵓⵔⵉ (ⵡⴰⵊⴷⴰ), ⴰⵛⵕⴰⴼ ⵃⴰⴽⵉⵎⵉ (ⵡⴰⴷⵣⵎ)…ⵉⴳⴰ ⵓⵍⴰ ⵓⵎⵙⵙⴰⵏⵓⵏ ⵡⴰⵍⵉⴷ ⵔⵔⴳⵔⴰⴳⵉ ⵙⴳ ⵍⴼⵏⵉⴷⵇ, ⵉⴳ ⵓⵏⵙⵙⵉⵅⴼ ⵏ ⵜⴼⵉⴷⵉⵕⴰⵍⵉⵜ ⵜⴰⵎⵖⵔⵉⴱⵉⵜ ⵏ ⵜⵓⵡⵊⵊⴰ ⵏ ⵓⴹⴰⵕ ⴼⴰⵡⵣⵉ ⵍⵇⵊⵄ ⵙⴳ ⴱⵔⴽⴰⵏ, ⵏⵜⵜⴰⵏ ⴰⴷ ⵉⵙⵙⵔⵇⴱⵏ ⵉⵎⴰⵔⵓⵔⵏ ⵏ ⵜⵔⴰⴱⴱⵓⵜ ⵜⴰⵏⴰⵎⵓⵔⵜ ⵜⴰⵎⵖⵔⵉⴱⵉⵜ ⴳ ⵓⵎⵢⴰⵡⴰⴹ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⴽⴷ ⵉⵏⵖⵎⴰⵙⵏ ⵍⵍⵉⵖ ⵓⴼⴰⵏ ⵜⵉⵎⵓⴽⵔⵉⵙⵉⵏ ⵅⴰⵜⵔⵏⵉⵏ ⴳ ⵓⵎⵢⴰⵡⴷ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴷ ⴷⴷⴰⵔⵉⵊⴰ.
ⵉⵙⴰⵡⵍ ⵓⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⵓⵍⴰ ⴼ ⵓⵙⵏⵓⵃⵢⵓ ⵎⴳⴰⵍ ⵏ ⵉⵏⵖⵎⴰⵙⵏ ⴳ ⵜⴱⴰⴷⵓⵜ ⵏ ⵜⵎⴰⵣⵉⵖⵜ ⵍⵍⵉ ⵓⵔ ⴼⵜⵉⵏⵉⵏ ⵙ ⵓⴱⴰⵔⴰⵣ ⴳ ⵓⵣⵎⵣ ⴰⴷ ⴰⵎⵣⵔⴰⵢ ⵃⵎⴰ ⴰⴷ ⴰⵡⵉⵏ ⵉⵏⵖⵎⵉⵙⵏ ⵏⵢⵉⵍⴽⵉⵎⵏ ⵓⵍⴰ ⴰⴽⴷ ⵉⵎⴰⵔⵓⵔ ⵏ ⵜⵔⴰⴱⴱⵓⵜ ⵜⴰⵏⴰⵎⵓⵔⵜ ⵃⵎⴰ ⴰⴷ ⵙⴰⵡⵍⵏ ⵙ ⵜⵍⴻⵍⵍⵉ ⴷ ⵓⴼⵔⴰ ⵙⴰⵡⵍⵏ ⴼ ⵉⵙⵢⴰⴼⴰⵜⵏ ⵏⵏⵙ, ⵏⵢⵉⵍⴽⵉⵎⵏ ⴷ ⵓⴳⴷⵓⴷ ⴳ ⵜⵙⴳⴳⵉⵡⵉⵏ ⵜⵉⵎⴰⵣⵉⵖⵉⵏ ⴳ ⵜⵎⴰⵣⵉⵔⵜ ⵏⵏⵙⵏ ⵜⴰⵎⵣⵡⴰⵔⵓⵜ ⵙ ⵜⵓⵜⵍⴰⵢⵜ ⵏⵏⵙⵏ ⵜⴰⵎⴰⵣⵉⵖⵜ.
ⵢⵉⵏⵉ ⵎⴰⵙⵙ ⵕⴰⵛⵉⴷ ⵕⴰⵅⴰ ⵉ ⵎⴰⵙⵙⴰ ⴰⵅⵔⴱⴰⵛ ⵎⴰⵙ ⵉⵍⵍⴰ ⵓⵙⵜⴰⵢ ⵏⵏⵙ ⴷ ⵜⵏⵙⵙⵉⵅⴼⵜ ⵏ ⵜⴳⵔⴰⵡⵉⵏ ⵜⵉⵎⴰⴷⴷⴰⵙⵉⵏ ⵏ ⵓⵎⵢⴰⵡⴰⴹ ⴰⴼⵔⵉⵇⵉ ⴳ 23 ⵛⵓⵜⴰⵏⴱⵉⵔ ⵙ ⵜⵙⵓⴳⴰⵔ ⵍⵍⵉ ⴷⴰⵔⵙ ⵉⵍⵍⴰⵏ ⴳ ⵢⵉⴳⵔ ⴰⴷ, ⵜⴳ ⵜⵉⴷⵜ ⵙⴳ ⵜⵔⵙⴰⵍ ⵏ ⵜⵏⵖⵎⴰⵙⵜ ⴷ ⵓⵙⴱⴷⴷⵉ ⵏ ⵉⵏⵖⵎⵉⵙⵏ ⴳⴰⵏⵉⵏ ⵜⵉⴽⵔⴽⴰⵙ ⴷ ⵓⵙⵎⵏⵉⴷ ⵏ ⵉⵏⵖⵎⵉⵙⵏ ⵏ ⵓⵙⵖⵣⵏ, ⵎⴰⵅⵅ ⵉⵖ ⴰ ⵜⵜⵉⵏⵉⵏ ⵉⵏⵖⵎⵉⵙⵏ ⵏ ⵜⵎⴰⵣⵉⵔⵜ ⵏⵏⵖ ⵎⴰⵙ ⴳⴰⵏ ⵉⵎⵣⴷⴰⵖⵏ ⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⴰⵄⵕⴰⴱⵏ ⵣⴷⵖⵏⵉⵏ ⴳ “ⵍⵎⵖⵔⵉⴱ ⴰⵄⵕⴰⴱⴰⴱ”, ⵖⵎⴽ ⴰⵏⵏ ⴰⴼ ⵓⵔ ⵟⵟⴰⴼⵏ ⵜⵉⴷⵜ ⵜⴰⵎⵣⵔⴰⵢⵜ ⴷ ⵜⵉⴷⵜ ⵜⴰⵎⴰⵙⵙⴰⵏⵜ ⵉⵍⵍⴰⵏ ⴳ ⵓⴷⵓⵙⵜⵓⵔ ⴰⵎⵖⵔⵉⴱⵉ ⵏ 1 ⵢⵓⵍⵢⵓⵣ 2011.
ⵙ ⵓⵖⵉⵍⵓⴼ, ⵎⵎⴰⵖⵏ ⴽⵉⴳⴰⵏ ⵏ ⵉⵏⵖⵎⴰⵙⵏ ⵉⵎⵖⵔⵉⴱⵉⵢⵏ ⴳ ⵜⵏⵖⵎⴰⵙⵜ ⵏ ⵓⴼⵔⴽⵓⴽ ⵓⵍⴰ ⵜⴰⵍⵉⴽⵟⵕⵓⵏⵉⵜ ⴰⵎⵎ ⵀⵉⵙⴱⵔⵉⵙ ⴷ ⵍⴰⵅⴱⴰⵔ ⴷ ⵚⵚⴰⴱⴰⵃ ⴷ ⵡⵉⵢⵢⴰⴹ…ⴳ ⵓⵙⵎⵖⵔ ⵏ ⵜⴽⵔⴽⴰⵙ ⴰⴷ ⵍⵍⵉ ⵙⵏⴰⵍⵏ ⵉⴷ ⴱⴰⴱ ⵏ ⵓⵎⵣⵔⵓⵢ ⴰⵄⵕⴰⴱⵏ ⵍⵍⵉ ⵙⵡⵓⵔⵉⵏⵉⵏ ⴰⵥⴰⵕ ⵏ ⵉⵎⴰⵣⵉⵖⵏ ⵙ ⵜⴳⵣⵉⵔⵜ ⵏ ⵡⴰⵄⵕⴰⴱⵏ, ⵍⵍⵉ ⴷ ⵓⵛⴽⴰⵏⵉⵏ ⵙ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⵙⴳ ⵍⵢⴰⵎⴰⵏ ⵙ ⵜⵖⴰⵔⴰⵙⵜ ⵏ ⵢⵉⵍ ⴰⵥⴳⴳⵯⴰⵖ. ⵎⵇⵇⴰⵔ ⴷ ⵉⵡⵉⵏⵜ ⵜⵣⵔⴰⵡⵉⵏ ⵜⵢⵓⵏⵜⵔⵓⴱⵓⵍⵓⵊⵉⵢⵉⵏ ⵜⵉⵜⵔⴰⵔⵉⵏ ⵎⴰⵙ ⵓⵔ ⵉⴳⵉ ⵎⴰ ⴰⵏⵏ ⵜⵉⴷⵜ, ⵍⵍⵉⵖ ⴳⴰⵏ ⵉⵙⴰⵄⵓⴷⵉⵢⵏ ⴷ ⵉⵢⴰⵎⴰⵏⵉⵢⵏ ⴷ ⵉⴱⵉⵔⵉⵢⵏ ⴷ ⵉⵎⵣⴷⴰⵖⵏ ⵏ ⵉⴼⴼⵓⵙ ⵏ ⵉⵟⴰⵍⵢⴰ ⴷ ⵜⴳⵣⵉⵔⵉⵏ ⵏ ⵢⵉⵍ ⵓⵎⵍⵉⵍ ⴰⵏⴰⵎⵎⴰⵙ ⵖ ⴷ ⵜⵖⵔⵎⴰ ⵏ ⵉⴼⵔⵄⵓⵏⵏ ⴳ ⵎⵉⵚⵕ, ⵎⴰ ⵢⴰⴷ ⴰⴷ ⵉⵡⵉⵏ ⵉⵡⴰⴼⵉⵜⵏ ⵏ ⵉⴷⵔⵉⵣⵏ ⴳ ⵡⴰⴽⴰⵍ ⵏ ⵉⵎⴰⵣⵉⵖⵏ ⴳ ⵓⴷⵖⴰⵔ ⵏ ⵉⵖⵓⴷ ⵍⵍⵉ ⵉⵜⵜⵢⵓⴼⴰ ⵓⴼⴳⴰⵏ ⴰⵇⴱⵓⵔ ⴳ ⵓⵎⴰⴹⴰⵍ ⵍⵍⵉ ⴷⴰⵔ 315000 ⵏ ⵓⵙⴳⴳⵯⴰⵙ, ⵜⴰⵡⴰⴼⵉⵜ ⵍⵍⵉ ⵏⴻⵏⵏⵓⵔⵣ ⴰⴷ ⵜⴳ ⴰⵢⴷⴰ ⴰⵎⴰⴹⵍⴰⵏ ⵍⵍⵉ ⵙ ⵜⵙⵙⵏ ⵜⵎⴰⴷⴷⴰⵙⵜ ⵏ ⵢⵓⵏⵉⵙⴽⵓ, ⴰⵢⵍⵍⵉ ⵉⴳⴰⵏ ⵜⵓⵜⵔⴰ ⵉ ⵎⴰⵙⵙⴰ ⵓⴷⵔⵉ ⴰⵥⵓⵍⴰⵢ ⴳ ⵜⵙⵓⵜⵍⵜ ⵜⵉⵙ 17 ⵏ ⵜⵙⵇⵇⵉⵎⵜ ⵜⵓⵏⴱⵉⴹⵜ ⵜⴰⴳⵔⴰⵖⵍⴰⵏⵜ ⵏ ⵓⴼⵔⴰⴳ ⵏ ⵡⴰⵢⴷⴰ ⴷⵍⵙⴰⵏ ⴰⵔⴽⵎⴰⵎ ⵉⵍⵍⴰⵏ ⵙⴳ 28 ⵏⵓⵡⴰⵏⴱⵉⵔ ⴰⵔ 3 ⴷⵓⵊⴰⵏⴱⵉⵔ ⴳ ⵕⵕⴱⴰⵟ.
ⴳ ⵜⴳⵉⵔⴰ, ⵉⵜⵜⵔ ⵓⵎⵖⴰⵔ ⵏ ⵓⴳⵔⴰⵡ ⴰⵎⴹⵍⴰⵏ ⴰⵎⴰⵣⵉⵖ ⴳ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴷ ⴰⵙⵍⵉⵥⵉⵕ ⴰⴷ ⵏⵏ ⵜⴳ ⵜⵓⴳⴳⵯⴰⵙ ⵏⵏⵙ ⵃⵎⴰ ⴰⴷ ⵙⵎⵔⵙⵏ ⵉⵏⴱⴷⴰⴷⵏ ⵏ ⵜⴱⴰⴷⵓⵜⵉⵏ ⵜⵉⵏⴰⵎⵓⵔⵉⵏ ⵏ ⵜⵏⵣⵡⴰⵢⵜ ⴷ ⵜⵉⵍⵉⴼⵉⵣⵢⵓⵏ ⵜⵉⴳⵓⵔⵉⵡⵉⵏ ⵏ ⵜⵉⴷⵜ ⴷ ⵜⵉⵏ ⵜⵉⵍⴰⵡⵜ ⴳⴰⵏⵉⵏ ⵜⵉⵏ ⵓⵎⵣⵔⵓⵢ, ⴷ ⴰⴷ ⵓⵔ ⵜⵜⵉⵏⵉⵏ ⵜⵉⴳⵓⵔⵉⵡⵉⵏ ⴰⵎ: ⵜⴰⵔⴰⴱⴱⵓⵜ ⵜⴰⵄⵕⴰⴱⵜ, ⵍⵎⵖⵔⵉⴱ ⴰⵄⵕⴰⴱ, ⵜⴰⵎⵜⵜⵉ ⵜⴰⵄⵕⴰⴱⵜ, ⵜⴰⴼⵙⵓⵜ ⵜⴰⵄⵕⴰⴱⵜ…ⵍⵍⵉ ⴳⴰⵏⵉⵏ ⵎⴳⴰⵍ ⵏ ⵜⵎⴰⴳⵉⵜ ⵏ ⵜⵎⴰⴳⵉⵜ ⴷ ⵓⴷⴷⵓⵔ ⵏ ⵉⴷ ⵍⵎⵏⴰⵢⵏ ⵏⴻⵏⵏⵓⵔⵣ, ⵢⵉⵏⵉ ⵓⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ, ⵉⵇⵇⴰⵏ ⴷ ⴰⴷ ⵏⵙⵎⵔⴰⵙ ”ⵍⵎⵖⵔⵉⴱ ⴰⵅⴰⵜⴰⵔ” ⴳ ⵓⴷⵖⴰⵔ ⵏ ”ⵍⵎⵖⵔⵉⴱ ⴰⵄⵕⴰⴱ” ⴷ “ⵜⴰⴷⵉⵎⵓⵇⵕⴰⵟⵉⵜ ⵏ ⵉⵎⴰⴷⴰⵏⵏ” ⴳ ⵓⴷⵖⴰⵔ ⵏ ”ⵜⴼⵙⵓⵜ ⵜⴰⵄⵕⴰⴱⵜ”, ⴰⵢⵍⵍⵉ ⵏⵉⵜ ⵉⵍⵍⴰⵏ ⴳ ⵜⴳⵔⴰⵡⵍⵍⴰ ⵏ ⵍⵢⴰⵙⵎⵉⵏ ⴳ ⵜⵓⵏⵙ ⴳ 17 ⴷⵓⵊⴰⵏⴱⵉⵔ 2010 ⴷ ⵜⴳⵔⴰⵡⵍⵍⴰ ⵏ ⵍⵉⴱⵢⴰ ⴳ 17 ⴱⵕⴰⵢⵕ ⴷ 20 ⴱⵕⴰⵢⵕ ⴳ ⵍⵎⵖⵔⵉⴱ ⴷ 25 ⴱⵕⴰⵢⵕ ⴳ ⵎⵉⵚⵕ 2011 ⴷ 22 ⴱⵕⴰⵢⵔ 2019 ⴳ ⴷⵣⴰⵢⵔ, ⴳ ⵡⴰⴽⴰⵍ ⵏ ⵉⵎⴰⵣⵉⵖⵏ ⵏⵖ ⵜⴰⵎⴰⵣⵖⴰ ⵏⵖ ⵉⵥⵥⵍⵎⴹ ⵏ ⵉⴼⵔⵉⵇⵢⴰ.