ⵉⵕⵥⵎ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⵓⵏⵖⵉⵍⵜ ⵜⴰⵎⴰⵣⵉⵖⵜ ⵏ ⵓⵙⵉⵜ ⵏⵏⵙ ⴰⵍⵉⴽⵟⵕⵓⵏⵉ
ⵉⵕⵥⵎ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵙⵙ ⵏ 18 ⴽⵜⵓⴱⵕ 2021, ⵜⵓⵏⵖⵉⵍⵜ ⵜⴰⵎⴰⵣⵉⵖⵜ ⵏ ⵓⵙⵉⵜ ⵡⵉⴱ ⵏⵏⵙ ⴰⵍⵉⴽⵟⵕⵓⵏⵉ. ⵔⴰⴷ ⵜⴼⴽ ⵜⵓⵏⵖⵉⵍⵜ ⴰⴷ ⵉ ⵉⵏⵣⵔⴰⴼ ⵏ ⵓⵙⵉⵜ ⴰⵣⵎⵣ ⵏ ⴰⴳⴳⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵅⴼ ⵡⵓⵎⵍⴰⵏ ⴰⴽⴽⵡ ⵙⴳ ⵉⵙⵉⵡⴹⵏ, ⵜⴰⵏⴰⴹⵉⵏ, ⵜⵉⵖⵓⵔⵉⵡⵉⵏ ⴷ ⵓⵢⵏⵏⴰ ⵉⵣⴷⵉⵏ ⴷ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ.
ⵜⵓⵙⴰ ⴷ ⵜⵙⵏⵜⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵉ ⵓⵙⵎⵀⵍ ⵏ ⵢⵉⵜⵍⵉ ⵓⵏⵚⵉⴱ ⵏ ⵜⵎⴰⵣⵉⵖⵜ ⵉⵙ ⵜⴳⴰ ⵜⵓⵜⵍⴰⵢⵜ ⵜⵓⵏⵚⵉⴱⵜ ⵏ ⵜⴳⵍⴷⵉⵜ ⴷ ⵜⵢⴰⴼⵓⵜ ⵉⵛⵛⴰⵔⵏ ⵉ ⵉⵎⵖⴰⵔⴰⴱⵉⵢⵏ ⴰⴽⴽⵡ, ⴷⵉⵖ ⵉ ⵓⵙⵎⵀⵍ ⵏ ⵉⵍⵓⴳⵏⵏ ⵏ ⵜⵎⵜⵜⴰ 26 ⵙⴳ ⵓⵙⵍⴳⵏ ⵓⵟⵟⵓⵏ 26.16 ⵏⵏⴰ ⴷ ⵢⵉⵡⵉⵏ ⵅⴼ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⴰⵙⴳⴰ ⵏ ⵜⵓⵜⵍⴰⵢⵜ ⵜⴰⵄⵔⴰⴱⵜ ⴳ ⵉⵙⵉⵜⵏ ⵉⵍⵉⴽⵟⵕⵓⵏⵉⵢⵏ ⵏ ⵉⵏⵖⵎⵉⵙⵏ ⵏ ⵜⵎⵙⵙⵓⴳⵓⵔⵉⵏ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵜⴳⵔⴰⵡⵉⵏ ⵜⵉⵎⵓⵔⴰⵏⵉⵏ ⴷ ⵜⵏⴰⴼⵓⵜⵉⵏ ⵜⵉⴳⴷⵓⴷⴰⵏⵉⵏ ⵢⴰⴹⵏ.
ⴰⴷ ⵏⵙⵙⴽⵜⵉ ⵉⵙ ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴽⵉⴳⴰⵏ ⵏ ⵜⵙⵏⵜⴰⵢⵉⵏ ⵏⵏⴰ ⵙⵙⴰⵜⵉⵏⵜ ⵜⵎⵜⵜⵉⵡⵉⵏ 32, 27, 26, 13, 2 ⵙⴳ ⵓⵙⵍⴳⵏ 26.16 ⵉⵣⴷⵉⵏ ⴷ ⵓⵙⵡⵓⵜⵜⵓ ⵏ ⵜⵉⴽⵍⵉⵡⵉⵏ ⵏ ⵓⵙⵎⵀⵍ ⵏ ⵢⵉⵜⵍⵉ ⵓⵏⵚⵉⴱ ⵏ ⵜⵎⴰⵣⵉⵖⵜ ⴷ ⵜⵖⴰⵔⴰⵙⵉⵏ ⵏ ⵓⵙⵉⴷⴼ ⵏⵏⵙ ⴳ ⵢⵉⴳⵔⴰⵏ ⵏ ⵓⵙⵍⵎⴷ ⴷ ⵢⵉⴳⵔⴰⵏ ⵏ ⵜⵓⴷⵔⵜ ⵜⴰⵎⴰⵜⴰⵢⵜ ⵙ ⵓⵢⵏⵏⴰ ⵉⵍⵍⴰⵏ ⴳ ⵉⵍⵓⴳⵏⵏ ⵏ ⵓⴳⵣⵣⵓⵎ ⵡⵉⵙⵙ ⵙⵎⵎⵓⵙ ⵏ ⴷⴷⵓⵙⵜⵓⵔ ⵣⵓⵏⴷ ⵜⵉⵔⵔⴰ ⵏ ⵜⴰⵏⴰⴹⵉⵏ ⴷ ⵜⵏⵎⵎⴰⵍⵉⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⴰⵙⴳⴰ ⵏ ⵜⵓⵜⵍⴰⵢⵜ ⵜⴰⵄⵔⴰⴱⵜ, ⴰⵙⵡⵓⵔⵉ ⵏ ⵜⵎⴰⵣⵉⵖⵜ ⴳ ⵜⴼⵍⵡⵉⵏ ⵏ ⵜⵎⵓⵍⵉ ⵙ ⵉⵙⴱⴷⴰⴷⵏ ⵉⵣⵣⵓⵍⴰⵏⵏ, ⴰⵙⵔⵔⵓⵙ ⵏ ⵓⵖⴰⵡⴰⵙ ⴰⵎⵙⴽⵔ ⵏⵏⴰ ⵉⵙⵙⴽⵏⵏ ⵜⴰⵖⴰⵔⴰⵙⵜ ⵏ ⵓⵙⵎⵀⵍ ⵏ ⵢⵉⵜⵍⵉ ⵓⵏⵚⵉⴱ ⵏ ⵜⵎⴰⵣⵉⵖⵜ ⵙ ⵜⵜⴰⵡⵉⵍ ⴳ ⵢⵉⴳⵔⴰⵏ ⵉⵣⴷⵉⵏ ⴷ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.