ⴰⵙⵎⵖⵔ ⵏ ⵎⴰⵙⵙⴰ ⵍⴰⵢⵍⴰ ⵎⵣⵢⴰⵏ ⴱⵏ ⵊⵍⵍⵓⵏ ⴳ ⵏⵏⴰⴹⵓⵕ
ⵔⴰⴷ ⵉⵙⵎⵖⵔ ⵡⴰⵎⵎⴰⵙ ⵏ ⵜⵎⴽⵯⵜⵉⵜ ⵉⵛⵛⴰⵔⵏ ⵉ ⵜⴷⵉⵎⵓⵇⵔⴰⵟⵉⵜ ⴷ ⵓⴼⵔⴰ ⵎⴰⵙⵙⴰ ⵍⴰⵢⵍⴰ ⵎⵣⵢⴰⵏ ⴱⵏ ⵊⵍⵍⵓⵏ, ⴰⵙⵙ ⵏ ⵡⴰⵢⵏⴰⵙ 15 ⵏⵓⵡⴰⵏⴱⵉⵔ 2021 ⵙ ⵜⵎⵍⴷⴰ ⵏ ⵓⵕⵥⵥⵓⵎ ⵏ ⵜⵙⵓⵜⵍⵜ ⵜⵉⵙ ⵎⵔⴰⵡⵜ ⵏ ⵓⵏⵎⵓⵇⵇⴰⵔ ⵏ ⵏⵏⴰⴹⵓⵕ ⴰⴳⵔⴰⵖⵍⴰⵏ ⵉ ⵙⵙⵓⵍⵉⵎⴰ ⴷ ⵜⵎⴽⵯⵜⵉⵜ ⵉⵛⵛⴰⵔⵏ.
ⵉⴳⴰ ⵓⵙⵎⵖⵔ ⴰⴷ ⴰⵙⵓⵜⴳ ⵏ ⵜⵓⴳⴳⴰⵙ ⵏ ⵎⴰⵙⵙⴰ ⵍⴰⵢⵍⴰ ⵎⵣⵢⴰⵏ ⴱⵏ ⵊⵍⵍⵓⵏ ⴳ ⵓⵎⵏⵉⴷ ⵏ ⵓⵙⴷⵓⵙ ⵏ ⵜⵓⵜⵍⴰⵢⵜ ⴷ ⵜⴷⵍⵙⴰ ⵜⴰⵎⴰⵣⵉⵖⵜ, ⵖⵎⴽ ⴰⵏⵏ ⴷ ⵓⵙⵎⵖⵔ ⵏ ⵜⵡⴰⴷⴰ ⵏⵏⵙ ⵜⴰⵣⵣⵓⵍⴰⵏⵜ ⵉⴳⴰⵏ ⵜⴰⵏⴱⵖⵓⵔⵜ ⴷ ⵜⵎⵢⴰⵏⵏⴰⵡⵜ.
ⵍⵍⵉⵖ ⵉⵎⵎⴰⵖ ⵡⴰⵎⵎⴰⵙ ⵏ ⵜⵎⴽⵯⵜⵉⵜ ⵉⵛⵛⴰⵔⵏ ⵉ ⵜⴷⵉⵎⵓⴽⵔⴰⵟⵉⵜ ⴷ ⵓⴼⵔⴰ ⴼ ⵓⵣⵓⵣⵣⵔ ⵏ ⵜⴷⵍⵙⴰ ⵏ ⵜⴷⵉⵎⵓⵇⵔⴰⵟⵉⵜ ⴷ ⵓⴼⵔⴰ, ⴷ ⵓⵎⵣⴰⵖ ⵏ ⵡⴰⵜⵉⴳⵏ ⵉⵎⴰⴹⵍⴰⵏⵏ, ⴷ ⵜⵎⵢⵉⴷⵉⵔⵜ ⵊⴰⵔ ⵉⵎⴰⴷⴰⵏⵏ ⴷ ⵜⴷⵍⵙⵉⵡⵉⵏ ⵉ ⵓⵎⵣⵔⴰⵢ ⵊⴰⵔ ⵜⵓⵜⵍⴰⵢⵉⵏ ⴷ ⵓⵙⴳⴷ…ⵉⵙⵜⵉ ⵡⴰⵎⵎⴰⵙ ⵏ ⵜⵎⴽⵯⵜⵉⵜ ⵉⵛⵛⴰⵔⵏ ⵉ ⵜⴷⵉⵎⵓⵇⵔⴰⵟⵉⵜ ⴷ ⵓⴼⵔⴰ ⴰⴷ ⵉⵙⵎⵖⵔ ⵎⴰⵙⵙⴰ ⵍⴰⵢⵍⴰ ⵎⵣⵢⴰⵏ ⴱⵏ ⵊⵍⵍⵓⵏ.
ⵜⵖⵔⴰ ⴷⵓⴽⵜⵓⵔⴰ ⵍⴰⵢⵍⴰ ⵎⵣⵢⴰⵏ ⴱⵏ ⵊⵍⵍⵓⵏ ⴳ ⵜⵖⵉⵡⴰⵏⵜ ⵏ ⵏ ⵜⵙⵏⵉⵊⵊⵉⵜ ⴳ ⵎⴰⴷⵔⵉⴷ, ⵜⵙⵎⴷ ⵜⵉⵖⵔⵉ ⵏⵏⵙ ⵓⵍⴰ ⴳ ⵓⵎⵏⵉⴷ ⵏ ⵜⵙⵏⵉⵊⵊⵉⵜ ⵏ ⵡⴰⵍⵍⵏ ⴳ ⵜⵖⵔⵎⵜ ⵏ ⴱⴰⵕⵛⴰⵍⵓⵏⴰ. ⴳ ⵜⵣⵡⵉⵔⵉ, ⵜⵙⵡⵓⵔⵉ ⴳ ⴱⴰⵕⵛⴰⵍⵓⵏⴰ ⴷ ⵎⴰⵏⵀⴰⵜⵏ ⴷ ⵏⵢⵓⵢⵓⵔⴽ.
ⵜⵙⵡⵓⵔⵉ ⴷⵓⴽⵜⵓⵔⴰ ⵍⴰⵢⵍⴰ ⵎⵣⵢⴰⵏ ⴱⵏ ⵊⵍⵍⵓⵏ ⴳ ⵓⵎⵏⵉⴷ ⵏ ⵜⵙⵏⵉⵊⵊⵉⵜ ⵉ ⵓⴳⴳⴰⵔ ⵏ 25 ⵏ ⵓⵙⴳⴳⵯⴰⵙ ⴳ ⵉⵙⴳⵏⴰⴼⵏ ⵉⵎⴰⵜⴰⵢⵏ ⵏ ⵍⵎⵖⵔⵉⴱ ⵖⵎⴽ ⴰⵏⵏ ⵓⵍⴰ ⴳ ⵓⵙⴳⵏⴰⴼ ⵏⵏⵙ ⵓⵙⵍⵉⴳ, ⵖⵎⴽ ⵍⵍⵉ ⵜⴷⵔⵓ ⴳ ⴽⵉⴳⴰⵏ ⵏ ⵉⵏⵎⵓⵇⵇⴰⵔⵏ ⵉⴳⵔⴰⵖⵍⴰⵏⵏ.
ⵜⴳⴰ ⵎⴰⵙⵙⴰ ⵍⴰⵢⵍⴰ ⵎⵣⵢⴰⵏ ⴱⵏ ⵊⵍⵍⵓⵏ ⵜⴰⵏⵙⵙⵉⵅⴼⵜ ⵏ ⵜⵎⴰⴷⴷⴰⵙⵜ ⵜⴰⵄⴰⵍⴰⵡⵉⵜ ⵏ ⵓⴼⵔⴰⴳ ⵏ ⵉⴱⵓⴽⴰⴹⵏ ⴳ ⵜⴳⵎⵎⵉ ⵜⵓⵎⵍⵉⵍⵜ ⴷ ⵜⵎⵔⵙⵍⵜ ⵏ ⵡⴰⵢⵢⵓⵔ ⴰⵥⴳⴳⵯⴰⵖ ⴰⵎⵖⵔⵉⴱⵉ, ⵖⵎⴽ ⵜⵜ ⵏⵏ ⵜⴽⴽⴰ ⵜⴳⴰ ⵜⴰⵎⴰⵔⵉⵜ ⵏ ⵓⵎⵙⵙⵉⵅⴼ ⵏ ⵜⵎⵙⵎⵓⵏⵜ ⵏ ⵉⵎⵙⴰⵙⴼⵔⵏ ⵏ ⵍⵎⵖⵔⵉⴱ…
ⵙⴳ 1992, ⵜⵥⵍⵉ ⵜⵓⴳⴳⴰⵙ ⵏⵏⵙ ⵉ ⵢⵉⴳⵔ ⵏ ⵓⵙⴳⵎⵉ ⴷ ⵓⵙⵙⵍⵎⴷ, ⵜⴳ ⵜⴰⵏⵙⵙⵉⵅⴼⵜ ⵏ ⵜⵎⵔⵙⵍⵜ ⵏ (BMCE Bank) ⵙⴳ 1995 ⵍⵍⵉ ⵉⵙⵔⵙⵏ ⵖ ⵉⵡⵜⵜⴰⵙⵏ ⵏⵏⵙ ⴰⴷ ⵜⴰⵡⵙ ⴳ ⵓⵙⴷⵓⵙ ⵏ ⵓⵙⵙⵍⵎⴷ ⵉ ⵜⴳⵎⵉ ⵜⴰⵙⵓⵍⴰⵏⵜ ⴷ ⵜⵡⵉⵙⵉ ⴳ ⵓⴼⵔⴰⴳ ⵏ ⵡⴰⵡⵏⴰⴹ, ⵜⵉⵡⵙ ⴳ ⵓⴱⵓⵖⵍⵓ ⵏ ⵓⵙⵙⵍⵎⴷ ⴳ ⵎⵏⵏⴰⵡ ⵉⴹⵓⵕⴰⵏ ⴷ ⵜⵖⵔⵎⵉⵏ ⵙ ⵓⵙⴽⵔ ⵏ ⵜⵉⵏⵎⴰⵍ (Medersat.com) ⴳ ⵎⵏⵏⴰⵡⵜ ⵜⵙⴳⴳⵉⵡⵉⵏ ⴳ ⵍⵎⵖⵔⵉⴱⵏ, ⵖⵎⴽ ⴰⵏⵏ ⵓⵍⴰ ⴳ ⵜⵎⵉⵣⴰⵔ ⵏ ⵙⵙⵉⵏⵉⴳⴰⵍ ⴷ ⵍⴽⵓⵏⴳⵓ ⴱⵕⴰⵥⴰⴼⵉⵍ ⴷ ⵎⴰⵍⵉ. ⴳ 30 ⵢⵓⵍⵢⵓⵣ 2016, ⵜⵓⵎⵥ ⵍⵡⵉⵙⴰⵎ ⴰⴳⵍⴷⴰⵏ ⴷⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴼ ⵜⵓⴳⴳⴰⵙ ⵏⵏⵙ ⵅⴰⵜⵔⵏⵉⵏ ⵍⵍⵉ ⵜⵙⴽⵔ ⴳ ⵢⵉⴳⵔ ⵏ ⵓⵙⵙⵍⵎⴷ ⴳ ⵍⵎⵖⵔⵉⴱ, ⵖⵎⴽ ⴰⵏⵏ ⴷ ⵎⵏⵏⴰⵡⵜ ⵜⵙⵎⵖⵓⵔⵉⵏ ⵢⴰⴹⵏⵉⵏ ⴳ ⵓⵙⵡⵉⵔ ⴰⵎⴰⴹⵍⴰⵏ. ⵖⵎⴽ ⵍⵍⵉ ⵜⵉⵡⵉ ⵜⴰⵙⵎⵖⵓⵔⵜ ⵏ ⵓⵙⵓⵜⴳ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ ⴽⵟⵓⴱⵕ 2012.
ⴳ ⴱⵏⵉ ⵏⵚⴰⵕ ⴳ ⵉⵥⵥⵍⵎⴹ ⵏ ⵜⵎⴰⵣⵉⵔⵜ, ⵜⵙⴽⵔ ⵎⴰⵙⵙⴰ ⵍⴰⵢⵍⴰ ⵎⵣⵢⴰⵏ ⴱⵏ ⵊⵍⵍⵓⵏ ⵢⴰⵜ ⵜⵙⵏⵏⵉⵖⵜ ⵏ ⵓⵎⵣⵔⵓⵢ ⵉⵥⵍⵉⵏ ⵉ ⴱⴰⴱⴰⵙ ⴰⵎⴰⵕⵉⵛⴰⵍ ⵎⵓⵃⵎⴰⵎⵎⴰⴷ ⴰⵎⵣⵢⴰⵏ, ⵖⵎⴽ ⵍⵍⵉ ⴳⵉⵙ ⵜⵙⴽⵔ ⵢⴰⵜ ⵜⵙⴷⵍⵉⵙⵜ ⵉⵥⵍⵉⵏ ⵙ ⵜⵣⵔⴰⵡⵉⵏ ⵜⵉⵎⴰⵣⵉⵖⵉⵏ ⴷ ⵜⵉⵏ ⵉⵥⵥⵍⵎⴹ ⵏ ⵉⴼⵔⵉⵇⵢⴰ.
ⵜⵉⵡⵙ ⵎⴰⵙⵙⴰ ⵍⴰⵢⵍⴰ ⵎⵣⵢⴰⵏ ⴱⵏ ⵊⵍⵍⵓⵏ ⵃⵎⴰ ⴰⴷ ⵉⵜⵜⵓⵙⴽⵉⵔ ⵓⵙⴳⴳⵉⵡⵔ ⴰⴳⵔⴰⵖⵍⴰⵏⵏ ⵏ ⵜⴷⵍⵙⴰ ⵜⴰⵎⴰⵣⵉⵖⵜ ⵙ ⵓⵎⵢⴰⵡⴰⵙ ⴷ ⵜⵙⴷⴰⵡⵉⵜ ⵜⵓⵕⵓⴱⴱⵉⵜ ⵜⴰⵄⵕⴰⴱⵜ, ⵜⵉⵍⵉ ⴳⵉⵙ ⵓⵍⴰ ⵜⵙⴷⵍⵉⵙⵜ ⵜⴰⵎⴰⵣⵉⵖⵜ, ⵖⵎⴽ ⵍⵍⵉ ⵜⵉⵡⵙ ⴳ ⵓⵣⵓⵣⵣⵔ ⵏ ⵢⴰⵏ ⵓⵙⴼⵙⵔ ⴰⵎⴰⵣⵉⵖ ⴰⵅⴰⵜⴰⵔ ⵖ ⵖⴰⵕⵏⴰⵟⴰ ⵍⵍⵉ ⵜⵕⵥⵎ ⵜⴳⵍⵍⵉⴷⵜ ⵏ ⵚⴱⴰⵏⵢⴰ ⵍⵉⵜⵉⵙⵢⴰ ⵓⵔⵜⵉⵣ ⴳ 5 ⴷⵓⵊⴰⵏⴱⵉⵔ 2019.