ⵜⴰⴱⵔⴰⵜ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⵉ ⵉⴱⵕⵍⴰⵎⴰⵏⵉⵢⵉⵏ ⵅⴼ ⵓⵙⴳⴳⵯⴰⵙ ⴰⵎⴰⵣⵉⵖ
ⴰⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ
ⵜⴰⴱⵔⴰⵜ ⵉ ⵉⴱⵕⵍⴰⵎⴰⵏⵉⵢⵉⵏ ⵅⴼ ⵓⵙⴳⴳⵯⴰⵙ ⴰⵎⴰⵣⵉⵖ
ⵉ ⵎⴰⵙⵙ (ⴰ) (ⵜ)ⴰⵎⴰⵔⵉ(ⵜ) ⵉⵜⵜⴰⵡⵇⵇⴰⵔⵏ: …..
ⵉ ⵎⴰⵙⵙ (ⴰ) (ⵜ)ⴰⵎⵛⵛⵉⵡⵕ (ⵜ) ⵉⵜⵜⴰⵡⵇⵇⴰⵔⵏ: …..
ⵉⵎⵔⵙⵉ: ⴰⵙⵓⴷⴻⴷ ⵏ ⵓⵙⴳⴳⵯⴰⵙ ⴰⵎⴰⵣⵉⵖ
ⴳ ⵓⵙⵎⵓⵙⵙⵓ ⴰⵎⴷⵏⴰⵏ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ -ⵍⵎⵖⵔⵉⴱ- ⵙⴳ ⵉⵙⴳⴳⵯⴰⵙⵏ, ⵍⵍⵉⵖ ⵉⵙⵓⵙⵙⵏ ⵓⴷⵓⵙⵜⵓⵔ ⵙ ⵜⵎⴰⴳⵉⵜ ⵜⴰⵎⴰⵣⵉⵖⵜ ⴳ ⵜⵣⵡⴰⵔⵜ ⵏⵏⵙ, ⵉⵙⴷⴷⴻⴷ ⵓⵍⴰ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵎⵏⵏⵉ ⵡⵉⵙ ⵙⵎⵎⵓⵙ ⵙⴳ 2011.
ⵍⵍⵉⵖ ⵉⵍⵍⴰ ⵓⵣⵣⴳⵉⵔ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 26.16 ⴼ ⵜⴼⵔⴽⵉⵡⵉⵏ ⵏ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⴷ ⵜⵎⴰⵎⴽⵉⵏ ⵏ ⵓⵙⵉⴷⴼ ⵏⵏⵙ ⴳ ⵉⴳⵔⴰⵏ ⵏ ⵓⵙⵙⵍⵎⴷ ⴷ ⵉⵎⵣⵡⵓⵔⴰ ⵏ ⵜⵓⴷⵔⵜ ⵜⴰⵎⴰⵜⴰⵢⵜ, ⵙⴳ ⵙⵉⵏ ⵉⵙⴳⴳⵯⴰⵙⵏ, ⴷⴼⴼⵉⵔ ⵏ ⵓⵣⵓⵣⵣⵔ ⵏⵏⵙ ⴳ ⵓⵖⵎⵉⵙ ⴰⵎⴰⴷⴷⵓⴷ ⵓⵟⵟⵓⵏ 6816 ⴳ 26 ⵛⵓⵜⴰⵏⴱⵉⵔ 2019.
ⵍⵍⵉⵖ ⴰⴷ ⵏⵙⵙⴽⵯⵜⴰⵢ ⵉⵏⴰⵡ ⴰⴳⵍⴷⴰⵏ ⵉⴳⴰⵏ ⴰⵎⵣⵔⴰⵢ ⵏ ⵓⵊⴷⵉⵔ ⵖ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ “ⵜⴳⴰ ⵜⵎⴰⵣⵉⵖⵜ ⵢⴰⵏ ⵓⴼⵔⴷⴰⵙ ⴰⴷⵙⵍⴰⵏ ⵏ ⵜⴷⵍⵙⴰ ⵜⴰⵏⴰⵎⵓⵔⵜ, ⵜⴳ ⵓⵍⴰ ⴰⵢⴷⴰ ⴰⴷⵙⵍⴰⵏ ⴰⵎⵏⵏⴰⵡ, ⵉⵍⵍⴰⵏ ⴳ ⵜⵎⵉⵜⴰⵔ ⵏ ⵓⵎⵣⵔⵓⵢ ⴷ ⵜⵖⵔⵎⴰ ⵜⴰⵎⵖⵔⵉⴱⵉⵜ; ⵖⵎⴽ ⴰⵏⵏ ⴰⴼ ⵏⴰⴽⴽⴰ ⵉ ⵓⵙⵎⵖⵔ ⵏⵏⵙ ⵢⴰⵏ ⵓⵅⵎⵎⴻⵎ ⵉⵥⵍⵉⵏ ⴳ ⵓⵙⴽⵔ ⵏ ⵓⵙⵏⴼⴰⵔ ⵏⵏⵖ ⴰⵏⴰⵎⵓⵏ ⴷ ⵓⴷⵉⵎⵓⵇⵔⴰⵟⵉ ⴰⵜⵔⴰⵔ, ⵉⴱⴷⴷⵏ ⴼ ⵓⵙⵓⵜⴳ ⵏ ⵓⵡⵔⵉⴽ ⴰⵏⴰⵎⵓⵔ ⴷ ⵜⵎⴰⵜⴰⵔⵉⵏ ⵏⵏⵙ ⴳ ⵜⵓⵜⵍⴰⵢⵜ ⴷ ⵜⴷⵍⵙⴰ ⴷ ⵜⵖⵔⵎⴰ”, ⵉⵙⴷⴷⵉⴷ ⵓⵍⴰ “ ⵎⴰⵙ ⵜⴳⴰ ⵜⵎⴰⵣⵉⵖⵜ ⴰⵢⴷⴰ ⵏ ⵎⴰⵕⵕⴰ ⵏ ⵉⵎⵖⵔⵉⴱⵉⵢⵏ ⵍⵍⵉⵖ ⵜⴻⵟⵟⴰⴼ ⵉⵥⵓⵕⴰⵏ ⵏⵏⵙ ⴳ ⵓⵎⵣⵔⵓⵢ ⵏ ⵓⵎⴰⴷⴰⵏ ⴰⵎⵖⵔⵉⴱⵉ”.
ⵍⵍⵉⵖ ⴷ ⵏⵙⵙⴽⵯⵜⵉ ⵉⵏⴰⵡ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵙ ⵜⵎⵍⴷⴰ ⵏ ⵓⴽⵯⵜⵜⴰⵢ ⵡⵉⵙ 68 ⵏ ⵜⴳⵔⴰⵡⵍⴰ ⵏ ⵓⴳⵍⵍⵉⴷ ⴷ ⵓⵎⴰⴷⴰⵏ, ⵖ ⵉⵙⴰⵡⵍ ⴼ “ⵓⵎⵣⵔⵓⵢ ⴰⵎⴰⵣⵉⵖ ⵢⴰⴳⴳⵓⴳⵏ” ⵏ ⵍⵎⵖⵔⵉⴱ.
ⵙ ⵓⵙⵙⴽⵯⵜⵉ ⵏ ⵜⵙⵖⵍⴰⴼ ⵏ ⵜⵎⵔⴰⵡⵜ ⵜⴰⴳⵔⴰⵖⵍⴰⵏⵜ ⵏ ⵜⵓⵜⵍⴰⵢⵉⵏ ⵏ ⵉⵎⴰⴷⴰⵏⵏ ⵉⵎⵣⵡⵓⵔⴰ (2022-2032) ⵍⵍⵉ ⴷ ⵜⵙⵙⴼⵖ ⵜⵙⵎⵓⵏⴰⵢ ⵜⴰⵎⵛⴰⵡⴰⵕⵜ ⵜⴰⵅⴰⵜⴰⵔⵜ: “ⵜⴰⵎⵔⴰⵡⵜ ⵏ ⵜⵡⵡⵓⵔⵉ ⵉ ⵜⵓⵜⵍⴰⵢⵉⵏ ⵏ ⵉⵎⴰⴷⴰⵏⵏ ⵉⵎⵣⵡⵓⵔⴰ” ⵍⵍⵉ ⵜⵙⵏⵎⴰⵍⴰ ⵜⵎⴰⴷⴷⴰⵙⵜ ⵏ “ⵢⵓⵏⵉⵙⴽⵓ”.
ⵉⵍⵍⴰ ⵡⴰⴷⴷⵓⵔ, ⵎⴰⵙⵙ(ⴰ) (ⵜ)ⴰⴱⵕⵍⴰⵎⴰⵏⵉ(ⵜ), ⴷⴰⵔ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ ⴰⴷ ⴰⵡⵏ ⵢⴰⵣⵏ ⴳ ⵓⵙⴰⵜⵉ ⵜⵏⴱⴰⴹⵜ ⵜⴰⵣⵣⵔⴰⴼⵜ ⴷ ⵜⵙⵔⵜⴰⵏⵜ ⵍⵍⵉ ⴰⵡⵏ ⵉⴼⴽⴰ ⵓⴷⵓⵙⵜⵓⵔ ⵏ ⵜⴳⵍⴷⵉⵜ, ⵃⵎⴰ ⴰⴷ ⵜⵙⵎⵏⵉⴷⵎ ⵜⵉⵙⵓⵎⵔⵉⵏ ⵏ ⵉⵙⵍⴳⵏⵏ ⵉ ⵓⵙⵉⵙⵙⵏ ⵏ ⵓⵙⴳⴳⵯⴰⵙ ⴰⵎⴰⵣⵉⵖ 2972 ⴷ ⵜⴰⴼⵓⴳⵍⴰ ⵜⴰⵏⴰⵎⵓⵔⵜ ⴷ ⵜⵏⵓⵕⵥⵎⵜ ⵜⴰⵎⵖⵔⴰⴷⵜ ⴰⵎ ⵜⴰⴼⴼⵓⴳⵍⵉⵡⵉⵏ ⴷ ⵜⵏⵓⵕⵣⵎⵉⵏ ⵜⵉⵎⴰⴷⴷⵓⴷⵉⵏ.
ⵏⵇⵇⵍ ⵙ ⵜⵎⵔⴰⵔⵓⵜ ⵏⵏⵓⵏ, ⴰⵔ ⴰⵡⵏ ⵏⵜⵜⴰⵣⵏ ⴰⵙⵓⵜⴳ ⴷ ⵓⵡⵇⵇⵔ ⵏⵏⵖ.
ⵕⴰⵛⵉⴷ ⵕⴰⵅⴰ
ⴰⵎⵖⴰⵔ ⵏ ⵓⴳⵔⴰⵡ ⴰⵎⴰⴹⵍⴰⵏ ⴰⵎⴰⵣⵉⵖ
ⵜⴰⴱⵔⴰⵜ ⵙ ⵜⴰⵄⵕⴰⴱⵜ: