Ɛecra duru- 1…
Ɛecra duru n twaɣit …
Cfiɣ akken i ilaq i tceqquft-a n ɛecra duru, jemɛeɣ nnig n 100 deg-sent rriɣ-tent ɣer teɣmert. Sfeqdeɣ fell-asent, ufiɣ ar tura llant. Rujaɣ yiwen ad d-yebder kra ɣef tceqquf-a, yiwen ur d-yenni d acu i tt-yessemgarden ɣef tiyaḍ…
Tura ad d-sfehmeɣ: taceqquft ɣur-s 2 n wudmawen yiwen ttarun fell-as imḍanen, dagi d 50 (isenṭimen), udem wis 2 ttaran fell-as unuɣ (un dessin) d kra n tira. D tira-a s tutlayt taɛrabt i d aɣbel, kunwi ur tfaqem ara. Tura ad twalim amek ur aɣ-ḥmmilen ara, nekkni s leqbayel, deg tmurt-a n Lezzayer i nettra d tamurt-nneɣ nettat tugi-aɣ. D acu i d-teqqar tefyirt-a yuran ɣef yiwen n wudem n tceqquft-a? Ad tt-id-aruɣ s yisekkilen ilaṭiniyen, nettat tura s taɛrabt. Teqqar ma tessnem ad teṭillem: “Law wilaya 15 (Tizi Uzzu), inna hadihi elumma, umma waḥida”. Tira mecṭuḥet, iẓri inqes, muqlet kunwi akken i ilaq teɣrem ayen yura fell-as…
Kra dagi akk acimi i d-kkren Leqbayel yiwen n wass n tefsut (20 yebrir) deg useggas 1980 yuɣalen d tafsut n Yimaziɣen. Kkren-d, d nutni i d imezwura deg umezruy n Lezzayer n lbext-iw. Nnan-d dayen neɛya deg lbaṭel, neɛya deg texnanasin-nwen, neɛya deg tmuḥeqranit, nugi ad tneṭlem idles-nneɣ d amuddir nekkni neṭallay, bɣan ad nettu iman-nneɣ ad nuɣal akken bɣan: d Aɛraben inselmen. Inselmen, yezmer lḥel, yal yiwen amek, ma d Aɛraben d awezɣi, d ayen ur d-iḍerrun ara akk ɣas ma amur ameqqran n Yimaziɣen sɛerqen-asen lǧerra, ttun iman-nsen, tuwi-ten tnafa taɣezzfan, wissen melmi ara d-akin…
Ma yeggra-d yiwen n uẓar seg-neɣ ad yettsuɣu i win yebɣan ad d-isel: Nekkni d Imaziɣen!..
Ad d-uɣaleɣ alma d yibrir-nni, d netta i d asirem n Yimaziɣen anda ma llan deg tmazɣa akken ma tella…
Yebrir yuɣ akk Tamazɣa, yuweḍ ula ɣer Tunes anida bdan ttḥerriken Imaziɣen n din, ttnadin ɣef yizerfan-nsen idelsanen, ttnadin ad ten-id-iwali udabu-nsen akken i ten-id-yefka Rebbi. Ihi 20 yebrir yuɣal d yiwen wass agraɣlan. Sfugulen-t deg watas n tmura n Tmazɣa: deg Lezzayer deg tazwara, teḍfer-itt-id Lmaruk d Libya d tunes d tiyiḍ. D yiwen wass yessawalen i tdukli n Yimaziɣen anda bɣun ilin, s tdukli ad yeqwu wafud ara d-isεejlen lebɣi-nsen.
D tamurt n Leqbayel i d aqerruy n tmacint n umussu-a maca akka tura wissen d acu i-tt-yuɣen, amzun tefka cwit lwi; ilaq ad tzellez akken ayen akk nessaram ad yeffeɣ….
Nfaq seg zik