.....AƔYUL
Lhigh kan i ttâebga
Ass n Sed 14 yulyu deg uxxam n yilmeẓyen n Uqbu ɣef 06 n tmeddit sdat n ddaqqes n yimeshanayen, yella-d yiwen n urmuy (un monologue) i d-yessawel gma-tneɣ Akli n Tmazirt.Asentel itezzi ɣef uɣyul ( Ur d-qqareɣ ara ḥacakum), maca aɣyul-a d ssebba i d-yufa akken ad d-yawi awal aɣezzfan ɣef wuguren i d-ttmmagaren yilmeẓyen deg tmurt-nsen: Lezzayer.
Mačč d yiwen wugur i d-yebder. Tagrayt n uḍris n urmuy-a i yura umedyaz Buεlam Messusi d ta: Ilemẓi deg tmurt n Lezzayer ar tura ur yufi ara iman-is.
Imi d-yewwi awal ɣef uɣyul ad d-rnuɣ yiwen usefru ɣef cteεteε i wimi yemmečč uzref… am nekkni.
Aɣyul
Ttɛayaren medden yis-i
Abder-iw s “ḥacakum”
Nekk lhiɣ kan i uɛebbi
Nekk d amerkub n udrum
Tiɣrit tedber iberdi
Ṛwiɣ-tt akken i tt-yeṛwa umcum
Timẓin i yekrez uzger
i tent-iɛelfen d aɣyul
?Anwa i tent-yeddmen ɣer yiger
?Anwa i ɛefsen ɣef wul
Aẓru asɣar d leɣber
Zgan ɣef uɛrur-iw s ṭṭul
Aserdun inker-iyi
Ulac win i iyi-iḥemmlen
“Yemma d tagmert-nni”
Yenna win ur nettarwen
Aɣyul ttawin-t-id d anzi
Yettcebbiḥ deg (yi)meslayen
?Anwa i d-yeǧǧan taḍsa
Fiḥel ma tnudam : D aɣyul!
Ɣur-i ur telli tasa
Sdat-i iɛedda uwtul
Tafat n uɣyul tensa
Yessusum kan yesmuqul
Mačči d lǧennet ur bɣiɣ
Anida akken llan warrac
D ixef-is kan ur s-ufiɣ
I tudert n lehna ulac
Ɣef tgecrar-iw i ɣliɣ
Mi d-tres tyita s tirac
Ɣef walim i iyi-kkaten
I wakken ad ttuɣ timẓin
Lmeɣla rnu ildayen
Tiɣrit tezga s tɛewwzin
Amdan bu wul ideɣlen
Yeḥrem fell-i addaynin
Win akken ur neḥric d aɣyul
Akka i s-ssawalen
“Ur tesɛiḍ ara deg wul
Kif-kif-ik d bu (yi)murruten”
Zzman (ɣe)f cteɛtaɛ i yeggul
D asentel n wid yekkaten
(de)G uɣyul ur tlaq tyita
Aqelmun lsan-t yiḍarren
Ddunit tbeddel am tata
(de)G uqḍar d netta i izeggiren
Yenher acḥal d tasuta
Leḥkem-is d win idumen.