Rrbeḥ deg twaɣit
Ur yuwiḍ ixef n tsegnit
Ur yuwiḍ ixef n tsegnit
Yerwi ddunit
Yak yerra-tt ur tettwaɛqal
Amzun tuweḍ-d tmeddit
Neɣli tinnegnit
D agessar, ijebbed wakal
Nezga nnecced deg twaɣit
Nettargu talwit
S tebrek neddal amellal
Tudert zeddigen nugi-tt
S tayeḍ nbeddel-itt
Urǧin i as-nefki azal
Ayen yelhan nettarra-t diri-t
Afuḥan neddem-it
Iḍeffi ussan n yimal
Nerra uccanen d imsewwqen
Ḥeggsen, ttserrifen
Agdud, ǧǧan-t akken fiḥel
Ur d-bdiden ara ad seggmen
Maɛna ad xerben
Rennun afud i uɣbel
Deg leǧwameɛ ssalayen
Amzun sqizziben
I Rebbi ad asen-d-isel
Imuḍan mačči yiwen
Msakit ḍaɛen
Sbiṭar fell-asen yegdel
Mi d-yuweḍ waṭan yuɛren
Refden ifassen
Wid yerran tamurt d zzbel
Tagmat tura i teqwa
Tagmat tura i teqwa
Tɣab lḥukuma
Ladɣa agdud mi tt-yugi
Wa ad ittadded ɣef wa
Ad tɛeddi ccedda
Am zik ad d-tezzi tdukli
Leḥzen ma yerza ɣef kra
Ur nuḥtam ara
Nekkni ad s-nefeḍ imeṭṭi
Rrbeḥ deg twaɣit yella
Ladɣa ma necfa
Ɣef wayen akk ur nelhi
Ara yelhun d azekka
Ad teǧǧuǧǧeg tarwa
Ad taweḍ tmurt S igenni.
Ad teǧǧuǧǧeg tarwa