Ccix Lḥesnawi
Ccix- nneɣ
Iḥesnawen sɛan-t-id
D « la Reunion » i t-yewwin
Lezzayer turew-it-id
Fransa d tin yettrebbin
Taɛzibt teddrem, tsekker-it-id
Lɣerba tga-as timedlin
Ma d Leqbayel ttaddren-t-id
Seg zik rran-as tijmilin
Yecna Faḍma iḥemmel
Yecna akal aberkan
Yuɣal fell-asen iguǧǧel
Deg wul-is dima zgan
A tamurt n Leqbayel
Suref-as i win i kem-yeǧǧan
Fell-am, imeṭṭi-s yuzzel
S tayri yeččur ikufan
Yecna s tutlayt taqbaylit
Yecna s taɛrabt n Lezzayer
Tidet n tmurt irfed-itt
Yuɣ abrid yezdeɣ leqder
Yeddem tudert n twaɣit
Yid-s yal ass d amɛebbar
Tuɣacin-is d lḥentit
I wul ur negzim aẓar.
Yenna “Init-as ad d-yas”
Nenwa ad ɣ-d-yeččar taggurt
Deg-s nettraju yal ass
Ad d-yuɣal s akal n tmurt
Ziɣen zzman d amessas
Yerna tebrek i tagut
(ɣe)F ccix ur d- yettali wass
A-t-an deg lɣerba yemmut.
Mmager inebgi a Faḍma!
Win akken yecnan fell-am
(de)G (u)mezruy yekcem i lebda
Yid-m tura ad yezdi axxam
Nekkni ur t-nettu ara
Taẓuri teḥrez-it (de)g uzmam
Ccix Lḥesnawi yella
Ccna-s yettak-awen azul.