Terra-aɣ tmara ad neḥṛeg
Amussnaw Melikchi
Terra-aɣ tmara ad neḥṛeg.
Ad yerkeb deg teflukt n lluḥ
Am tin n Sidna Nuḥ
Ad tt-tthuzzun waman am dduḥ
Wissen ma ad issiweḍ ṛṛuḥ
Anda akken ara iṛuḥ
Akka i d tawenza n Muḥ.
Ad yexdem wissen acḥal d aseggas, ad iɣull iman-is deg tal taɣawsa, yemma-s ad tessenz lfeṭṭa-s d ddheb-is ma tesɛa-ten akken ad tɛiwen mmi-s deg lexlaṣ n lḥeqq n rrekba ɣef teflukt n baba Ṛebbi. Ad teččar almi ɣef ulamek seg yiḥeṛṛagen am netta, ad qemren tudert-nsen mi ara tebdu acerreg n waman imerɣanen. Aqlaɛ teqleɣ teflukt n twaɣit, tiwḍin wissen ma ad taweḍ anda akken i tenwa. Wid yesɛan zher, ur sen-teččur ara, ttawḍen alma d tamurt n Spenyul, n Fransa neɣ n Ṭelyan. Ma d wid iwimi tcennef twenza seg wasmi i d-kkren, itett-iten lebḥeṛ simira ad ten-ččen yiselman. Akka i yenna yiwen uḥeṛṛag mi t-steqsan acimi ara yezger ilel ɣef teflukt ara t-inehren srid ɣer tmettant. Menyif ad iyi-čcen yiwqasen n lebḥeṛ wala ad iyi-ččen yiwqasen n tmurt-iw i iteddun ɣef sin yiḍarren. Tamurt, ččan-tt akken ma tella, ur d-ǧǧin deg-s ddaneq. Dayen tura, ur tufiḍ d acu i as-d-yeggran i Tmurt Tameqqrant yettaken arraw-is, ula d yessi-s taggara-a, d asfel neɣ d tunṭict i yiselman n Yilel Agrakal yerwan tacriḥt n tfekkiwin timeɣbatin n yilmeẓyen-nneɣ.
D ayen iqucc usirem deg tmurt, yeɣli-d umwan fell-as, tesseɣlay deg yiferrawen am useklu, yerna wissen ma ad tuɣel ad ten-id-tger.Ilemẓiyen d tlemẓiyin i tt-yettcebbiḥen, tesnejla-ten ɣer tmura tiberraniyin i asen-d-grent irebbi acku ḥṣant s wazal i sɛan yimezdaɣ n Tmurt Tameqqrant s umata akked wid n Tmurt Tucbiḥt. Timura-a n umenẓaw n Marikan neɣ win n Taruft ttwalint mebɛid ɣer sdat, fkant ttawilat iwulmen i yinebgawen-nsent i d-yusan seg Tferka n Ugafa, ladɣa seg Tamurt Tucbiḥt, akken ad kemmlen tizrawin-nsen deg tal taɣult, deg tesdawiyin timeqqranin. Ɣer taggara ala aɣellet ara ɣelltent seg wayen ara lemden imi amur deg-sen ttuɣalen d imussnawen imeqqranen, ismawen-nsen ad azlen deg umaḍal d tirni.
Aɣerbaz n tmurt-nneɣ, zik yefka-d imussnawen, ma d win n tura segmi aselmed-ines iga s tutlayt taɛrabt ittak-d iruskilen. Yuɣal d timɛemmert, cwiṭ n tussna ur d-teggri deg-s, ibedd ɣef usɣan yesbugluyen allaɣen n yinelmaden, qqimen buqlen.
Iḥerragen msakit