...Acciwen
Iwaɣezniwen
Nenwa nseggem tilufa
Nerra-d agelzim s axxam
Ncemmer-asen i lekmam
Am wakken ur nestufa
Yeffeɣ i wufus ulgam
Amezruy, yura-t deg uzmam
Srewten-d tamurt s lexfafa
Ay aḥremram azremram
Imeɣrasen anda tellam?
-« Nemneɛ, tezgel-aɣ Fransa
Lezzayer tɣaz aẓekka
Win d-iggran teqqen-as akmam ».
S tmara i nuwi asurif
Nteddu ur iban sani
Neḍmeɛ cwiṭ n tlelli
Keblen-tt, tundi d lmendif
Nettawi yiwet n tikli
Nettamen s yiwen n Rebbi
Wicqa ma izuɣer-aɣ wasif
Anda-ken ay at Rebbi
Tunfem-aɣ la nettbibbi
Nuǧǧew-d zzebra n lḥif
Zzman yerra-aɣ deg rrif
Amzun deg ddunit ur nekki
Nuwi acciwen
Tirwiḥin ruḥent d asfel
Sebblen tudert ɣef tmurt
Akken ad ten-id-tmmager tefsut
Qqimen akkenni fiḥel
Begsen s tezmert n tzemmurt
Ggullen ad d-teldi tewwurt
Tifrat ɣur-sen ad d-teɛjel
A wid yessummten takurt
A tid mi texreb temzurt
Deg waṭas tmecḥem akal
Ar tura ur wen-rrin azal
Glan s tmellalin d tsekkurt
Taḥbult mi d-tres seg bufraḥ
I yiman-nsen i tt-ḥeggzen
S iɛebbaḍ-nsen i tt-ttaznen
Ǧǧan-as-d i ugdud aqraḥ
Inwan n lxir ssummen-ten
Ččan nnig tawant ttwezziɛen
Aɣref d amellaẓu n sseḥ
?Anda-ken ay iɛessasen
Iẓuran n tmurt gersen
Trawa n Lezzayer teččeḥ
Yezzi-as aɛrur lferḥ
Acciwen
?Wissen sya d asawen
Malek HOUD