Aseggas ameggaz. Amenzu n yennayer 2966
Yennayer ameggaz
Amenzu n yennayer 2966
D acu i nettraju ad yeḍru deg tmurt-nneɣ, mazal ar tura ur d-yeḍri, yerna yekki deg umuɣ aɣezzfan n yizerfan n umdan.
Amezwaru: Tutlayt n tmaziɣt, tutlayt tamezwarut deg tmurt, d nettat i d-yemɣin d tamezwarut deg wakal-is n Tmazɣa. Ar tura mačči d tunsibt.
Wissen d acu i nettraju ad tt-nessers deg tmendawt n Lezzayer s wudem unsib?…
Wis sin: Amenzu n yennayer yeẓḍan Tamazɣa seg usammar ɣer umalu, seg ugafa ɣer unẓul, d ayen i d-yesskanen tuget n yimezdaɣ n tama-a n umaḍal d Imaziɣen.
Ar tura ur yuɣal ara d ass aɣelnaw gar wussan n tmeɣriwin i nesfuggul deg tmurt n Lezzayer. Ar tura yeqqim d ass amagnu. Ar tura ur teḥsiben ara yimḍebbren n tmurt am wass agraɣlan (1zu janvier) neɣ amenzu n muḥerrem (ass aɛrab), d ussan war ixeddim yerna ttuxelsen.
D acu ara nefhem dagi? Imaziɣen kkin deg umaḍal, kkin deg tmura taɛrabin, maca i wakken ad ttunaḥsaben d Imaziɣen akken llan deg tidet, ala…
Wis krad: D netta akk id tidet. I wakken kra n wayen akk i d-bedreɣ deg tazwara ad yili, ad ittuqader, ad as-ddun akk deg lebɣi akken ma llan. D netta i d adɣaɣ n uɣalad… Ma yettwakkes, iẓra n uɣalad-a ad d-grirben d tirni. Daɣ netta ma tella TUGDUDT kra yellan ad yili.
Tamaziɣt d tunsibt d taɣelnawt deg tmendawt n Lezzayer
Ma nuɣal-d ɣer usfugel n umenzu n yennayer yettwagedlen deg tmura n Tmazɣa, nezmer ad d-nini mebla akukru: Ulac d acu diri am win ur nefki ara azal i yiman-is, am win yekkaten ad yettu tigemmi-s, ansayen-is, iman-is, ad yettɛanad wayeḍ, yebɣa ad yuɣal am netta, ad yutlay tameslayt-is, ad yelmed insayen-is,, ad yuɣal d netta, netta ad yettu iman-is. Iẓuran d Imaziɣen, ifurkan, igeḍman, iferrawen, ayen akk yella sufella ur yeffir ara, d aɛrab.
Tamsertit
Ulac d acu i yuɛren
Am win iɣuccen iman-is
Ad ifessi am ugris
Ad yuɣal d win-nniḍen
Ad yettu ula d isem-is
Yedgedgen ddaw n ufḍis
N win akken i t-yuɣen
Iɛemmed yeqleb idis
Yebbelttex am ubexsis
Iɛreq-as jedd n jeddi-s
Yedda d win i t-iɣurren.
D yir ddunit. Amenzu n yennayer, ixef n useggas amaziɣ, sfugulen-t akk deg Tmazɣa. D yiwen n wass yesdduklen merra Imaziɣen. Ɛeqlen iman-nsen anwa-iten. Maca kra n temnaḍin, ɣas ma teggen-as tameɣra, qqaren-as akka s taɛrabt: rras ɛam ɛarbi. Ufan-d iman-nsen d imerkantiyen, ɣur-sen sin wussan deg useggas: amenzu n yennayer, d awel muḥerrem, mebla ma nebder-d wis krad, ass agraɣlan. Kra da yettuɣal ɣer wid yeṭṭfen lumur n tmurt ur nesɣer ara amezry-nneɣ i tarwa-s, sselmaden amezruy s leɣlaḍ d uɛemmed. Ttnadin ad beddlen udem n tmurt, ad t-rren d wayeḍ, d aɛrab, netta, ayagi d awezɣi. Iẓuran n tmurt d Imaziɣen. A wi yufan kan amek ara ten-issew, akken ad d-uɣalen, ad d-mɣin, ad d-zehren seddaw n tmurt, ad d-rren i tmurt, udem-is n tidet, udem Amaziɣ.
Yennayer yesddukel Imezdaɣ n Tmazɣa
Amek i sfugulen amenzu n yennayer deg kra n temnaḍin n tmura n Tmazɣa.
Amenzu n yennayer
Amenzu n yennayer d ixef n useggas ɣer Yimaziɣen. Yettas-d deg wass wis mraw d sin (12) n wayyur n janvier. Ar ass-a deg tal tama n Tefriqt n ugafa anda ttidiren Yimaziɣen, sfugulen i umenzu n yennayer s yiwet n tmeɣra tameqqrant acku d yiwen wass i d-yesmaktayen Cacnaq, yiwen urgaz amaziɣ yuɣalen d agellid neɣ d aferɛun ɣef Yimaṣriyen deg useggas 950 send talalit n Mass Ɛisa. Seg yimir-nni i bdan Yimaziɣen ḥessben ussan.
Asfugel n yixef n useggas yeggra-d ar tura. Deg Uwris, tamurt n Yicawiyen, tilawin ttbeddilent inyen d tgejda n uqiḍun ɣef waya i s-qqaren i umenzu n yennayer « Buyni » ma d irgazen tturaren ddabax n uḍar neɣ ɣeṭṭlen leɣruḍ s tyitiwin n lbarud s temgeḥyal.
Imensi n yennayer: seksu s uyaziḍ
Deg tmurt n Leqbayel, tilawin ttheggint-d imensi n yennayer s seksu d uksum n uyaziḍ. Mi ara d-tessers twacult učči, tetten deg yiwen n uḍebsi, llal n uxxam ur yettɛedday ara fell-as uzaylal, tessrusu-d diɣen tijeɣlin n twelliyen d yiminigen akk d wid yemmuten, am wakken temlal-d tasa d wi ay turew akken ad mmagren aseggas amaynut ɣef tikkelt. Arrac imeẓẓyanen, ttseṭṭilen-asen i tikkelt tamezwarut.
Ayen nettnawal deg yennayer
Deg tama n umalu n tmurt am temdint n wihran, ass-nni tetten ala tiẓidanin. Deg Tlemsan tettili-d yiwet n tfaska iwimi semman: « Ayrad ». D yiwet n tceqquft n umazgun i d-tturaren yimezdaɣ n taddart, ttɣummun-d udmawen-nsen s yisɣumen (masques) yecban iqudam n yizem. Yiwen yizem d awessur ad yemmet (aseggas yezrin) ad yeǧǧ amkan i yiwen yizem d amecṭuḥ ara d-ilalen imiren (aseggas amaynut). Imezdaɣ n taddart, arrac tiqcicin ad tezzin i taddart, ad cennun, ad d-jemɛen isufar n wučči, tameddit, tilawin ttnawalent-d yis-sen imensi i yesddukulen akk at taddart.
Ansuf-yis-k ay aseggas amaynut!
Deg tmurt n Lmaruk, qqaren-as i umenzu n yennayer: « Tamɣart » Mi ara d-ires yimensi n yennayer yesḍuli ɣef yal yiwen n tawacult n uxxam ad yečč ass-nni nnig n tawant acku, akka i sfiliten i lxir ad yagar kra ara yekk useggas amaynut. Arrac, ma yella ugin ad ččen ad rwun, ssagaden-ten yimawlan-nsen s « temɣart » ara d-yasen ɣur-sen, d nutni ara tečč.
IMAZIƔEN
Amenzu n yennayer ɣur-s ass-a 2963 n yiseggasen deg tudert-is ; i tura d acu i ilaqen ad t-nexdem i wakken ad s-nerr azal ? D ayen i isehlen maḍi, ayen i xeddmen i wass agreɣlan, amenzu n janvier d wass n umenzu n muḥerrem n useggas aɛrab ara nexdem i umenzu n usaggas amaziɣ, ad t-nerr d ass war amahil, yerna d win yettuxelṣen. D aya kan.
?GM: Ayen nessutur yal aseggas yeqqim kan d asirem, ar melmi ara tbeddel
Lǧerra tamaziɣt