Isefra ɣef Yennayer.
Tamazɣa, tamurt n Yimaziɣen.
Awal ɣef yennayer
Ansuf fell-ak a yennayer. A-t-an tfukk fell-ak tuffra, teffɣeḍ-d seg tmadaɣt anda i bɣan ad teqqimeḍ i lebda wid ur k-neḥmmil ara, wid iɣuccen iman-nsen, ur ḥmmilen ara iman-nsen, imi ttarran-iman-nsen d wiyiḍ mačči akken i d-tuwi ad ilin.
Terra-ten tmara ad k-id-sbegnen, ad ak-d-rren ccan, acku azal-ik d ameqqran, d agaɛmir, d agejdur, anect-ila-t… Terra-ten tmara ad k-rren d unsib deg tmurt-ik.
Texreb-asen tirga, aɣrab-nni (lḥiḍ) i d-bnan s lektubat yezgan, iruḥ d iceqfan, yeddrem, yeftutes. Rran-t d tilist i umezruy-nneɣ, s lqern wis sebɛa i yebda umezruy-nneɣ, akkin akk ulac kra i yellan. Ladɣa kullec a-t-an din, syin i d-yebda kullec, d win i d yemma-s n ddunit…
A yennayer, tusiḍ-d ad aɣ-d-tiniḍ, ɣas ma nekkni neḥsa s waya : « Nekkni mačči d Aɛraben, nekkni d Imaziɣen ». Akal-nneɣ mačči d aɛrab akken i t-uran deg tmendawt. D yiwen n lekteb ameqqran-nniḍen i ilaq diɣen ad d-nedhu yid-s akken ala tidet ara d-yeqqimen deg tmurt-nneɣ. Neɛya deg lektubat.
Ansuf yis-k tikkelt-nniḍen ɣer tmurt-il tamaziɣt a Yennayer.
Isefra ɣet Yennayer
Yennayer.
Yenna : « Aseggas ameggaz
I merra Imaziɣen
Anda merra i zedɣen
D anfalit-a i d arraz »
I d aɣ-yessaram d talwit
Tazmert d teɣzi n tudert
Tuccfa deg temda n tumert
Yal ass, ssbeḥ tameddit
Wa i d-yeqqaren d Ccacnaq
Amaziɣ-nni Aferɛun
I yeẓran d acu ad yeḍrun
Mi yeḥseb ussan yezdeq
Sin yigiman d mraw krad( 2963)
Awitay s anda yuweḍ
Amzeruy ur t-iseffeḍ
Ahat, nnuba-nneɣ tusa-d.
Sin yigiman d tza tmad
d sdis tmerwin d semmus (2965)
Awitay s anda yuweḍ
Amzeruy ur t-iseffeḍ
Zeddig ur t-yettali wammus
Sin yigiman d tza tmaḍ
d sdis tmerwin d tẓa (2969)
Yennayer deg tmendawt yeẓẓa
Amzun yecreḍ d acraḍ.
Agellid, aferɛun Cacnaq.
Yennayer
Ǧǧem abrid i yinebgi
Ad n-iɛeddi
Ad teṭṭef tasga n uxxam
Inebgi n yilindi
Ad iɛeddi
Ad as-nbeqqi sslam
Azul fell-ak a Sidi
Tawwurt teldi
Err azmul-ik deg uzmam
Inebgi d Mass Yennayer
Ikcem s iger
Lxir yeẓẓa ad yimɣur
Yusa-d ad yesqaqer ccer
Rrezg ad yagar
Skudmal ad yettuzur
Lɣella-nni ad tzehher
Lqella ad tezder
Yal yiwen ad yawi amur
Ččem, ččem ad terrwum
Surgem s agerjum
Sfiltem ad yagar lxir
Ur ken-yettxassa uɣrum
Aɛebbuḍ amcum
Ad tettaččar am lbir
Ma nebɣa ad yekfu unezgum
Ɣef merra adrum
Ad nger akk afus deg yixmir
Imensi n Yennayer
Tagi d tukkist seg yiwet n taɣect cennunt tlawin tiqbayliyin, d tajmilt i ugellid n wayyuren :
A yennayer ! a yennayer ! Keččini d bab n yiger,
A yennayer ! a yennayer ! Fell-ak i nerwa amdegger,
A yennayer ! a yennayer ! Eğğ amkan a gma i Furar,
A yennayer ! a yennayer ! Tettaggadeḍ Rebbi deg umɣar.
A yennayer bu-ṣṣaba,
Aman-ik d isemmaḍen,
Tamurt n jeddi d baba,
I tt-ireffden d irgazen,
A yennayer bu-tecrurin,
A win mi yezdi yisem,
Ḥemmlenk warrac d tlawin,
Mi i k-yesla wedrar d rrsem.
A yennayer ! a yennayer ! A lexyar deg wugguren,
A yennayer ! a yennayer ! Ḥader widak yunagen,
A yennayer lehna tafat,
Tamurt tedda s tisula,
Win i ynudan f kra yufa-t,
!Anda yedda Rebbi yella
Yennayer agellid n wayyuren.