? Anda-tt Teqbaylit
Lkanun
Ifukk lexrif d ccetwa
Adfel yekkat irennu
Tamurt s waman terwa
Lmal itett yettcuffu
Tamγart tezzi-yas tarwa
Di tmucuha la tḥekku
Awal ur t-kerrez tira
Meskin yeqqim d agujil
Imi yemla-d ayen yecfa
Lğil ittak-it i lğil
F lkanun zzin-d merra
Idles cerḍen-t γef weεdil
Nsant tergin s waman
Tafat n lkanun tenger
Tikli tεerq-as i wemdan
Ur iẓri anda ara iger aḍar
Ibeddel fell-as zzman
Ur izmir ad issenser
Ikecm-d lemri s axxam
Iwet s allen n yimezdaγ
Isax lkanun yeddrem
Tebrek tesquqer tezweγ
Idles-nneγ iqeccem
Yettrejdil g wexxam yeffeγ
Arrac am lmal kessen
Imeksawen ala nutni
Ar lerbug ttwacudden
ṭerken-ten am urekti
F lkanun staxren-ten
Wwin-ten ad ten-iwet ubeḥri
Anda-tt tgelzimt n lejdud
Ad γizeγ amruj i lkanun
Ad as-surgeγ lbarud
Ad s-d-slen wid ur nceffun
Amdan γer wayla-s yeffud
Ḥegnen taḍunt ur s-d-berrun.
Anda-tt times-nni n lkanun? Anda-tent tmucuha-nni?