Inig n deffir uxxam
Axxam yehrura.
Tazwart.
Akli d Caɛban d imeddukal n temẓi, llan ttidiren d twaculin-nsen deg taddart n Tewrirt. Caɛban terra-t tmara ad yinig ɣer tmanaɣt akken ad yexdem ɣef mmi-s Meqqran yellan mazal-it d agrud.
Caɛban tečča-t lɣerba n deffir uxxam. Yeqqim acḥal d aseggas ur d-yerzi ɣer taddart n Tewrirt. Tikkelt tamezwarut mi d-yuɣal ɣer tmurt n baba-s d jeddi-s, yerra-d s axxam n yemma-s Mennun. Axxam-is yeččeḥ fell-as imi t-yettu. Ula d netta yettu-t. Ttar i d-yerra seg-s d inijel akked uẓegḍuf i d-yemɣin ger leblaḍ n ufrag, ma d leḥyuḍ merra qecren. Mi i isefqed ɣur-s Caɛban, yexleɛ, yufa-t deg yir ḥala. Agama yekreh ilem, ɣef way-agi ahat imezdaɣ imaynuten n uxxam yeǧǧa Caɛban d twacult-is d iɣersiwen am yiɣerdayen d yizerman. Deg wass d tibunejdamin i d-yettbanen ttecruruden ɣef leḥyuḍ.
Mačči d axxam kan i ibeddlen, ula d imdanen akken. Imɣaren ur nezmir ara i usikel qqimen-n deg Zzayer. D tawacult tamecṭuḥt n Caɛban i d-irezfen ɣer taddart n Tewrirt. Yidir, mmi-s n Wakli yeqqimen deg taddart d Meqqran d tizziwin, yugar-it yidir s kra n wussan kan deg leɛmer. Mi mlalen yenna Yidir i Meqqran: « Azul a Meqqran!
Heu… Ɛeslama Yidir!
Amek i tettiliḍ ? Aṭas aya ur nemẓer.
Wac ? Ma fhemt-kec.
Mi t-iwala akken, ur yegzi ara, yettu taqbaylit-is, yerra-tt Yidir ɣer taɛrabt-nni yeqqar deg uɣerbaz.
Qultu laka kayfa ḥalu-ka?
Meqqran yeṭṭerḍeq seg teḍsa mi yesla i Yidir yettmeslay-as-d s taɛrabt n lfusḥa. Caɛban d umeddakel-is n temẓi Akli ksan-ten-id kan, kra i nnan gar-asen slan-as.
Ini-as a Yidir: « Kifa ra-k?
Meqqran, mi yeẓra ur yefhim ara taɛrabt dderǧa, yeḍsa ɣef Yidir mi i as-d-yerra s taɛrabt n lfusḥa. Yekker Yidir ibeddel akk tutlayt.
Alors ! Comment vas-tu mon ami?
Très bien, merci, et toi? »
Ur msefhamen ara s tutlay-nsen, ssawlen i tberranit. Meqqran yunagen ɣer tmanaɣt Zzayer, ur yeṭṭif ara deg teqbaylit-is, yettu-tt, truḥ-as. Am netta, llan d imelyan. Yezmer d imawlan i d ssebba n tittin-a n tutlayt n tyemmat. Anef-as i uqcic neɣ teqcict ad hedren akken i asen-yehwa ma llan deg uzrib, berra i uxxam. Meɛna mi ara ten-id-ifek umnar n tewwurt s axxam-nsen, tuwi-d fell-asen ad brun i kra n tutlayt ssnen berra i umnar, ara ǧǧen yid-sen ala taqbaylit ma bɣan ad d-teqqim ur tnegger . Atas n yimdanen i isemrasen tasertit am ta, ad yili yiwen Uqbayli anda yebɣu yezdeɣ deg umaḍal, deg Fransa, Kanada neɣ Marikan, tawacult-is, meqqer mecṭuḥ tettmeslay taqbaylit am win mazal-it yezdeɣ deg walbaɛḍ n tudrin n tmurt n Leqbayel neɣ xir.
Issin tutlayt-ik.