....Tislit
Yeg Rebbi d tudert tayeffust.
Axxam n Wat Waɛli ur iggug ara aṭas ɣef win n Wat Waquj. Ɣef uḍar i rzan yiqeffafen d tqeffafin s axxam n teslit, Lwiza, yelli-s n Dda Ɛacur.
Lwiza n yal ass, yessureg-as Rebbi zzin ur icuḥ; Lwiza tislit, izad i izaden deg ssifa-s, tettban-d amzun d tasekkurt ladɣa mi terna iselsa yernan fell-as. Tin i tt-iwalan ad tt-taɣ s tiṭ, iban tusem deg-s mebla lebɣi-s.
D abernus i d-terra ɣef tuyat-is, aqelmun tdel lfuḍa iɣumm akk udem-is d uqerruy-is. D yessetma-s, d Nanna-s Zwina akked Nanna-s Dehbiya i as-d-yeṭṭfen afus, grent-tt-id gar-asent. Mi d-tuweḍ ad d-teffeɣ i umnar n tewwurt n uxxam-nsen, ddaw n yiɣallen n baba-s i d-tɛedda. D yiwen n unsay i d-yeqqaren, anda tebɣu tezwej twellit, laɛnaya n baba-s ad teddu yid-s. Srekben tislit ɣef yiwen n uɣyul d amellal, deffir-s yerna-d yiwen n yilemẓi n twacult-is imi Rebbi ur as-d-yefki ara gma-s ara tt-isaɛfen s axxam-is amaynut. Deg ubrid mi d-uɣalen yiqeffafen, ccna, aslilew d userfeq s yifassen, sekkren yiwen n zzhir d ameqqran.
Mi tuweḍ teslit ɣer umnar n tewwurt n yisli Caɛban, uqbel ad tekcem, d Nna Xuxa, yaya-s n Caɛban akked Nna Mennun yemma-s tis snat i tt-id-immugren. Nna Xuxa tessureg-as i teslit mi d-teldi urawen-is aman seg ugdur, tdegger-iten-id deffir-s, ɣlin-d d timiqwa ɣef wid d tid ibedden deffir-s, tilawin, arrac d teqcicin. Tules-as i tigawt-a kraḍet n tikal. Qqaren-d aman d laman, ma ulac-iten, tudert ur tezmir ara ad tili. Timetti tamaziɣt tesfillit aṭas i lxir ad yili yerna ad yagar. Tudert-nsen, seg zik teqqen s akal, ɣer tfellaḥt. Akal, ttwalin-t Yimaziɣen am tmeṭṭut. Ilaq ad t-yekrez ufellaḥ, ad as-ittakk aman ad isew akken seg-s ad d-ffɣen yimɣan ara d-yefken igumma neɣ izegza.
Aman i d-ttdeggirent teslatin deffir-nsent, d asfillet i sfilliten akken Rebbi n waman, Anẓar, ur ten-yettɣullu ara s usafar-a n tudert. Ssuturen deg-s ad d-ɣlin waman deg tallit iwatan akken lxir ad yagar, ad yili kra ara yekk useggas.
Tislit mi tekcem s afrag n uxxam-is amaynut, heyyan-as-d tagersa tesɛedda seg-s aḍar-is ayeffus akken tudert d tin ara yilin d tayeffust. Uɣalen fkan-as yiwet n tmellalt terẓa-tt ɣef uɣrab n texxamt-is akken ad tili d tin ara ittarwen. Mi tfukk s wansayen-agi akk, uwin-tt teqqim deg tesga, tilawin deg tlemmast n ufrag, kkatent urar, ttnekkarent-d s nnuba ɣer tqaɛet ad ceḍḥent. Ṭṭafarent anya i d-yettawi ubendayer bu yenzizen tekkat tḍebbalt.
Aḍris-a d tukkist seg ungal « Ccḍeb akked yiẓuran » yennayer 2970, tiẓrigin TIRA, Bgayet.
Tissulya timerbuḥin.