Lkanun d aɣerbaz n tutlayt taqbaylit.
Zzin-d i lkanun ad slen i tmacahut.
Lkanun d aɣerbaz
Deg uxxam-nsen d yaya-s Mennun i d taselmadt tameqqrant n teqbaylit, ternuḍ yemma-s Cabḥa d baba-s Akli ur nxuss ara ula d nutni deg yidles aqbayli.
Adeg amezwru n uɣerbaz deg uxxam d lkanun. Iɛeggalen n twacult akken ma llan ttezzin-as-d d ameqyas. Imeqqranen ad d-ttmeslayen, ad d-ssawalen timucuha, ad d-ttmalen timseḍsa akked temseɛraq, imecṭaḥ ad smuzguten, awal ur asen-yettruḥu. S tarrayt am ta i lemmden s shala tutlayt-nsen. Imarrawen-nneɣ, qḍeɛ ccek, akka i llan xeddmen, tasuta tettaǧǧa-tt-id i tayeḍ almi i d-tuweḍ ɣur-neɣ.
Ad teqqim kan Nna Mennun ad as-tserreḥ: « Amaaacahu !… » Aqerruy-is yeččur d timucuha, telmed-itent-id ɣer yemma-s d yaya-s. Ma d timseɛraq, aḥric ameqqran s temɣer i tent-tessen imi d argaz-is Akli, cwiṭ-nni i tedder yid-s, i as-tent-id yemlan. Ula d netta, yesɛa yiwen n uqerruy iwerrek s wayen akk yerzan tasekla timawt taqbaylit. Akka i yeqqar deg wawal-is uqbel ad d-taweḍ nnuba n temseɛraq: « Azal yellan n yitran deg yigenni i yellan n temseɛraq deg teqbaylit » Timseɛraq ssuturent-d tigzi d truẓi n uqerruy. S umata ttmalen-tent-id i yimdanen imeqqranen, maca ula d imecṭaḥ zemren ad kkin.
D tamɣart i d taselmadt n tutlayt.
?D acu-tt ? D acu-tt
Sin ṭṭsen, sin bedden ;
Sin ṭṭfen, sin ttemyewwaten ;
Ma d aneggaru itedden. I d-tenna Nna Mennun. Tfukk kan timseɛreqt-is, teɣli-d yiwet n tsusmi, izi ma iɛedda-d ad as-tesleḍ. Yal yiwen yettxemmim ad d-yaf tifrat-is akken ad tt-id-yefk d amezwaru.
Aḍris-a d tukkist seg ungal « Ccḍeb akked yiẓuran » n Malek Houd, tiẓrigin TIRA, Bgayet, yennayer 2970.
Mel-iyi-d tamacahut a yaya.