Ungal : « Ccḍeb akked yiẓuran »
Ungal-iw amezwaru
Ccḍeb akked yiẓuran
Ungal amezwaru n Malek HOUD : « Ccḍeb akked yiẓuran » ad d-yeffeɣ ussan-a ; d tarzeft n Yennayer 2970.
Tukkist :
Tal tikkelt uqbel ad d-yekcem umenzu n yennayer, Nna Mennun am tlawin n Tewrirt neɣ n tmurt n Leqbayel akken ma tella, tdehhu-d s tezdeg n uxxam. Ad tesleɣ iɣraben akked tɣerɣert n uxxam s wakal amellal, ad ten-id-tecweḍ akk s tumlilt. Ad tbeddel diɣen inyen n lkanun. Seg lexla ara d-tegzem s umger kra n tseḍwa n uzezzu ara terr ɣef uqermud n lḥara akken yir tiṭ ad tessuɣel, ad tuɣal akkin, ad teglu yid-s s kra n wayen i izemren ad d-yawi ayen n diri i twacult n Wat Umalu.
Tikkelt-a d tabernust tamecṭuḥt i teẓḍa i Yidir. Tfukk aẓeṭṭa n tcuḍaḍ-is, tzeggen win n uqelmun-is. Tettɛawaz alma tɛedda tlemmast n yiḍ d nettat d aẓeṭṭa akken ad tt-id-tekkes uqbel ad tt-id-yaf umenzu n yennayer. Ma yella ur tessaweḍ ara ad tfakk aẓeṭṭa-ines deg lawan, ad tessiwel i tnaragin-ines ad d-asent ad tt-ɛiwnent deg-s.
Mi ara d-yaweḍ umenzu n yennayer, agdud amaziɣ, anda yebɣu yili, ama deg tmura n Tmazɣa, ama deg tmura n umaḍal d tirni, yesfugul-it, yettmmagar-it s yiwet n tmeɣra yeččuren d lferḥ.
Deg tmurt n Leqbayel, tilawin ttnawalent deg yimensi n yennayer seksu s uksum n uyaziḍ i ttrebbint beddemma i wass-nni n tmeɣra.
Mi ara ɛeddin yiɛeggalen n yiwet n twacult taqbaylit ad ččen imensi, llal n uxxam ur tettettu ara ad d-tessers tijeɣlin i wid i d-yezzin i uḍebsi i iɛettren d seksu, am nettat, mmi-s Akli, tislit-is Cabḥa, mmi-s n mmi-s Yidir akked d wid ur nelli ara imir-nni din, mmuten am urgaz-is Akli neɣ tiwelliyin i izwejen mebɛid akked yiminigen ma sɛan-ten.
Ass-nni tuwi-d fell-asen ad ččen nnig n tawant ladɣa Yidir, akka i sfilliten i lxir ad yagar kra ara yekk useggas.
Ass n umenzu n yennayer, Akli yeddem-d mmi-s iseṭṭel-as i ucebbub-is i tikkelt tamezwarut. Asmi i d-tezzi ddurt, issewweq ɣer Tzerrajt, infeq-d aqerruy n uzger, ad t-id-niwlen i yimensi akken Yidir ad yuɣal d aqerruy, ad izeggir i lqum. Imaziɣen ttamnen aṭas, ḥemmlen ad sfillten akken ad asen-d-tas tudert d tin yezmer umdan ad yedder. Deg yennayer diɣen ferrun medden, d yiwet n tegnit i ttafen akken ad myeɛfun, ad ttun ayen i ten-yebḍan, ad uɣalen ad ttemlaɛin ma yella yegzem wawal gar-asen. D yiwen n wass n tumert ur netteǧǧa ara cwiṭ n wadeg i lkerh d tɣeccact. D tayri ara d-yakin deg wulawen n yimdanen. A wi yufan akk ussan n useggas ad uɣalen am umenzu n yennayer, yesddukulen imdanen ur ten-ibeṭṭu.