... Iman-is
Dda Lmulud
Iman-is d inigi
Irezzu-d ussan n tefsut
Awal qeṭṭiɛ am tefrut
Deg (yi)mi la ineggi
Iman-is a-t-an din
Yefreḥ wul-is s tidet
Icerrig tɣumm-it tfawet
Iberdan ha-ten leddin
Yekkes-itt-id seg lmut
S tefsut ṭṭreḍqen-d yijeǧǧigen
Amzun s teqbaylit i ttmeslayen
Dayen tenger tatut
Iman-is
Deg At Mlikec
Yettwanas amedyaz
Ccbaḥa yelsa-tt wawal
Taqbaylit terna azal
Ibudd-as acḥal d arraz
Ayyur-is d meɣres
Yezdi-t netta d usefru
Tamsalt tugi ad tefru
Ha-tt skudmal la tkerres
Abrid yenǧer ɣezzif
Asennan, idel-it leḥrir
Arkaḍ yuwi-d yebrir
Tamagit, ha-tt tettiẓẓif
Iman-is
Ajgu alemmas n tmaziɣt
Ul-is yefreḥ aṭas
Mi d-iwala ilmeẓyen
La ttsennin deg wawalen
Wid i tenna yemma-s
Yezga din yessaram
Lebɣi ad d-yazzel d tazzla
Zeddig, d aman n tala
Ad yeččar akk axxam
Ajgu alemmas n tmaziɣt
Taregragt d taddart-is
Timiḍt-is d Tawrirt Mimun
Ddunit, yeẓra-tt d amezgun
Amur, ad yaweḍ arraw-is
Iman-is
Adrar nn fad
Ay awal n lejdud
Ssiweḍ talwit i urgaz
Yufgen deg (yi)genni am lbaz
Ay iman n Dda Lmulud.
Adrar nn fad