…Aɛessas
Taẓebbujt taɛessast
Deg ubrid seg yixxamen-nsen ɣer tala, meḥsub deg tlemmast temɣi-d din yiwet n tẓebbujt anect-ila-tt. At taddart d tirni ttqadaren aseklu-a.
Win t-iwalan, ma yeṭall ɣer lǧedra-s i d-yettbanen meqqert nezzeh, ad as-ifek aṭas n leqrun deg leɛmer-is. Yiwen urgaz seg taddart ur yekkir yiwen n wass ad t-yelqem. Ǧǧan-t akken imi t-ḥesben d aɛessas n taddart. Ladɣa tilawin, ama n Tewrirt ama n tudrin-nniḍen i d-yettasen s waṭas, tin d-iɛeddan ɣef yiri-s, ad d-tcerreg cwiṭ seg ubruɛ n tqendurt-is, ad t-tɛelleq ɣer kra n ugeṭṭum n tesṭṭa n useklu-a. Mi ara tetteqqen tabeḥnuqt-is, ad tdeɛɛu, ad tesfillit ayen tebɣa, ma txuss deg tezmert, ma teqqim tburr ur tezwij ara nettat tettimɣur, ma tesɛa tiqcicin urɛad xedment axxam, ma ijaḥ urgaz-is deg lɣerba yettu-tt, ma ur tesɛi dderya, ma tettarew-d ala tiḥdayin… Ad ssutrent deg uɛessas yellan deg tẓebbujt-nni ad tent-yessiweḍ ɣer lebɣin-nsent, ad awint s ɣur-s ayen ssarament. Tin ur nezwij ad tezwej, tin ur d-nuriw ad d-terbu, tin yuḍnen ad tejji, tin ur nesɛi zzher ad tuɣal ad t-tesɛu, tin iwmi ijaḥ urgaz-is, ad d-yuɣal s axxam-is d warraw-is, tin i d-yettarwen ala tiqcicin ad tuɣal ad d-tesɛu aqcic… Dɣa Nna Mennun d teslit-is Cabḥa, acḥal d abrid i ssutrent deg uɛessas ad d-yefk aqcic i Wakli. A-tent-id ttrajunt…
Aẓru n Firmus
Aḍris-a d tukkist seg unga “Ccḍeb akked yiẓuran” n Malek Houd.