Truḥ teǧǧa-aɣ…
D inelmaden d tnelmadin n uswir wis 5 n uɣerbaz amezwaru Ɛecciw Buǧemɛa n Tezmalt i yuran asefru-a. Bɣan yis-s ad rren tajmilt i tmeddakelt-nsen i ten-yeǧǧan i lebda ass-nni n umhad 8 ṭuber mi tt-tedhem yiwet n tkarust, tama n ugafa n uzniq alemmas n Tezmalt.
Tawaɣit-a yeglan s teqcict n 10 n yiseggasen tḍurr imezdaɣ n Tezmalt merra, ladɣa imawlan-is, iselmaden-is, inedbalen n uɣebaz Ɛecciw Buǧemɛa d yinelmaden akken ma llan. Yiwen ur yenwi ad d-yeɣli yiwen ubaxix am wa ɣef kra n win iqerben Meryem. Aṭas n yimeddukal-is d tmeddukal-is n uɣerbaz i iruḥen wujhen s axxam n tmerḥumt ɣas ma yebɛeb ɣef temdint n Tezmalt, akken ad tt-walin awali aneggaru.
Kra n wussan deffir n tmettant-is, inelmaden d tnelmadin n krad n yismilen n uɣerbaz anda tella tlemmed, 5A, 5B, 5C s lmendad n uselmaden-nsen n tmaziɣt uran-d asefru-a. Inelmaden n yal asmil bḍan iman-nsen ɣef 4 neɣ 5 n trebbaɛ, tal tarbaɛt tuwi-d fell-as ad d-taru sin ar ukkuẓ n yifyar. Yifyar-agi mi ten-nesddukel fkan-d asefru-a i d-yuwin awal ɣef wayen ḥulfan yigerdan-a mi ten-teǧǧa Meryem.
A-t-an ihi wayen d yeqqar uḍris-a:
Truḥ teǧǧa-aɣ…
Meryem
Lmusiba i d-yeḍran
Teǧǧa aɣerbaz yettru
A Meryem tameddakelt-nneɣ ɛzizen
Truḥeḍ teǧǧiḍ-aɣ-d ccama deg wulawen
A Meryem, teǧǧiḍ-aɣ-d deg ṭṭlam
Aɣerbaz yeḥzen, tinelmadin, inelmaden
Seg wasmi i nesla
S wayen yeḍran yid-m
Ulawen-nneɣ zgan jerḥen
? Acimi i aɣ-teǧǧiḍ a Meryem
Fell-aneɣ yeɣli-d lweḥc
Ur nezmir ara ad kem-nettu
Dayen, tzedɣeḍ ulawen
Isem-im deg usefru ad t-naru
Ineggura ad t-id-afen
Takarust n ubaxix…
Temmut Meryem
Ḥeznen Wulawen
Yenɣa-tt bu tkarust
I d-irewlen i yemsulta
Teǧǧa-aɣ-d Meryem leḥzen
Mi truḥ dayen s igenwan
Ur netthennay ara
Mi tɣab ɣef uɣerbaz
Temmut meskint meẓẓiyet
Ula d gma-s ameɣbun
Ur yettaf d wi ara yeqqim
Temmut d taqcict d tamecṭuḥt
Temmut mi tt-tedhem tkarust
I d-irewlen ɣef yimsulta
Tuweḍ leɛfu n Rebbi
Ad nazen ssber i yimawlan-is
Inelmaden ar tura ttrun
Tɣaḍeḍ-ten aṭas aṭas
Gullen ur kem-tettun
Ad kem-id-ttmektin yal ass
Imeddukal-is inelmaden
Meryem temmut
Ulawen ḥeznen
Win i tt-yenɣan
Nessaram ad isɛeddi
Ussan-is akk deg usekref
Ad as-yeɛfu Rebbi
Iwseɛ-it fell-as i Meryem
Segmi temmut Meryem
Aɣerbaz merra yeḥzen
Tal tikkelt ttxayaleɣ-tt
Am wakken sdat-i i tella
S lmut-is yiwen ur yumin
Meryem d tameddakelt-nneɣ
Seg wasmi nella mecṭuḥit
Ma d tura ur nettuɣal ad tt-nẓer
Teǧǧa-aɣ-d lweḥc meqqer
Yuɣal akk ubraḥ d ilem
Meryem d taqcict yelhan
Deg wul-is aṭas n leḥmala
Ḥemmleɣ-tt am wakken d uletma
Tura mi truḥ dayen
Yal ass yettcedhi-tt wul-iw
Meryem, tecba lmalayek
Truḥ, dayen teǧǧa-aɣ
Teǧǧa ula d gma-s Malek
Ma deg wul-nneɣ ur tetteffeɣ.
Tura ulac-itt gar-asen…