Imelsa (Les innocents)
Tturaren kra yekka wass
tturarenYeffeɣ-d yiwen uɣerda seg uxemmuj anda yettidir netta d wayetma-s i tikkelttamezwarut deg ddunit-is. Imi i d-yessuffeɣ taqerruyt-is seg yifri, uwten-t-id yizenzaren n yiṭij ɣer wallen, iqmec-itent i snat. Yuɣal ileddi-itent-id yiwet yiwet. Ɣef wayen i tres tiṭ-is ad itewhem. Iwala rrbiɛ azegzaw, isekla deg yal tawsit, tiqucac-nsen ssudnent igenni seg wakken ɣezzifit, nnig-sen ttaffgen yigdaḍ yal yiwen s yini n rric-is, yal yiwen d acu i d taɣect-is. Ɣef tmurt, yesmuqul ɣer tweḍfin tiberkanin, ttecrurudent ger yijeǧǧigen, deg yimawen-nsent iɛeqqayen n yirden d temẓin. Arquqen n uɣerda amecṭuḥ ldin, qqimen akken, yetewhim kan irennu acku laɛmer yeẓri ayen akk i yettɛeddayen sdat wallen-is. Yeɛreḍ kra n yisurifen s ukukru. Yerna kra yuɣal tekkes-as tugdi, ittecrurud akken i s-ihwa. Iteddu iban-d lferḥ ɣef wudem-is almi i d-yufa iman-is deg yiwet n temrijt sdat n yiwen n lxelq, d aɣersiw, werǧin i t-iwala am tlufa-niḍen merra. Yal yiwen seg yiɣersiwen-nni yesmuqul deg wayeḍ acku yiwen ur yeẓri wayeḍ almi d ass-nni. Aɣersiw-nni wis sin d amcic.
Teḍra yid-s am uɣerda, d tikkelt tamezwarut i d yeffeɣ ula d netta ɣer berra ad yurar. Yufa-d sdat-s bu tbaḥlust-agi tarqaqant, taɣezzfant ad s-tiniḍ tugi ad tfakk. Yurar, yemɛebbar, iǧelleb, iqeṣṣer yid-s alarmi i d-yeɣli yiḍ. Imiren yal yiwen deg-sen yebren s axxam-is. Ḥaren ad awḍen ɣer tyemmatin-nsen akken ad asent-ḥkun amek i sɛeddan ass-nsen amezwaru deg berra.
Aɣerda yenna i yemma-s :”Ass-a mi ffɣeɣ ɣer berra mmugreɣ-d yiwen n lxelq amacek-it, meqqer fell-i, taqerruyt-is tga am ddabex, taɛrurt-is teččur d tifawtin timellalin d tifawtin tiberkanin, ḥulfeɣ i ccɛer-is d aleggɣan am lqaṭifa mi sendeɣ ɣur-s, urareɣ yid-s alarmi ɛyiɣ.
-Ad k-yexdeɛ Rebbi a nniya! Ad k-yečč am ulac wagi i terriḍ d ameddakel, wissen amek i d-tuɣaleḍ d amuddir s axxam, amek ur k-yegzir ara s waccaren iqeṭɛanen am ujenwi n duk-duk. Winna ay amehbul-iw d amcic, ulac acengu-nneɣ ameqqran am netta. D nekkni s yiɣerdayen i d učči n yimcac. Ḥader akka d tasawent ad tezziḍ ɣef lǧerra-s , ad k-isebleɛ ɣef tikkelt am wulac”. Akka i t-tweṣṣa yemma-s.
Akken i k-id-twessa yemma-k…..
Deg tama-niḍen, amcic mi yewweḍ ɣer yemma-s yemla-as ayen yesɛedda ɣef temrijt netta d uɣerda asefrarax.”Ass-agi a yemma urareɣ d yiwet n tewsit n uɣersiw yesseḍṣṣay mačči d kra lufan ad t-twaliḍ, ddaqes i d amecṭuḥ, ini n tḥedduf-is am yiɣed, taqamumt-is d ccuka, tfukk s kra n wanẓaden am claɣem, tabeḥlust-is d tarqaqant, d taɣezzfant ad s-tiniḍ tugi ad tfakk”. Mazal ur ifukk ara awal acku yemma-s tegzem-as-t, tenna-as:”A nnger-ik, inser-ak yimakli gar yifassen-ik ay aɛeggun, maca ccah deg rray-iw! D nekk ur d-ak-nemli ara d acu i ntett nekkni s yimcac. Ɣas iɛedda uzaylal fell-ak ass-a, azekka mi ara tuɣleḍ ɣer temrijt-nni, ad temlileḍ d umeddakel-ik aɣerda, teẓriḍ tura d acu i ilaq ad t- txedmeḍ, fiḥel ma ɛawdeɣ-ak-d s wadda”.
Amcic mi igen iḥar ad yali wass. Uqbel ad tefrari tafat yufa-t-id lḥal yekker. Mebla ma ixemmem yerra srid ɣer temrijt. Din yettraju arfiq n yiwen n wass ad d-yas ɣur-s ad uraren… Turart ara yurar yid-s yeẓra-tt d acu-tt, d turat taneggarut n uɣerda. Awudu kan ad d-yas…
Yettraju amumad akken… ad yurar yis-s…
Axxam n uɣerda d lmendad ɣer temrijt, kra yexdem umcic ɣef tiṭ-is, yettnezzih kan deg-s. Amcic yuyes, yebda asemɛirrew i wakken aɣerda ad s-d-isel ad d-yas ɣur-s. Aɣerda yessuffeɣ-d ala taqerruyt-is seg lɣar. Imi i t-id-iwala umcic yessawel-as yenna-as:”Iyyaɣ tura ad nurar am yiḍelli!”Yerra-as-d uɣerda, yenna-as-d:”Ur ḥerrec ara ay amcic, akken i k-id-tweṣṣa yemma-k i iyi-d-tweṣṣa yemma”.
GM: Aḍris-a d tukkist seg udlis « Timucuha akked temεayin » i d-yeffɣen deg