Taguri n uẓeṭṭa
Aẓeṭṭa yettḥuddu
Nna Mennun theyya-d akk leḥwal n uẓeṭṭa acku azekka n ssebt ad tger aẓeṭṭa-ines. D aɛdil ara tẓeḍ. « Way Akli ! Kker ad tezluḍ ayaziḍ-ihin azewwaɣ, ternuḍ amellal-ihin, azekka d imensi n tsegrut. I tenna Nna Mennun.
Yerbeḥ a yemma ». I as yerra Wakli i yemma-s.
Imir-nni kan i d-isuffeɣ Wakli ayaziḍ-nni azewwaɣ amaɣbun seg ukantu-ines, netta yesqaqay s ṭṭelq n ugerjum-is amzun yeɛqel s wayen ara d-yeḍrun yid-s akka n kra n ddqayeq ɣer sdat deg ufrag. Yuwi-d aman, yessared-as iḍarren yis-sen, iqebbel-it. Mi yessers yiwen n uḍar-is ɣef wafriwen-is yeldin, yemma-s teṭṭef iqejjiren-is s ufus azelmaḍ, s ufus-is ayeffus teṭṭef tama wadda n temgerḍt n uyaziḍ, ma d Akli s ufus-is azelmaḍ ɣeṭṭef tama ufella. S ufus-is ayeffus yeṭṭef afus n ujenwi n Dukduk i yessemsed imir-nni kan ɣef yiwen n ublaḍ. Isemma, yenna ayen zliɣ d leḥlal, Issers tama taqeḍɛant n lmus ɣef yiri n ufrux, itekka fell-as yuɣal ijbed-d s lexfafa lmus-nni ɣur-s, din din yerra-t akkin, idammen ẓgen-d. I sin yid-sen i serrḥen i uyaziḍ immezlen, iman iteffeɣ seg-s netta ittexbibiḍ ɣef leblaḍ n ufrag. Mi fukken s uyaziḍ azewwaɣ, din din uɣalen s amellal i iḍefren gma-s. Cabḥa tesseḥma-d aman, deg-sen ara terr iyuzaḍ-nni akken ad ten-treyyec s shala. Mi d-yeggra ala uqesbuḍ-nsen, teldi-ten i sin deg uɛebbuḍ s ujenwi, tekkes-d ijeɛbuben-nsen, tefka-ten i yimcac. Ma d tisiswa, tiqinsawin, ulawen, tger-iten deg tqedduḥt, ad ten-id-teqlu ɣef yimensi. Iyuzaḍ yeldin, ad asen-tzurer aɛeqqa n tisent akken ad iẓiden. Ad tuɣal ad ten-tger deg uḍebsi ameqqran, fell-asen ad tkub taccuyt ma ulac ad tt-qqden yimcac. Azekka ad ten-id-tniwel i yimensi n tsegrut ara ččen yinebgawen ara d-yasen d iwaziwen ad ɛiwnen Nna Mennun deg tguri n uẓeṭṭa-s.
Nna Mennun kullec ɣef tiṭ-is, ayen akk i ilaqen ad d-yewjed theyya-t-id. Tirigliwin n uẓeṭṭa beddent, qqnent ɣer tsariwin n ssqef s temrart, tayuga n yifeggagen ɣef wudem n ufus, iɣunam, axdur, tijebbadin, tayaẓilt neɣ snat, isegra, ilni, tikurin n yided, ifassen n uḍraf, timsuhal, ikuyna, … Ur tufiḍ d acu i tettu.
Azekka-nni n ssebt, zik akk i d-kkren. Nna Ǧuhra telḥeq-d iḍelli tameddit, ɣur-sen i tensa. Deg tala, Nna Mennun twala Werdiya n At Waɛli, tessuter-as ad d-tas, ur tt-tɣull ara, ladɣa mi akka ara uɣalen d iḍulan.
Taguri n uẓeṭṭa
Tijenyurin n uẓeṭṭa llant akk, qqiment deg ufrag tessent lqahwa s lesfenǧ i asent-d-tefka Cabḥa. Fukkent kan tissit n lqahwa-nsent ɛeddant ɣer umahil i tent-yettrajun. D Nna Mennun i d tamrayt fell-asent, d nettat i d-yettakken iwellihen ma tella yiwet iɛedda fell-as uzaylal neɣ tettu kra. D Akli i isemren isegra s tefḍist, yeǧǧa gar-asen azal n ṭam neɣ tẓa n yiɣallen. Nna Ǧuhra teqqim ɣef yiman-is, teṭṭef asegru azelmaḍ, ma d Nna Mennun teṭṭef ayeffus. Werdiya tbedd deg tlemmast, takurt n yided deg ufus-is, tettawi lxiḍ-nni akka d wakka. Tikkelt ad truḥ ɣer Nna Ǧuhra, ad as-telḥeq ided ara tesɛeddi gar tisegra, tikkelt-nniḍen ad tuɣal ɣer Nna Mennun ad texdem akken i texdem tmezwarut. Tettruḥu, tettuɣal, ɣef way-agi i neqqar i win yetqelqen, ur yethenna ara, ad yettruḥu ad yettuɣal deg yiwen n umkan, neqqar-as yeggar aẓeṭṭa. Mi tfukk tguri, aẓeṭṭa ad yesɛu azal n semmus ar sdis n yiɣallen deg tehri, ad kkrent ad t-qelɛent. Tal yiwet ad teṭṭef deg yixef n tɛekkazt i d-skecment gar lexyuḍ n uẓeṭṭa, ara jebdent. Ad uɣalent as d-sɛeddint diɣen gar wulman ukkuẓ n yiɣunam. Akka ilaq ad d-rnunt snat n tlawin-nniḍen, d tinaragin i d-yeggaren iman-nsent ad ɛiwnent.Tal yiwet ad d-tekk s yiwet n tama n uẓeṭṭa, ad teṭṭef sin n yixfawen n sin n yiɣunam s sin n yifassen, tayeḍ diɣen s tama-nniḍen n uẓeṭṭa ad texdem kif kif. Ad ssalayent, ad ttsubbunt iɣunam, nutenti ad teddunt deg yidis. D tagi iwimi qqaren tamhelt n ccḍeḥ s yiɣunam, tettarra lexyuḍ n uẓeṭṭa serḥen ur ttembbaban ara. Mi d-kksent yiwen seg ukkuẓ-nni n yiɣunam, ad grent yiwet n tɛekkazt deg tama taqernit n uẓeṭṭa, fell-as ad ssersent afeggag, ad ɛeddint ad ttlent fell-as aẓeṭṭa. Afeggag ad ires ɣef tgecrar-nsent, s yifassen-nsent ad t-ttlent alma ifukk. Ad t-ddment akken alma d tasga n uxxam anda i beddent snat n trigliwin. Ad kksent ccwiṭ n tuttla i uẓeṭṭa, ad salint afeggag alma alaḥal tama ufella n trigliwin, s temrart ad t-qqnent ɣur-s. Ad d-refdent afeggag wis sin, s tamiwin-nni ines yeldin ara d-kecment trigliwin, deg tama wadda nsent flant. Syin i d-neggar timsihelt, d iɣes n kraḍet tmerwin n yisanṭimen deg teɣzi, ara iqerɛen afeggag ur yettḥerrik ara. Afeggag-nni wadda, deg yiwen n yiri yesɛa tixemjatin, syin i d-nesɛedday asegnu, d lxiḍ yellmen s ucebbub n tullas, d netta ara yeqqnen aẓeṭṭa s afeggag. Azal n sin n yiɣallen d asawen ɣef ufeggag wadda nesɛedday-d axdur. Ɣef uxdur i d-yettili usennet s yilni, lxiḍ ad isennet wayeḍ xaṭi, akken alma d taggara. Nnig uxdur yella uɣanim yettalin yettsubbun. Nnig n uɣanim-a, llan sin-nniḍen. Yiwen ddaw n rruḥ n uẓeṭṭa, anda i nmudgen ulman n uẓeṭṭa, wayeḍ nnig-s. Wa yeqqen ɣer wayeḍ s yixfawen-nsen. Nettarra deg tal tama n uẓeṭṭa ɣef yiri n trigliwin ijebbaden, d tiɛewwzin tiɣezzfanin, ixfawen-nsent senden s ifeggagen, deg tlemmast ttarrant-d axdur s tama-nni yettemgadalen tid n yifeggagen. Akka aẓeṭṭa yejbed ɣef teɣzi-s, ur yettakk ara lwi.
Ccḍeḥ s yiɣunam
Akka, aheyyi n uẓeṭṭa yuweḍ ɣer taggara-s. Yeggra-d kan tura ad as-d-nsiɣ, lmeɛna-s ad d-nger lxiḍ amezwaru n uḍraf gar wulman n uẓeṭṭa, ad t-neddez s tyaẓilt. Mi ara d-nẓeḍ yiwet n tfuɣelt, aḥric n yini iman-is, ad d-nernu tayeḍ fell-as s yini-nniḍen alma nessaweḍ azal n tiddi ara nettel ɣef ufeggag wadda mi d-nserreḥ azal-is seg ufeggag ufella.
Ɣas ma yella d nettat i yettnawalen, i d-idhan d uxxam akk d tnebgawin, Cabḥa, kra ur as-iruḥ ɣef uheyyi n uẓeṭṭa, telmed acḥal d taɣawsa ɣer temɣarin n lbaraka. Ad tfakk kan lecɣal-is n yal ass ad tɛeddi deffir n uẓeṭṭa, ɣef yiri n temɣart-is ad teddez s tyaẓilt. Deg snat yid-sent, ur ttakint ara akk i wakud yettɛedday. Awal yettawi-d wayeḍ alma ufant-d iman-nsent ɣeḍlent-d yiwet n tiddi.
Teẓḍa-d yiwet n tiddi.
Aḍri-s d tukkist seg unga « Ccḍeb akked yiẓuran »