Axxam s twizi
Tɛedda ddurt igmaḍ wuɣur tewweḍ terbaɛt n lxir ugaren ayen tessarem. Ur ɛeṭṭlen ara, iwaziwen bdan amahil-nsen i d-yeḍran deg yiwet tegnit yeččuren d tumert, taḍsa d uqesser. Win ibennun ibennu, win yettliwin yettliwi, yal wa d acu i d ccɣel-is. Teḍra yid-sen am yiwaziwen n zik-nni deg tmurt n Leqbayel i yettsuɣun mi ara bennun axxam i yilemẓi ara izewjen ; « Idɣaɣen, takurt, ay imawlan n tmurt ».
Zrin semmus n wayyuren, Ɣilas yerza s ameddakel-is Aksil, yefka-as tisura n uxxam-is amaynut yerna-as kra n yidrimen i d-yeqqimen swayes ara iqabel tameɣra-s. Aksil ur yumin ara, mi tent-id-yeṭṭef qrib yeḥbis wul-is deg wakken yekkat deg lfeṛḥ. « Ur ẓriɣ ara akk amek ara ken-snemmreɣ kečč d yimeddukal-ik d wid akk yekkin deg twizi-a. I as-yenna i Ɣilas.
D nekkni ara k-isnemmren imi d kečč i d tamentilt n tuɣalin n twizi. D yiwen wansay iɣef tbedd tmetti taqbaylit. Nenwa dayen yeǧǧa-aɣ, s lebni n uxxam-ik nerra-t-id, nassaram d win ara yeqqimen i lebda. »
Aksil yerza ɣer tmazirt i tikkelt tamezwarut segmi i yebded uxxam-is. Ur t-ǧǧin ara yimeddukal ad d-iger tikkelt afus deg lebni-s acku walant yeɛteb aṭas mi yella akken ixeddem kan iman-is. Nnan-as alma newwi-ak-in tisura n uxxam-ik ara d-taseḍ. Yufa tamazirt-is tbeddel. Deg tlemmast-is yeɛnunec-d yiwen uḥariw iɛeddan akkin deg lehhu. Ɣur-s yiwen wanag, tama wadda d axxam n twacult-is, baba-s, yemma-s d watmaten-is, ma d tiɣurfatin iseqfen s uqermud d tamezduɣt-is netta d tin ur nettɛeṭṭil ara ad d-ternu ɣur-sen. Yemmut umeɣbun n Rebbi deg lherḥ, ittefniniḥ kan iman-is kra ara yekk wass. Deg uxxam ɛeqlen-t, yella kra i ibeddlen deg-s, akras-nni n unyir-is yekkes-as ɣef tikkelt, taḍsa terza-d ɣur-s, d tin ara yezgen ɣef wudem-is.
« Ittaččar-d wul-iw s lferḥ mi k-id-ttwaliɣ yeḍsa-d wudem-ik a mmi. Aṭas aya ur d-tecmumḥeḍ ula d acmumeḥ amecṭuḥ, teḍra yid-k amzun tbubbeḍ akk iɣeblan n ddunit. I as-tenna yemma-s Lǧida.
Ih a yemma, almi d tura i ḥulfaɣ i yiman-iw fessuseɣ, taɛekkemt i lliɣ ttbabbaɣ-tt kra kkan yiseggasen yezrin, ẓwiɣ-tt ɣef uɛrur-iw neɣ di tidet kksen-tt fell-i wid yefkan azal i yinsayen ucbiḥen n teqbaylit.
Ur fhimeɣ tigert deg wayen akk akka i d-teqqareḍ, maɛna imi telliḍ kan bxir d win akk i d rrbeḥ-iw, ad k-issuffeɣ Rebbi a mmi ɣer wayen akk i tebɣiḍ.
Tanemmirt a yemma, ad isseɣzef Rebbi deg leɛmer-im akken ad tegzuḍ d acu i d ssebba n lferḥ-a i d-yuragen fell-i ».
Yeǧǧa-tt mi yeffeɣ deg tlemmast n ufrag, ifassen-is refden s igenni, tdeɛɛu ɣer Rebbi ad ikkes akkin fell-asen ṭṭiq, ad d-ifeṛṛeǧ fell-asen tikkelt-a.
Tdeɛɛu ɣer Rebbi ad ikkes akkin fell-asen. ṭṭiq