Tadyant n Dda Ɛacur
8 mayyu 1945
Dda Ɛacur ittaɣ idrimen ɣef uḍar-is i n-yeǧǧa deg Taruft deg ṭṭrad-nni amaḍlan, dɣa yuɣal d ameɛdur. Kra n tigawin timecṭuḥin ur asent-yezmir ara. D tameṭṭut-is i t-yettliwin, tezga-as-d d lmendad meɛna txeddem ayen tebɣa. Ad teqqim kan ad as-tini ad k-ǧǧeɣ ad tfuḥeḍ. Ameɛdur ameɣbun yettaṭṭaf imi-s, kullec yettarra-t ɣer daxel. Yettagad ad d-yeggri iman-is, dɣa terra-t tmara ad yeṭṭef tama wadda, akken d-tenna Werdiya akken.
-Ad k-yexdeɛ Rebbi a zzman aɣeddar! I yeqqar mi ara d-immekti iman-is d ilemẓi, ssifa, tazmert, addud ɣef sin n yiḍarren, tabɣest, tirrugza, kra n tɣara talsit ad tt-tafeḍ ɣur-s. Meɛna yiwen ur yeẓri d acu i aɣ-d-ittheyyi uzekka. Netta d Wakli ameqqran d tizziwin. Akken i ten-mubilizin deg ṭṭrad-nni amaḍlan wis sin. Akli yemmut deg ugni n yiseɣ am ddeqs n watmaten-is, ma d netta yeǧǧa-n aḍar-is.
Akli ameqqran d Dda Ɛacur d itirayuren deg yiserdasen n Fransa. D acu i uran fell-asen deg tɣamsa : D imekdiyen i tsellat-nsen, itirayuren izzayriyen seknen-d yiwet n tebɣest tameqqrant deg yimenɣiyen yewɛren nezzeh, d wid yenɣan aṭas n medden deg ṭṭrad amaḍlan wis sin. Anda teddiḍ, deg Biljik, Fransa, Ṭṭelyan, Tunes, nnuɣen ɣef yiseɣ afransis.
Imḍebbren imeqqranen n lɛesker n Fransa, ttarran Izzayriyen, Imerukiyen d Isanigalen deg wadar amezwaru mi ttemyewwaten d yiserdasen almaniyen. Ɣellin msakit am yizan, d aḥuccu i ten-yettḥuccu rrsas. Win yemmuten yemmut ma d wayeḍ yejreḥ. Wissen d acu seg tfekka-s i as-d-qelɛen s tersast neɣ s tremmant mi ara tt-id-idegger ucengu n teswiɛt, ad d-taweḍ kan ad tfezzeɛ, kra n win yellan anda akken i teṭṭerḍeq ad as-teg kra ur nelhi ma ur tegli ara yis-s.
Azal n 135000 n Yizzayriyen i yekkin deg ṭṭrad amaḍlan wis sin ɣer tama n Fransa, tamurt tamharsant n tmurt-nsen.Nnuɣen mgal Inaẓiyen n Alman. Aḥric ameqqran deg-sen, teḍra yid-sen am yiberriq, seg wasmi i ffɣen i yixxamen-nsen ur d-uɣalen. Aṭas n yimnaɣen izzayriyen i yeɣlin deg wakal n Taruft.
Kkren ɛawnen tamurt n Fransa, ḍemɛen deg-s aṭas. Nnan-as ad nernu Inaẓiyen, ad d-teɣli telwit deg ddunit akken ma tella. Msakit, imeɣban n Rebbi, wid tezdeɣ nneyya, ɣelḍen nezzeh imi amharsan d amharsan, amcic dayem d amcic, ur yettbeddil ara. Kra n yimyenɣen nnuɣen seg wul, llan wid yefkan tudert-nsen d asfel, nnuɣen mgal acengu n Fransa, taggara ur rbiḥen yiwet. Mi d-uɣalen ɣer tmurt-nsen, ladɣa wid izedɣen deg temnaḍin n Sṭif, Xerraṭa neɣ Agelmim, yekker ubaxix din, ufan-d imawlan-nsen mmuten, tikwal d tirni, yiwen ur d-yeqqim. D Fransa i yenɣan Izzayriyen. Deg Fransa akked tmura n ddunit, imdanen sfuggulen s ccḍeḥ d ccna, ferḥen mi yeɣli lbaṭel, mi yefra ṭṭrad, tfukk tmenɣiwt. Deg tmurt n Zzayer imir-nni i tebda, nnɣan Yifransisen amdan, aɣersiw s ubumbardi war aḥezzeb. A-t-an lxir i yerra Ufransis i wid yennuɣen yid-s akken ad ɣeḍlen Alman isemhersen aṭas n tmura deg Taruft. Lxir yuɣal-asen d ixmir, akken yeqqar wanzi-nni : « Lufan yettuɣal lxir, talfi yuɣal i uzger; ad yekrez akal seg wasmi ara d-yekker, taggara ad ɣlin fell-as s yijenwiyen ».
Uɣen azger d tarbaɛt