Tebrek-nni n tefsut d yixulaf-is
Ixulaf n tefsut
Ifassen-nnsen d ilmawen
Ma d ul yeččur d asirem
Iẓuran n laɛqel ddubzen
Ffɣen ad kksen lhem
Leɛyaḍ, ccna , idɣaɣen
Ɛewlen-d f lbaṭel ad yeddrem
Ziɣen rrṣaṣ yettraju-ten
Wa yemmut wa yettwaɛdem
Kkren ad ɣeḍlen lbaṭel
Ugin tudert n waklan
Rẓan azaglu d unzel
S tfenṭazit uwḍen s itran
Mačči d seksu i d-yeftel
Win iḥekmen s yiḍan
Yeftel aḥlalas n ddɣel
Inawel nnɛi n yigerdan
Iḥmel-d wasif n zɛaf
Yid-s, yuwi tikerkas
Tbedd tidet tfukk akraf
Tajmilt i yat n tissas
Mmi-m yecba Asefru
Dduklen am yiwen n uglaf
Zzin-as i zzman amessas
Tafsut tefka-d ixulaf
Ttɛiwiden i tmurt lsas .
Uwin abrid n yimezwura
Wid i d-iḥellan tamurt
Suɣen yak mačči s tuffra
Tinettit-nneɣ d taqburt
Tamaziɣt mačči d kra
Fell-as nezzi am terbut
Ayen i d-yernan sufella
D taččart i d-yeččur tawwurt
A tayemmat ur ttru
Tasa-m ɣas ma teḥdaqqer
Mmi-m yecbeḥ d asefru
Yefka tamsirt i uḥeqqar
D amedya ur nkennu
Amezruy ad s-yeg leqrar
A Taqbaylit slilew
Tasa-inem teḥya-d aẓar.
Tamurt n lhemm
Ruhen yilmeẓyen d asfel
Ugin tamuḥeqranit
Teḥzen tmurt n Leqbayel
Imeṭṭi ssbaḥ tameddit
Seg zik tettnaɣ d lbaṭel
Tugi ad tezdi d twaɣit
Idim n Kamal yuzzel
Ini azeggaɣ yedel-it
Rrṣaṣ, yerra-t d aɣerbal
Yeɣli ar tmurt ɣef wudem
Yeḥsa ad t-gren ddaw Wakal
Iger-d tabɣest n yizem
-Tilelli- Yesɛan azal
S yidim yura-tt tseggem
Tezga (ɣe) f lḥiḍ Amellal
D asmekti n tmurt n lhem
Ixulaf n tefsut
S tefransist yura « LIBERTE »
D awal i ixuṣṣen deg tmurt
Tewwet rreẓa deg tmetti
Ɣef ugdud tuɣal tewwurt
Skudmal tafat txetti
Yerna-d rrṣaṣ ɣef tefrut
Lbaṭel aberkan ifetti
Yettnadi nnger n tefsut.
Achal d ilemẓi yeɣlin
Aɣref yekker-d yiwen h
Rẓan arrac ur knin
Cergen merra ulawen
Neggul ur nettissin tittin
Ɣas immuger-aɣ-d usawen
Yura umezruy s yidammen
N warrac gren ddaw n tmedlin
Tamazight
Kamal IRCEN