... Nnuba-s
Timeqbert
Axemmem yezga (de)g (yi)ẓekwan
Ar tura asrad ur t-ufin
Lɣaci n tmeqber kwan
(de)G uɣbel n zzman ttɛebbin
Am waḍu ihuzzen igran
Lerwaḥ-nsen ttleɣwin
Tudert n tarwa i d-ǧǧan
Tezdeɣ daxel n tfexrurin
Amek i llan, and(a) i d-ggran
Gar-aneɣ zgant-d tmedlin
Jeddi agellid
A win d-ittarran tudert
Fell-asen eǧǧ-iyi ad dluɣ
Teɣli d ixerban taddart
Taḍunt n ugdud-iw tluɣ
Ad awiɣ yid-i tazmart
Yal tama n tmurt ad tt-bḍuɣ
Tirrugza ad d-temɣi am tamart
S yiɣsan nekk ad tt-sɛuɣ
Ɣer tarwa ad d-tazzel tafat
S aẓekka imaren ad d-jbuɣ
Leslaḥ yesɛa d tadukli
Qqim deg uẓekka-k a jeddi
Mmi-k yezmer i yiman-is
Leslaḥ yesɛa d tadukli
Tazmart tezdeɣ lsas-is
Nnuba-s yiggas ad d-tɛeddi
Am yemma-jida ar rrfis
Tufalit-is d tilelli
D awal yuran (de)g unyir-is
iṭij mgal asigna
Agu ma iɣumm igenwan
Yella yiṭij ad t-yekkes
Ma tuɣ times llan waman
Ma neɣlen fell-as ad tnes
Yettili wass i wussan
Ass-nni kullec ad yeḥbes
Ittlal-d ayen i iɛeddan
Yettas-d meqqrit tuɣmas
Ihemmaj deg win i t-yenɣan
Yekkat ad yemḥu rriḥa-s.