Tikli n 14 yunyu
Tikli tgaâmirt n 14 yulyu 2001
Aεeẓẓug
(Tikli n 14 yunyu)
Sin wagguren d tiyita
Ɣlin nnig n meyya
Ddaw n rrṣaṣ n ujadarmi
Tikliwin ta deffir ta
Ssuturent lehna
Wwint-d acḥal d amerẓi
Tin n rbaεṭac mi d-teḍra
Tegguj lluma
Aselway, yak yergagi
Amek ara tefru tura
Tugim neyya
Tebɣam leεwej ad yili
Tegrem-d uccen s tuffra
Ihemmej yenɣa
Ddaw yeẓri n Ḥabib Cawqi
Lektubat wa deffir wa
Segmi i tebda
Yeqres uneɣlaf-nni
Ulac am ta deg ddunit akk
Seg lmut n Masinisa
Ur tbeddel ar ass-a
Idim yenɣel d leḥmali
Adabu ur d-yesli ara
Yurew-d nnmara
D tarẓagant am yilili
Yezreε lɣecc (de)g tmura
Ibeṭṭu tarwa
Ddeb-ines d Aqbayli
Ifaq-as mačči d kra
Yugi tabarda
Ɣef uεrur n urgaz ilelli
Lqedd-is, yezdi-t yedda
Lbaṭel yekna
Yekkat akken ad yeɣli
Abrid n tidet yebna
Tamaziɣt tella
Ass-a, azekka ad tili
Akkagi ulac kra i d-yellan…
Snat n twaɣiyin ḍrant-d deg wayyur n yunyu: yiwet deg wass-is wis 25 deg useggas 1998, d timenɣiwt n uɣewwaɣ Maεṭub Lwennas s ufus aɣeddar, tayeḍ deg wass-is wis 14 deg useggas 2001, urǧin d-teḍri yiwet n tikli am tin ahat deg umaḍal akk. Sin n yimulliyen-a ur ilaq ara yiwen ad ten-yettu. Yelha ma yemmekta-ten-id yiwen…