Belqasem d umussu
Krim Belqasem
Yeffeɣ uqbel ad ffɣen
Imi ifaq uqbel ad faqen
Yennuɣ mgal acengu
Deg tegrest d unebdu
Yexdem kan ayen i ilaqen
Lkaɣeḍ d netta i t-yestenyan
S ufus-is ayeffus
Tuɣal-d tlelli i yimawlan
I d-telsa d abernus
Nenwa tfukk tudert n waklan
I nmenna yusa-d drus
Buberrak iɣumm tamurt
Iskuffer-itt meskint
Tectaq ussan n tefsut
Tifdulin merra undint
?Tamurt n lejdud temmut
Awal aneṣli ugin-t
I yixef, rran tagennurt
Tiwurra n tatut ldint
Tikliwin n tefsut 2019
Metwal ccerq i nsuɣel
Syin i d-nugem tiɣyulit
I yezban d Leqbayel
Ugaden aṭas tameddit
Leɛqel iteddu ad yemxel
Mi i as-d-tezzi twaɣit
Wwten-t, ḥebsen-t
Regmen-t, ɛefsen-t
Mi d-yenna ala i lbaṭel
Urǧin yessusem yiwen n wass
Isuɣ-d ayen i t-iḍurren
Ttnadi ad yettu yemma-s
D win-nniḍen ara t-rren
Axxam, ttɛiwiden-as lsas
Kkaten amek ad t-sddermen
Winna akken i ifaqen
Seg yimezwura yeffɣen
Deg Alman i t-xenqen
Mačči d yiwen kan i kksen
Tamurt aṭas i tt-ɣurren
Seg warraw-is ɛzizen
Tikli n 14 yunyu 2001
I d-yeggran d lxubata
Wid i d-teǧǧa fransa
Ar tura xeddmen fell-as
Dhan-d kan d tukarḍa
Aṭas i iɛuden tefra
Aɛdaw, ibeddel ssifa-s
Ɣzen i tmurt aẓekka
Ur tt-id-ittaf uzekka
Akken i nwan ad sen-d-tas
A belqasem ! Wi ad k-yeḥkun
D ayen yelhan i d-iteddun
D aseɣres i t-id-sɣersen
Agdud yekker-d am yiwen
Yenna i wi k-yenɣan: « Ɛeffeṭ ! »
Kkes aɣilif tamneḍ-t
Yuwi abrid yessufuɣen
Ad awen-yeqqar: « Tanemmirt
Ɣef wayen akk i txedmem
Deg yigenni tufeg-d tedbirt
Tzul-ik-id ay izem ».
Zzayer
Malek HOUD, Tazmalt-Bgayet.