Yiwen Uzzayri yules-d i tedyant yeḍran yid-s
Tamettut-iw…
Aḍris-a yuran deg tazwara s tefransist send ad t-id-rregh ɣer teqbaylit, ufiɣ-t deg uɣmis « El Watan », ameskar-is d Fariz BRESKI, ɣriɣ-t iεǧeb-iyi aṭas, ahat ula d kunwi ad awen-yeεǧeb, ɣrem-t ihi….
Yiwen Uzzayri yules-d i tedyant yeḍran yid-s
Lliɣ nehreɣ takerrust deg ubrid n tuɣalin Seg New York ɣer Montreal anda zedɣeɣ ata tura nnig n 20 n yiseggasen aya.
Tamurt n ughrum-iw
Mi uwḍeɣ ɣer tlisa, fkiɣ lekwaɣeḍ-iw i yiwet n tmeṭṭut n yimsezgaren (douanes), imi teɣra “Adeg n tlalit: Lezzayer”, tenna-iyi-d: “Amek tettili Lezzayer?
Zemreɣ ad d-iniɣ telha. Ayen ssarameɣ d skudmal ad tlehhu.
Seg melmi akka i tettidireḍ deg Canada?
Mačči aṭas aya i qefleɣ 20 n yiseggasen.
Melmi i trezfeḍ i tikkelt taneggarut ɣer Lezzayer?
Akka tura, zrin 2 n yiseggasen”.
Tmuqel-iyi-d s ucmumeḥ, tenna-iyi-d: “Anta i tḥemmleḍ ugar tayeḍ, d Lezzayer neɣ d Canada?
Amgired giɣ gar Lezzayer d Canada am win giɣ gar yemma d tmeṭṭut-iw. Tameṭṭut-iw d nekk i tt-yextaren, tesḥer-iyi s sser n ssifa-s, ḥemmleɣ-tt, ar ass-a tayri-w ɣur-s d tameqqrant, maca ur tezmir ara akk ad iyi-tessettu yemma. Ur xtireɣ ara yemma, maca ḥsiɣ nekk ines, tettayal-iyi, ur ttiliɣ bxir ala deg yirebbi-s, ur iyi-d-iɣelli imeṭṭi ala ɣef tayet-is.
Lezzayer-iw
Teqfel apaspur-iw, tmuqel-iyi-d nettat tedhec, tenna-iyi-d: “Nsell dima d akken tudert deg Lezzayer mačči d tin isehlen. Amek akka i tḥemmleḍ tamurt am ta?
Tebɣiḍ ad d-tiniḍ “yemma”?
Teḍsa-d, tenna-d: Ad as-nini akka d yemma-k.
Yemma, ahat d tigellilt, ulac ɣur-s s wacu ara tliwi tazmert-iw, ur tesɛi s wacu ara txelles amsujji, maca leḥnana n yirebbi-s mi ara iyi-t-id-tger, lḥamu n tayri n wul-is mi ara iyi-d-teḥnec s yifassen-is, sseḥlawen-iyi akken i ilaq.
Glem-iyi-d Lezzayer.
Yemma…
Ur tt-id-yefki ara Rebbi s ssifa mellulen, maca ma twalaḍ udem-is d talwit ara kem-ikecmen. Ur tesɛi allen tizegzawin, maca tamuɣli-ines tesserkad. Iselsa-s d iḥerfiyen, maca deg yiran-nsen tettawi tamella d rreḥma. Ur tettcebbiḥ ara iman-is s wureɣ d waref, maca deg umgerḍ-is tetteqqen azrar n tyedrin swayes tesseččay kra n win yelluẓen. Iqeṭṭaɛen d yimukar ɣurren-tt deg wayla-s maca tezga tettecmumuḥ.
Terra-iyi-d apaspur-iw tenna-iyi-d:
Lezzayer i ssneɣ d tin i ttwaliɣ deg yigdilen n tliẓriwin maca urǧin ufiɣ ayen akka i iyi-d-tgelmeḍ.
Twalaḍ Lezzayer n tkarḍiwin n trakalt, ma d nekk ttmeslayeɣ-d ɣef Lezzayer i iteddun deg yiẓuran-iw.
Ssarameɣ takdit-ik i Canada ad d-tessiweḍ tin i tefkiḍ i Lezzayer. Bɣiɣ ad d-iniɣ takdit i tmeṭṭut akk d tin i yemma-k.
Gar-i d Canada yella yiwen n ugatu (un contrat), tettayal deg-i ad as-uɣaleɣ d imekdi yerna nekk ur lliɣ seg widak ur nettqadar ara iguta-nsen. Diɣ, nekk ssarameɣ ad teḥsuḍ d akken takdit-a, d yemma i tt-yeẓẓan deg-i.
Canada…
tadyant n Uzzayri
Fariz BRESKI
Tasuɣelt seg tefransist ɣer teqbaylit sɣur Malek HOUD