Iwaɣezniwen (Imestal)
Yezzi-d yibrir. Akka yal aseggas irezzu srid ɣer ccfaya n ugdud ad t-id-yesmmekti ɣef wayen yeḍran yid-s, ɣef tsiswa yeqqden ar ass-a, ɣef lbaṭel ur nesɛi tawant, skudmal yettnerni. Ad d-yesmmekti agdud yerran ɣer ṭṭerf tagmat, yesmuqul awal ur t-id-yuli mi as-tt-gezmen am tegzart n ujenwi netta yeṭallay am umergu amesruɛ.
Anza n yilemẓi yeɣlin s tyitiwin n rrsas n umestul aɣeddar, ha-t yettnazaɛ yal tikkelt mi ara d-yezzi lawn ideg yeɣli kanakken d aleqqaq.
Wissen? Ahat nestahel ayen akka iḍerrun yid-neɣ imi nugi ad necɛef, imi nɣunfa tagmat, imi akka tura yal yiwen ikkat i Muḥend-is…
Ugaren Iwaɣezniwen n tmucuha
Iwaɣezniwen
D acu-ten tura wigi?
D imdanen neɣ d mejɛer
Zerɛen lmut ɛinani
Deg luḍat akk d yidurar
Rekḍen tamurt d tirni
Ugaren amger ɣer yiger
S wacu ttmmagaren timri?
S rrṣaṣ afexsay d uɛbar
Yezzi-d aɛrur mi yerwel
Uqcic irejmen miḥyaf
Amestul ul-is yeddƔel
Iwwet s rrṣaṣ ɣer uglaf
Ala azgal ur izeggel
Wa yenɣa-t wayeḍ d akraf
Iẓri n tyemmat idderɣel
D tasa-s i gezmen di nnṣaf
Yal taddart tewwi lḥeqq-is
Ssenǧaq aberkan yuli
Yeɣli-d ɣef uxxam ufḍis
Tudert yerra-tt ur telli
Isdegdeg iɛeggalen-is
Abrid n tmeqbert yeldi
Leḥzen yelsa-d lekfen-is
Tunṭict yebḍa d imeṭṭi.
Neqqed anyir s useffud
Ccfaya ad d-teqqim i lebda
Lbaṭel yegla s ugrud
(ɣe)F lluḥ yeẓẓel i tarda
Neggul s Rebbi lmaɛbud
Ad nessebded tagduda
Tilelli ad s-nfek afud
Acku rrwaḥ ulanda.
Ifassen-iw d ilmawen Anda fell-ak?!..
Malek ḤOUD