...Amrig-iw
D alis i d amrig-iw
Yiwen ur as-yezmir i wawal ladɣa ma yebna ɣef tidet. Tidet yiwen ur as-yezmir ɣas ma tikerkas deg tmurt-nneɣ ala nutenti. Yiwen, ama d amdan ama d tarbɛt, ama d agdud ma yella yebna-tt ɣef tidet ur tufiḍ d acu ara yaggad, iswi i d-yecreḍ ad t-yaweḍ, ass-a neɣ azekka..
Awal d wawal ternuḍ awalen-nniḍen ad d-yeffeɣ d adlis. Adlis, ṭṭef-it gar yifassen-ik, anda tebɣuḍ tiliḍ, ɣer-it. Ala tussniwin ara d-yerzun s allaɣ-ik, ad tfaqeḍ i ddunit, yiwen ur yezmir ad k-ikellex imi tukiḍ. Dɣa win iwimi tettunefk ttrika d aɛekkaz yessen kan ad yewwet, yezga meskin yettaggad adlis d win t-yeqqaren… Maɛna akken yeqqar wanzi-nni:” Ayen tebɣuḍ tekkeḍ ay iḍ d ulaqrar ad yali wass”…
Taɣri deg tkarust
Amrig-iw…
Amrig i refdeɣ d adlis
Nek d gma afus deg ufus
Dayen tuweḍ lhedd-is
Ndel s yiwen n ubernus
Ama d aẓɣal neɣ d agris
Deg-neɣ tiyita ur tettrus
Tamsalt ad naweḍ s ixef-is
Ad neddu neẓmeḍ agus.
Yiwen ur yettakk afus
Ad nezwi akk ammus
Taqbaylit ad taf iman-is…
Daxel n uxxam n yidles n Uwqas
Malek HOUD