Inig ɣer tmurt n Fransa.
Tabalizt n yiminig
Tudert zeddigen, tin yettɛeddayen deg liser tettas-d seg tferkiwin ma ggtent yerna ma ttwaxedment. At Lḥif xuṣṣen, ulac ɣur-sen aṭas n wakal, ɣef waya i yekker Muḥend ad yinig ɣer tmurt n Fransa. Meqqar din ad yexdem, yugar umahil, yis-s yezmer ad d-yerfed cwiṭ tawacult-is i d-iɛelqen kan ɣer yiri-s, rnu-d lṭufan-is asmi ara d-ilal, d tawacult n At Lḥif ara yennernin. D imi wayeḍ ara tesseččayeḍ.
Akka i d tamurt n Leqbayel, tuget n yilmeẓyen-is tečča-ten tmurt n Fransa. Ala imɣaren d tlawin i iɛemren tudrin. Imiren, aseggas send ṭṭrad n tsellullit n Zzayer, yeshel yinig ɣer Fransa, ala s tkerḍa n tmagit i ikeččmen s akal-is acku Izzayriyen ttunaḥsaben deg tallit-nni meḥsub d Ifransisen.
-“Ihi ad truḥeḍ ad iyi-teǧǧeḍ iman-iw?” I tenna Ṭawes i urgaz-is Muḥend iḍ-nni send ad yeṭṭef abrid-is ɣer tmurt ur yessin.D acu ara txedmeḍ ?Ur uksaneɣ ara ula d nekk, lufan i d-teggra deg ufus-iw, talfi ur ttɛeddayeɣ ara i umnar n tewwurt n ufrag-nneɣ, maca akka i d ddunit ssusef s igenni ad d-uɣalent ɣer wudem-ik.
Ttḥadar ɣef yiman-ik, qqaren-d yewɛer usemmiḍ n Fransa.
Kkes aɣilif, ussan imezwura ad rreɣ ɣer xali Ɛmer, d netta ara iyi-d-inadin tamezduɣt d lxedma.
Ma d dagi kečč diɣen kkes aɣilif, ad beddeɣ akken i ilaq ɣer yimawlan-ik. Ur tufiḍ d acu ara ten-ixaṣṣen. Fkiɣ-ak lemɛahda n Rebbi d ayen i k-d-nniɣ ara yeḍrun.
-Ḥader cwiṭ iman-im tḥadreḍ wagi. Netta yessers afus-is ayeffus ɣef uɛebbuḍ icuffen n Ṭawes-akken qqarent tlawin aɛebbuḍ-is icekkeḍ- D wagi i d ayyur-is.
Paris
Tullist n tilawt sɣur Mass Malek Hud