Azekka ad yelhu
Ay aferṭeṭṭu amellal
Yettafgen(ɣe) f yijeǧǧigen
Ay aferṭeṭṭu amellal
Yettafgen(ɣe) f yijeǧǧigen
Iḍarren-iw ɛebban uzzal
Deg taẓẓayt d iqenṭaren
Tamurt ur ɣ-tefki azal
Tebɣa ad ɣ-terr d iɛeṭṭaren
«Amek ad yili uzekka?
Ma d tudert neɣ d aẓekka?»
A yemma ifehmen ddunit
Anef-iyi deg uɛebbuḍ-im
A yemma ifehmen ddunit
Anef-iyi deg uɛebbuḍ-im
Ḥulfaɣ i yimal diri-t
Ittduqqus aṭas wul-im
Ay ugadeɣ d talalit
Ḥsiɣ ad iyi-tezwi aglim
«Amek ara yili uzekka?
Ma d tudert neɣ d aẓekka?»
Ay akal n lejdud-iw
Win i d-ifkan irgazen
Ay akal n lejdud-iw
Win i d-ifkan irgazen
Anda ad i-yawi ubrid-iw
Ssrima ṭṭfen-tt yiderɣalen
S iɣzer deggren asirem-iw
Ifelleq ɣef yidɣaɣen
?«Amek ara yili uzekka
Ma d tudert neɣ d aẓekka?»
A Rebbi acimi akka
Tamurt-iw ul-is yeqber
Tlatin n yiseggasen aya
Leḥzen yugi ad iṭṭixer
Tugdut ur tesɛi nnuba
Ayen iḍerrun d asmesxer
A Rebbi acimi akka
Tamurt-iw ul-is yeqber
? «Amek ad yili uzekka
Ma d tudert neɣ d aẓekka?»
Ar lejba walaɣ tafat
Tettmurud (de)g tikli ur teɛjil
Ar lejba walaɣ tafat
Tettmurud (de)g tikli ur teɛjil
Abrid-is metwal taddart
Yezdeɣ ugdud agujil
Ad s-tfek acḥal d tazmert
Ad yeḥlu ar sdat lǧil
«Azekka arrac ad ḥlun
Ad yelhu i d-iteddun ».
«Azekka arrac ad ḥlun
Ad yelhu i d-iteddun ».