Amusebbel amecṭuḥ
Deg ṭṭrad n teslullit taɣelnawt, Bubekker yella d amusebbel ɣas ur iɛedda ara 16 n yiseggasen deg tudert-is…
Akken tebɣuḍ tɛasseḍ iman-ik, yiwen wass kan ad tettwiṭṭfeḍ. Daɣ netta, akka i teḍra i Bubekker ur nessin aɣfal. Maca ur ɣeffel neɣ qqim…
Yella yiwen n uqcic, d nned-is, d mmi-s n yiwen iqelben akebbuḍ-is, yettawi yettarra i ucengu n tmurt. Am baba-s am mmi-s, kra gan wid ssnen yuweḍ s lɛejla anda ur nlaq ara. Acḥal n tikkal i llan d ssebba n tmettant n wamayendin n yimdanen, ahat aḥric ameqqran deg-sen iruḥ deg lbaṭel imi Fransa ur tt-terri ara tmara ad tezref wid i d-yettwassenzen, ig Rebbi kra ur t-xdimen. Wid i d-tger tegnit ɣlin-d ger yifassen-nsen, ad ten-awin berra i taddart, ad asen-qemcen allen-nsen s ubeḥnuq aberkan, ad ten-senden ɣer yiwen n lḥiḍ, ad qersen fell-asen s rrsas ara ten-iɣeḍlen aɣelluy aneggaru.
Ṭṭeyyeb, mmi-s n uḥerki i ikerhen akken i ilaq Bubekker seg zik, seg wasmi i llan d imecṭaḥ, issenz-it i lɛesker n Fransa, yenna-asen iqeddec i yimjuhad. Ayen akka yexdem Ṭṭeyyeb i Bubekker iɛedda tilas, yuzen-it srid ɣer tmettant. Seg zik ur t-iḥemmel ara, yettasem deg-s imi urǧin t-yeǧǧi tikkelt ad d-iban sdat n yimeddukal-is, ad yeṭṭef taqaɛet am netta. Yif-it deg tal tamsalt, yif-it ula deg nnif. Yeggra-d wayen ara t-ikksen akkin sdat-s ur d-yettarra ara fell-as tili, d assiweḍ n wayen akken icukk ixeddem-it i yimjuhad, i yiserdasen n Fransa.
Bubekker d kra n yirgazen-nniḍen i d-yettwassenzen am netta uwin-ten yid-sen lɛesker ɣer umkan-nni anda akken i ten-seqliliḥen. Din din mi uwḍen, ddmen-d sin gar-asen, sbedden-ten ɣer lḥiḍ, qqnen allen-nsen s uceṭṭiḍ aberkan, lqebḍan imiren issendeh tarbaɛt-is timselleḥt. Nettat, i yettwaxedmen i temsal am ti, mebla aḥezzeb d ukukru tejbed ɣef zznad, tiyita taɣeddart truḥ telḥeq imeɣban n Rebbi deg wul, ɣlin i sin tibelfudemt mmuten.
Tuweḍ-d ddala n Bubekker ad kksen iziɣer-is. Mi t-ttseggiren kra n yiɛsekriwen metwal aɣrab-nni n tmettant, netta yettnamar-iten u yessutur s uḥellel lqebḍan-nni akken ad t-yeǧǧ ad yeg taluft taneggarut n tudert-is. Aɣella n yiserdasen, ur t-iɣull ara, yedda-as deg lebɣi imi yeḥsa yettidir kan ddqayeq tineggura deg ddunit-is.
Bubekker yesnemmer lqebḍan yuɣal yedda azal n mraw n lmitrat ɣer sdat almi i t-id-immuger yiwen ukeddar, dɣa yuli fell-as, yebda yettwehhi s sin n yifassen s igenni d asawen. Akka i t-id-ttwalin lqebḍan d lɛesker-is.
Bubekker mi yerfed i sin n yifassen-is d asawen d Rebbi-s i ihedder, yeqqar-as: “Ass-agi, tura ad d-tbaneḍ ma telliḍ neɣ xaṭi ulac-ik, ma teddiḍ d lḥeqq neɣ d lbaṭel, ma tɛemdeḍ i win izzɣezzɣen ad isserwet akken i d-as-yehwa. Ass-agi kullec ad d-iban, nekk ass-agi i d ass-iw, ma ur k-ufiɣ ara ass-a dayen. Ur ttɛeṭṭileɣ ara ad ẓreɣ ma telliḍ neɣ ur telliḍ ara”.
Lqebḍan-nni yedhec deg umdan-ihin iheddren i yigenni netta yettwehhi s sin n yifassen-is irennu ɣas ma yeḥsa ur yettɛeṭṭil ara ad yernu s atmaten-is ifeẓẓen ilsawen-nsen sgellin kan. Dɣa yesteqsa yiwen ugumi i yessnen ad yemmeslay taqbaylit d tefransist, yenna-as: “D acu i ixeddem akka umexluq ihin?
-A-t-an yettmeslay d Rebbi-s, yeqqar-as ass-a ad d-tbaneḍ ma yella telliḍ neɣ ulac-ik”.
Kra yehder Bubekker d Rebbi-s, yessuqel-it-id akken ma yella ugumi-nni i uɣella n yiserdasen. Wagi mi yegza ayen akk yenna Bubekker iṭṭerḍeq s yiwet n teḍsa n tidet almi yettegririb. Mi ifukk dayen akkeɛkeɛ-is yessendeh iserdasen-is yenna-asen: “Sserḥet-as i umdan-nni ad iruḥ, a-t-an d ilelli”.
Bubekker i d-yuɣalen seg lmut iteddu s axxam yeqqar netta yettales : “Sebḥanllah, a Rebbi telliḍ ! Telliḍ a Rebbi…”
?Anda fell-ak a Bubekker