...Abalmud
D tizelgi…
Ad yaweḍ semmus n yiseggasen deg tudert-is, ferḥen yimawlan-is ad yekcem s aɣerbaz ad d-yagem tussna i wallaɣ-is. Ad itturebba, ur iteffeɣ ara i ubrid. Ad yaweḍ ɣer din, ad iger iman-is deg wadar netta d tizziwin-is, ad yekcem ɣer tneɣrit ad asen-yini uselmad-nsen qqimet s uwehhi n yifassen-is, ad qqimen.
Ad yebdu ad asen-d-ihedder s tutlayt ur fehmen ara. Ad yettkemmil awal ɣas ma yeḥsa am win iheddren i lḥiḍ. D acu-t tura wagi? Anelmad amecṭuḥ deg tmurt-is i yella, imawlan-is slemden-as ad yemmeslay tameslayt n tmurt-is, tin i nhedder yal ass. Yenwa meskin uqcic ameɣbun d tin ara yaf deg uɣerbaz n taddart-is, n tmurt-is. Mačči d tin i yufa, yufa yiwet ur ifehhem ara akk d tabarranit, mačči ines. Ɣas akken ula d aselmad yeẓra mačči d tutlay n yinelmaden yesɣaray maɛna yettkemmil ihedder-asen-d yis-s. Ruḥ tura kečč fhem cwiṭ…
Mi ara d-yuɣal s axxam, d baba-s neɣ d yemma-s ara t-id-yawin, deg ubrid ad t-steqsayen : « Amek i tufiḍ aɣerbaz ? I uselmad-ik iɛǧeb-ak ? I yinelmaden turareḍ yid-sen imi d tizziwin-ik ?….. Aqcic, awal ur t-id-yuli. Baba-s ibeddu ixelleɛ imi t-yettwali ala arquqen-is i d-yeldin ɣur-s. liḥala ideg yella mmi-s i d tiririt ɣef merra isteqsiyen i as-d-yefka baba-s. Seg yimir-nni ur as-yerni ula d yiwen n wawal.
Mi alaḥal ad awḍen tawwurt n uxxam-nsen, anelmad n tmara iwala yemma-s tettraju-t ɣef umanaṛ n tewwurt. Am tbuciḍant i yuzzel ɣur-s, netta yettru, yettɛeggiḍ s ṭṭelq n tgerjumt-is, imeṭṭawen anect n lbunyat ttegruffuɛen-d seg taṭṭucin-is. Ula d yemma-s temmuger-it-id s tazzla.
D acu i k-yuɣen akka a mmi ? Ula d nettat ɣlin-as-d yimeṭṭawen.
Dayen ! Dayen ! Ur ttuɣaleɣ ad ruḥeɣ s aɣerbaz !…
