…Am wulli
Nettwanhar am wulli
Ar tura ur nezmir i yiman-nneɣ. Ar tura d wiyiḍ i yettḍebbiren fell-aneɣ. Ar tura nɣunfa tagmat. Ar tura neqqar-as: » Numasri-as i teddukli. Ar tura ttaḍsan yicenga deg-neɣ. Ar tura nrehhen azekka-nneɣ. Ar tura awal ur ɣ-d-yettali sdat n wid i ɣ-yerran d aklan ɣef tɣema-nsen, neǧǧa tayla-nneɣ. Ar tura neṭṭef abrid-nni yettawin srid ɣer nnger.
Wissen melmi ara d-neldi allen? Wissen melmi ara d-naki seg tnafa ɣezzifen? Wissen???….
Inher-agh ughyul
Am wulli…
Am userbabuɛ n wulli
Teddunt ta deffir tayeḍ
Fkant taduṭ d usuṭeḍ
Akken i nettawi tikli
Tikli-nneɣ cerḍen-tt nutni
Lebɣi-nneɣ yettwagemmeḍ
Tayerrust dima tzezmmeḍ
S tuffra kan i nettinẓi
Tturaren yid-neɣ d tirni
Deg-neɣ yal ass d aseḥfeḍ
Tteryel, ccɣel-is d askikeḍ
Nekkni, acemma ur t-id-nenni
Tewser, sqaḍa d urgigi
Isiḍ, ddɣel d uzelkeḍ
Tamurt tegrareb tecceḍ
Ẓẓemlalen at zik-nni
Tasarut ur sen-tɣelli
Ɛelqen-tt, tezzi i umgerḍ
Leḥkem fell-as i yecreḍ
I izeggiren d bu mezzughen
Nekkni, nella ur nelli
? Acḥal ad teqqim akka
Yiwen deg-neɣ ur yeẓri
Ɣer waniwa ara nberri?
Ha-tt deg yal tama terka
Neḥsa akk ansa i d-tekka
Deffir n ssber nedduri
Tawenza meskint tedri
Nettraju amek-it uzekka
?I usendeh ansa i d-yekka
Seg zik deg-neɣ d amerri
Seg Marikan neɣ seg Mekka
Rray-nneɣ dima ikerri
Mlet-aɣ amek iga wakka
Mlet-aɣ anda ara d-teggri
Yeɛsa Rebbi Uzzayri
Tafekka-s tuli-tt takka
Ssired neɣ qqim i yimerka
Bedden ɣef wayen n diri
Fell-asen tnejla tayri
Sɛujjuren am twekka.
« Tewser, sqaḍa d urgigi »Akka i teḍra d yiqerrayen-nneɣ
Malek HOUD