.... Buregɛa
Amjahed ameqqran
Buregɛa igergeɛ-d tasertit n tmurt-is. D asgerbeɛ i ten-yesgerbeɛ mi ur yesteɛref ara yis-sen imi awal ur t-id-yerri ara i umzerfu i t-isteqsayen acku yettwali-t d amhersan am win isuffeɣ seg tmurt-is mi yella d amjahed ameqqran.
Ilemẓiyen d telmeẓiyin i irefden anay amaziɣ gren-ten s asekraf mi d-seknen azamul n tmagit-nsen. Yenna-asen umzerfu i iteddun s tilifun, kunwi tebɣam ad tebḍum tamurt. D acu i as-d-rran warrac-a i t-yugaren tigzi ? Anay amaziɣ mačči d tamurt-nneɣ kan i yezdi, yesddukel akk timura n Tferka n Ugafa, amek i tebɣiḍ ad yebḍu Zzayer. Beṭṭu n tmurt, seg-wen i d-yekka akken ad tafem iman-nwen, akken ad tettcaxem dima ɣef ugdud i tekkatem ad yeqqim d akli fell-awen.
Ay imḍebbren n tmara n tmurt, ad ken-nesnemmer aṭas aṭas imi tamurt i tbeṭṭum tuɣal tesdduklem-tt mebla lebɣi-nwen. Terram lḥebs n Lḥerrac anda i ilaq ad d-teggrim deg-s akken ma tellam, d aɣerbaz n tegrawla. Tuznem inelmaden imecṭaḥ s aselmad ameqqran. Mass Lexḍar Buregɛa ad asen-iselmed timeɣnest akked leḥmala n tmurt, tamurt urǧin tekcem abrid ul-nwen. Amenzaḍ n temnaḍt tis ukkuẓ n tegrawla n Zzayer, yefka timsirin n umezruy n tidet, yerna yessebɣes imeḥbas imecṭaḥ i yuɣalen d imeɣnasen imeqqranen ara ikemmlen anennuɣ-nsen alma ttwakksen ɣef tikkelt.
!Tanemmirt ay amenzaḍ-nneɣ
Ad ṭebgem gaɛ
Ad teǧǧem listeɛ
I wid yuklalen tamurt
Tḥekmem s ddreɛ
Tetteddum deg nnzeɛ
Fell-aɣ tesnegrem tafsut
Tamurt ad twenneɛ
Ad ternu ad tecceɛceɛ
Mi ara ad teffeɣ seg tagut.
Samira am Faḍma…