.. Taɛeṭṭart
Tettgeḥḥil s umerwed
Tamurt n Leqbayel ur tessidir ara arrw-is. Truḥ akk d adrar, rnu akal-is mačči d win yelhan i wuẓẓu. D anect-a i yerran ilmeẓyen-is ttinigen ɣer tmura tiberraniyin akken ad zzenzen afud n umahil-nsen. Tadrimt i d-ttaṭṭafen ttazen-tt-id i twaculin-nsen yeqqimen deg tmurt. Ihi, tudrin i tent-iɛemren ala tilawin d temɣarin d yimɣaren d teqcicin d warrac imecṭaḥ.
Tilawin deg taddart dehhunt deg lecɣal n yal ass am leqdic, aniwel tarda n yiceṭṭiḍen, rennunt teẓẓunt izegza deg tmizar i ttarrant d tibḥirin.
Maca yella wayen-nniḍen testeḥq tmeṭṭut ladɣa ayen yerzan tahuski-ines, am taẓult, agusim aman n rriḥa, lemri neɣ kra n wallalen i tessexdam deg ugni am tsegnatin, lqez,d wayen-nniḍen.
Win i d-yettawin ɣer tudrin n Leqbayel tilufa-a akk iwumi neqqar taɛeṭṭart d aɛeṭṭar.
Ihi, yiwet n tikkelt yiwen uɛeṭṭar,Ibubben aḍellaɛ yettenfalen seg leḥwal n tɛeṭṭart, iteddu deg tzerbatin n yiwet n taddart, yettɛeggiḍ ad as-d-slen yimezdaɣ-is ad d-asen ad aɣen ayen akken yezznuzu. Yassawal acḥal d abrid: « Ad taɣem taɛeṭṭart! Ad taɣem taɛeṭṭart! » Dɣa yerna kra a-t-a yeffeɣ-d yiwen uqcic d ameẓẓyan seg yiwen uxxam, yenna-as i uɛeṭṭar-nni: « Ur nettaɣ ara! Ur nettaɣ ara!
-Ala a mmi, aweḍ s axxam-nwen testeqsiḍ yemma-k ma ad taɣ neɣ ur tettaɣ ara » I as-yerra uɛeṭṭar-nni.
« Ad taɣem taɛeṭṭart! Ad taɣem taɛeṭṭart! »