.....Lemur
Cergent tfexsa iḍarren
Abrid i d-yuwi ɣezzif
Iwerrek d isennanen
Yezga meskin yettiẓẓif
Cergent tfexsa iḍarren
Iɣrem-as-d tamart lḥif
Seg wasmi i d-yeldi allen
Yettawi yid-s asurif
D yir lfal i d-ttmmagaren
Udi ad yagar iɣi
S tayri ittenfal wul-is
Ma d tasa-s tetteḥdiqqir
Yessway akk iẓuran-is
Yeḥmmel ad ilin bxir
Ɣas yebɣa ad yerr (ɣe)f yixef-is
Tamurt tettaṭṭaf-it am ddkir
Temɣer txeddem ccɣel-is
Netta kra ur as-yezmir
S tayri ittenfal wul-is
Yeqqar: “Amer i ḥsiɣ akka”
Rray ad t-fkeɣ i lebɣi
Ad ḥekmeɣ deg uzekka
Udi ad yagar iɣi
Ad smeɣreɣ deg tferka
Ayen ẓẓiɣ deg-s ad yemɣi
Ziɣen…
Aẓeṭṭa n usirem-is yerka
Ddunit, terra-t am yijɣi
Aẓeṭṭa n usirem_is yerka
Lufan i d-tzewwir temɣer
Ugur ur yekkat amdan
Ad d-ilal akken s tewser
Alma yuɣal d lṭufan
Ddunit-is ur t-tettaker
Ur as-d-tettaǧǧew urfan
Ad yettcax ula deg zzher
Ad t-yeṭṭeḍ amzun d ifan.
Ad t-yeṭṭeḍ amzun d ifan.