Tiɣzert iqeḍɛan
Tiɣzert iqeḍɛan
Tiɣzert Iqeḍɛan d yiwet n teɣzert igezmen yiwen ubrid iɣef d-ttɛeddayent tkerrsin. D yiwen umḍiq ibrebren, yeččur d isekla, am tselnin, akerruc, amemmay, wa ikcem daxel n wa. Ifurkan-nsen myurzen, dɣa gan yiwen ucadux asemmaḍ ur d-tettwali ara akk tafat. Ɣef waya acḥal d abrid i sxedmen yimjuhad adeg-a d amkan n tuffra, syin ttwalin-d maca yiwen ur ten-id-yettwali. Ad qqimen din ad ttrajun lɛesker n Fransa ad d-iɛeddi syin s tkerrsin-nsen. Ad d-awḍen kan ɣer teɣzert-nni ad d-ɣlin fell-asen s rrsas i d-itekken ddaw n ccḍeb anda i ffren, ur ttaǧǧan yiwen ibedd ɣef yiḍarren-is. Maca akken yeqqar wanzi-nni: “Qqsen-t warẓaẓen yerra zɛaf ɣef yibẓiẓen”. Lɛesker amesbaṭli i yeččan tiɣrit acḥal d abrid din, yuwi-d iglezyam, tuẓẓal, icuqar d tmenččarin, yekker yegzem, iqedder akk isekla d yimɣan n teɣzert. Tiɣzert tameɣbunt amzun kksen-as iselsa-s, ǧǧan-tt d taɛeryanyt. Bubekker amedyaz, iɣaḍ-it lḥal nezzeh, maca qqnen yifassen-is, ur yezmir ad yeg kra ma d iles-is iserreḥ. Ass-nni kan mi ttwagezmen yisekla n Teɣzert Iqeḍɛan, seg uqerruy-is irekkmen seg ddemmar yeffeɣ-d yiwen usefru yeqqaren:
At Mlikec
“Tennuɣ Teɣzert Iqeḍɛan
Teqḍeɛ abrid i urumi
Xelḍen yidammen d waman
Ɣer ddaw ubrid d asiqi
Isekla cfan i iɛeddan
Ffren amjahed iḍelli
A-t-a yejba-d lɛesker
Deg ubrid iteddu (de)g lehna
Deg teɣzert amjahed yeffer
Amzun ur yelli dinna
Fransa, cudden-as aɣesmar
Seg teɣzert i d-tekka tyita
Acḥal d acengu i tenɣa
Ula d nettat tjuhed
Imeṭṭi-ines d lgerra
Azzayri mi ad isteched
Ttar ur t-tettu ara
Ilaq nnif ad yebded
Tesserwa i uɛdaw lemrar
Yeqqim deg zɛaf irekkem
Yeddem-d tuẓẓal d yicuqar
Ttjur n teɣzert ad tent-yegzem
Yettɛud ad yekkes ddemmar
Tiɣzert teggul ur tessusem
Ṭṭrad yufa-tt-id tettnaɣ
Tfaq s tmurt tettwasteɛmer
Tekkat aɛdaw ad t-tessufeɣ
Tudert ad tɛeddi deg liser
Ad s-tiniḍ tesɛa allaɣ
Tettxemmim ɣef Lezzayer
Idɣaɣen, aman d ttjur
Akal d yiɣezran nnuɣen
Nnuɣen ad d-rren amur
Nsen i d-asen-iruḥen
Ilaq ur sen-netezzi aɛrur
Deg usmekti ttayalen”.
Terẓeg n tament
Aḍris-a d tukkist seg tullist “Amusebbel bu tneɛḍab” n udlis “Terẓeg n tament” n Malek HOUD.