Argaz tehqer tmettut-is
Ma yenna d aberkan, nettat ad s-tini d amellal.
Zik yella yiwen n urgaz teḥqer-it tmeṭṭut-is nezzah. Akken yexdem mačči akken. Ɣur-s yif-it wulac. Tḥemmel ad s-teddu deg nnmara. Ma yenna d aberkan ad s-tini: xaṭi! D amellal! Ma yenna d amellal ad s-tini: ala! D aberkan! Yeqqim yewḥel meskin, ansa i s-yekka yaf tawwurt tuɣal.
I tura amek ara yexdem akken ad yeččar tiṭ n tin yuran deg uqerruy-is? D acu i ilaqen ara ibeddlen tamuɣli n tmeṭṭut-is fell-as? Yetttnadi ad t-id-twali akken yella kan, d aya. Ur yettnadi ad s-tessemɣer ccan, ad s-tfek azal ur yuklal. Yettnadi kan ɣef wazal-is, win akken i terkeḍ ddaw n uḍar-is. Amek ihi tura…
Yiwen n wass, At Sidi Ɛemmar ɛeddan-d ɣef taddart-nsen. Wwḍen-d ɣer umraḥ n tejmaɛt, medden akk zzin-asen-d. Asfaylu n tɣurfet n urgaz teḥqer tmeṭṭut-is yezga-d d lmendad ɣer tejmaɛt. Dɣa syin i d-teṭallay tḥeqqart ɣer wid ijeddben, icennun, yettseḥḥiren.
Yiwet n tikkelt, kra n terbaɛt-nni n At Sidi Ɛemmar ɛezmen abrid uɣalen merra d itbiren. Uffgen s igenni. Tezzin ɣef yiqerray n yimezdaɣ n teddart-nni. Argaz ameḥqur yenna deg wul-is: “Ass-agi i d ass-iw”. Wissen amek akken yexdem, yufa-d iman-is yekkat deg wafriwen gar yitbiren-nniḍen. Izuxx mačči d kra. S taffugt iẓaẓ ɣer tmeṭṭut-is akken ad t-id-twali akken i ilaq, ad teḥṣu d acu yeswa urgaz-is, d acu i yezmer ad t-yexdem. Mi i d-zgant allen deg wallen, allen n tmeṭṭut deg tid n urgaz-is itbir, teṭall-it ddaqqes, tessenhezz deg uqerruy-is tenna-as : “A nnger-ik, ula d taffugt-ik tezleg!”
Fessus urgaz meskin
Malek HOUD